Read Iloko Song of Solomon 5 Bible Online

Song of Solomon 5 - Iloko bible

Song of Solomon 5

¹“Addaak iti hardinko, ay-ayatek ken nobiak. Agal-alaak iti mirra ken balsamok; kankanek ti rara ken ti dirok, in-inumek ti arak ken gatasko.” “Mangan ken uminumkayo, agayan-ayat, agingga a mabartekkayo iti ayat!”

²“Matmaturogak ngem siririing toy riknak, mangngegko ti kaayan-ayatko nga agtuktok iti ridaw.” “Sumrekak man, biagko ken ay-ayatek, bassit a kalapatik nga awan pagkuranganna. Sibabasa ti ulok iti linnaaw ti agsapa.”

³“Nakauksobakon; masapul kadi nga agbadoak manen? Nabuggoakon dagiti sakak, masapul kadi a rugitak manen ida?

⁴“Iniggaman ti kaayan-ayatko ti ridaw, ket naggagarak kenkuana, limmagto 'toy puso.

⁵Timmakderak a mangpastrek iti kaayan-ayatko, sibabasa dagiti imak iti mirra, ket agar-aruyot dagiti ramayko idi uksotek ti balunet.

⁶Inlukatko ti ridaw tapno sumrek ngem nakapanaw metten ti ay-ayatek. Kailiwko unay a denggen ti timekna! Binirokko ngem diak nasarakan; inawagak ngem awan simmungbat kaniak.

⁷“Nasarakandak dagiti agwanwanawan iti siudad; kinabkabildak agingga a nasugsugatanak. Dagiti guardia ti bakud pinigisda ti kagayko.

⁸Babbai iti Jerusalem, ikariyo kaniak, a no masarakanyo ti ay-ayatek, ibagayo kenkuana a masakitak gapu iti ayat.”

⁹“Kalibnosan kadagiti babbai, ania kadi ti nakaidumaan ti ay-ayatem kadagiti kaaduan? Ania la unay aya ti nakaskasdaaw kenkuana, ta masapul nga agkarikami kenka?”

¹⁰“Nataer ken napigsa ti kaayan-ayatko naiduma kadagiti pinulloribu.

¹¹Nalinis ken pugot ti rupana, nangisit a kas iti wak ti kulot a buokna.

¹²Napintas dagiti matana kas kadagiti kalapati iti asideg ti agay-ayus a waig, kalkalapati a nadigos iti gatas, ken sitatakder iti abay ti ubbog.

¹³Dagiti pingpingna arigda napintas a hardin a napno iti mula ken bangbanglo. Kasla lirio dagiti bibigna a nababasa iti mirra.

¹⁴Nasippukel dagiti takkiagna, ket nakasingsing iti adda batona. Nalinis ti bagina a kas iti marfil a napattokan iti safiro.

¹⁵Kasla adigi nga alabastro dagiti sakana, a naisaad iti balitok. Nadaeg a kas iti Bantay Libano, a namulaan iti nalalayog a sedro.

¹⁶Nasam-it nga agkan ti ngiwatna, mabatombalaniak iti amin nga adda kenkuana. Kastoy ti kayarigan ti ay-ayatek, babbai iti Jerusalem.”