Read Iloko Song of Solomon 7 Bible Online

Song of Solomon 7 - Iloko bible

Song of Solomon 7

¹“Nagpintasen dagita saka a nakasandalia, O nadayag a babai! Kasla sinukog ti nalaing nga eskultor dagiti nasippukel a luppom.

²Ti pusegmo kasla nagbukel a malukong a di maibusan iti nalaokan nga arak. Mayarig iti nabettek a trigo ti siketmo a nalikmut iti lirio.

³Kasla singin nga ugsa dagiti susom, kasda la dua a kigaw.

⁴Kasla torre a marfil ti tengngedmo. Dagiti matam kas libtong ti Hesbon, iti asideg ti ruangan ti siudad a naindaklan. Natundiris ti agongmo, kas torre ti Libano a mangtantannawag iti Damasco.

⁵Natangig ti ulom a kas iti Bantay Carmel. Napintas ti nasallapid a buokmo a kas iti kapintasan a nalabaga a lupot; kayawan ti pintasna ti maysa nga ari.

⁶“Nagpintaska ketdin, biagko, anian a pusaksak; nagimnasen ti ragsak nga ipalak-ammo kaniak.

⁷Napintas ti lung-aymo a kas iti kayo ti palma, ket dagiti susom kasdala sinar-ay a bungana.

⁸Uliekto ti kayo a palma ket purosek dagiti bungana. Raay ti ubas dagiti susom iti panagkitak, ti sang-awmo kasla ayamuom ti mansanas.

⁹ket dagiti agekmo kas iti kaimasan nga arak.” “Agayus koma ti arak iti kaayan-ayatko ket agayus kadagiti bibig ken ngipenna.

¹⁰Kukuanak ti kaayan-ayatko ket tarigagayannak.

¹¹Umayka, biagko, inta idiay away ket umianta kadagiti kataltalonan.

¹²Agriingtanto a masapa ket kitaenta dagiti ubas; kitaentanto no agsaringit wenno agsabongdan. Kitaentanto no agsabongen dagiti granada. Sadiay, itedkonto toy ayatko kenka.

¹³Masay-upmo ti ayamuom ti mandragoras, adda iti ridawta dagiti bunga nga agkakaimas. Biagko, iduldulinko a para kenka dagiti daan ken baro a bunga.