Read Iloko Song of Solomon 3 Bible Online

Song of Solomon 3 - Iloko bible

Song of Solomon 3

¹Rinabii a matagtagainepko ti kaayan-ayatko, sapsapulek ngem diak masarakan.

²Bimmangonak ket sinursorko ti siudad, linasatko dagiti kalsada ken lansangan. Binirbirokko ti kaayan-ayatko, sinapsapulko ngem diak masarakan.

³Nasarakandak dagiti patrolia iti siudad; sinaludsodko kadakuada no nakitada ti kaayan-ayatko.

⁴Idi makapanawakon iti ayan dagiti guardia, nasarakak ti kaayan-ayatko. Inarakupko ket diak pinalubosan agingga nga inyawidko iti balay ni inak, iti kuarto a nakaipasngayak.

⁵Ikariyo kaniak, babbai iti Jerusalem, isapatayo kadagiti napardas nga ugsa ken korso a diyo singsingaen ti panaginnayatmi.”

⁶“Ania daytoy sumungad nga aggapu idiay let-ang, kasla umasimbuyok nga asuk nga agat-mirra ken insenso ken nabanglo a polbos dagiti agtagtagilako?

⁷Umayen ni Solomon, situtugaw iti trono nga awitda; guguardiaan ti innem a pulo a mannakigubat, dagiti kalaingan a soldado iti Israel.

⁸Nalaingda amin nga agiggem iti kampilan; beteranoda iti gubat. Nakaibarikes ti tunggal maysa iti kampilan, ket sisasaganada a makiranget iti dumarup iti rabii.

⁹Agtugtugaw ni Ari Solomon iti sofa a naaramid iti kasayaatan a kayo.

¹⁰Nakalupkopan iti pirak dagiti saka ti sofa naabbongan iti lupot a nabordaan iti balitok. Nabungon iti nalabaga a lupot dagiti kudsonna nga inaramid a siaayat dagiti babbai ti Jerusalem.

¹¹Babbai iti Sion, umayyo kitaen ni Ari Solomon. Insaad ni inana ti korona iti ulona iti aldaw a panagkasarna; wen, iti aldaw ti rag-o ken ragsakna.”