Read Iloko Song of Solomon 1 Bible Online

Song of Solomon 1 - Iloko bible

Song of Solomon 1

¹Ti kapintasan kadagiti kanta ni Solomon.

²“Pugpogennak iti ungngo dagiti bibigmo; naim-imas ngem arak ti ayatmo.

³Nabanglo ti ayamuommo; no maibalikas ti naganmo kasla agaddiwara a bangbanglo. Awan ti babai a di agayat kenka.

⁴Alaennak ta agtarayta; agbalinka nga arik, ket iserreknak iti kuartom. Addaka ditoy sidongko, agragsakta; ipennekta ti uminum, agpapasta iti ayatta. Diak nagbiddut iti panagayatko kenka!

⁵Babbai iti Jerusalem, napugotak ngem napintasak; wen, nangisitak a kas kadagiti tolda ti let-ang ti Kedar, ngem napintasak kas kadagiti kurtina iti palasio ni Solomon.

⁶Didak laisen gapu iti kolorko, ngamin, pinangisit ti init ti kudilko. Kinapungtotdak dagiti lallaki a kakabsatko, imbaondak iti kaubasan ket sadiayak a nagtrabaho, isu a nabaybay-ak ti bagik, diak naasikaso.

⁷Ibagam kaniak, biagko: Sadino ti pangipaarabam iti arbanmo? Sadino ti paginanaanda iti agmatuon nga init? Apay a kaslaak agalla-alla nga agsapsapul kenka kadagiti arban dagiti dadduma nga agpaspastor?”

⁸“Dimo ammo ti lugar, kapintasan a babai? Inka suroten ti tugot ti arban, ket isapulam dagiti kaldingmo iti pagarabanda iti asideg dagiti tolda dagiti agpaspastor.

⁹“Ay-ayatek, kayawam dagiti lallaki a kas panangkayaw ti kabaian a kabalio kadagiti kalakian a kabalio a para-guyod kadagiti luglugan ti Faraon.

¹⁰Napintas dagiti pingpingmo a naarkosan kadagiti alahas. Agbitin iti tengngedmo ti balitok a kuentas.

¹¹Yaramidandaka iti alahas a balitok a mapattopattokan iti pirak.”

¹²“Bayat ti panagid-idda ti arik iti sofa, agaddiwara ti ayamuom ti bangbanglok.

¹³Agat-mirra ti kaayan-ayatko nga agsadsadag iti barukongko.

¹⁴Mayarig ti kaayan-ayatko kadagiti balang a sabong nga agukrad iti kaubasan idiay Engedi.”

¹⁵“Nagpintaska ketdin, biagko; anian a nagrimat dagiti matam gapu iti ayat!”

¹⁶“Nagtaerka ketdin, sika a kapatgan; makaay-ayoka unay. Agpaay nga iddata ti nalasbang a karuotan;

¹⁷sedro ti aoanan ti balayta, ket aruo ti bobedana.