Read Iloko Song of Solomon 4 Bible Online

Song of Solomon 4 - Iloko bible

Song of Solomon 4

¹“Nagpintaska ketdin, biagko! Naabbongan dagiti matam iti belom, ngem rumimatrimatda gapu't ayatmo. Agsalsala ti buokmo a kas iti arban ti kalding a sumalsalog kadagiti turod ti Galaad.

²Napudaw dagiti ngipenmo a kas iti kappukis, kaddigos a karnero. Awan kurangda, uray maysa, ket napintas ti panagbabatogda.

³Dagiti bibigmo kasda la ragas nga eskarlata, no agsaoka, maragsakan ti makangngeg kenka. Agraniag dagiti pingpingmo a naabbongan iti belom.

⁴Mayarig iti torre ni David ti tengngedmo, nagtimbukel ken nalamuyot a nabitinan iti kuentas a kasla rinibu a kalasag.

⁵Dagiti susom kasda la dua a kigaw, mayarigda iti singin nga ugsa nga agar-arab iti kalirioan.

⁶Agbatiak iti turod ti mirra, iti turod ti insenso, agingga nga agbannawag, ket agpukawen ti sipnget.

⁷Naglibnoska ketdin, biagko! Imnas a naidumduma, awan pagkuranganna!

⁸“Sumalogta iti Bantay Libano, biagko; wen, kumuyogka kaniak manipud Libano. Sumalogka manipud iti tapaw ti Bantay Amana, manipud Bantay Senir ken Bantay Hermon a pagnaedan dagiti leon ken leopardo.

⁹Ta ikikitam, ay-ayatek ken biagko, ken ti kuentas iti tengngedmo isuda ti nangkayaw itoy puso.

¹⁰Nasam-it ti makiinnayat kenka, ay-ayatek ken nobiak; naim-imas ngem arak ti ayatmo. Awan makaartap iti ayamuom ti bangbanglom.

¹¹Kasla diro ti sam-it dagiti bibigmo, biagko; ta dilam kasla gatas ken diro. Adda iti kawesmo ti amin a banglo ti Bantay Libano.

¹²“Mayarig iti minuyongan ti ay-ayatek, naiputputong a hardin, adda bakud ken ubbogna a bukbukod.

¹³Nalangto dagiti mula sadiay. Agtuboda a kas minuyongan dagiti kayo a granada ket agbungada iti kasayaatan a bunga— bangbanglo nga alkamfor ken nardo.

¹⁴Nardo ken azafran, kalamos ken kanela ken amin a kayo nga agtutot iti insenso. Mirra ken aloe ken amin a kangrunaan a bangbanglo.

¹⁵Ubbog ti mangpadanum iti hardin, wen, danum nga agayus manipud iti Bantay Libano.”

¹⁶“Agriingka, O angin ti amianan; angin ti abagatan, pul-oyam ti hardinko tapno agwaras ti banglona. Umay koma ti ay-ayatek iti hardinna ket mangan kadagiti kaimasan a bungana.”