Read Iloko Song of Solomon 2 Bible Online

Song of Solomon 2 - Iloko bible

Song of Solomon 2

¹Balang laeng a rosas ti Saron ti kayarigak, maysaak a lirio kadagiti tanap.”

²“Lirio kadagiti mula a siitan ti arig ti ay-ayatek iti ummong dagiti babbalasang.”

³“Arig ti mansanas iti bakir ti kaingungotko; kadagiti amin a lallaki, awan makaartap. Magustoak ti agtugaw iti linongna, nasam-it iti panagramanko ti bungana.

⁴Intugotnak iti pagdadayaan iti taengna, ket imbayogna ti bandera ni ayat kaniak.

⁵Pinakannak iti pasas tapno agsubli ti pigsak; inikkannak iti mansanas tapno sumarantaak. Napaksuyanak a nakiinnayat.

⁶Pagpungpunganak ti kannigid a takkiagna, ket lalailoennak ti kannawanna.

⁷Ikariyo kaniak, babbai iti Jerusalem, isapatayo kadagiti napardas nga ugsa ken korso a diyo singsingaen ti panaglinnailomi.”

⁸“Mangngegko ti timek ti kaayan-ayatko. Agtartaray kadagiti bantay ken turturod nga umay iti ayanko.

⁹Arigna iti korso ti kaingungotko, kasla maysa nga ugsa a bumaro. Agtaktakderen iti ruar ti bakudmi, sumirip iti tawa, iti baet dagiti rehas tapno makitanak.

¹⁰Agsao ti kaayan-ayatko kaniak.” “Umaykan, ay-ayatek; biagko, kumuyogka kaniak.

¹¹Limmabasen ti tiempo ti lam-ek; simmardengen ti tudtudo.

¹²Agukraden dagiti sabsabong iti tanap. Tiempon ti panagkakanta, agkakantan dagiti pagaw iti taltalon.

¹³Agluomen ti bunga dagiti igos, agsabongen dagiti ubas, ti bangloda agadiwara. Umayka ngaruden, ay-ayatek; biagko, kumuyogka kaniak.

¹⁴Arigmot' kalapati nga aglemlemmeng iti rengngat ti kabatoan. Kitaek man ti nalibnos a rupam, denggek man ti nasam-it a timekmo.

¹⁵“Tiliwem dagiti musang nga agdadael iti mula, amangan no makastrekda iti agsabsabong a kaubasanta.”

¹⁶“Kukuak ti kaayan-ayatko ket kukuanak met. Ipapaarabna ti arbanna iti kalirioan

¹⁷agingga nga agpul-oy ti angin ti agsapa, ken agpukaw ti sipnget. Agsublika, biagko, a kas iti korso, kas iti bumaro nga ugsa kadagiti bambantay.