Read Iloko Song of Solomon 8 Bible Online

Song of Solomon 8 - Iloko bible

Song of Solomon 8

¹“Apay a dika nagbalin a kabsatko? Pinasusonaka koma ti inak, inaywanannaka, tapno awan agdildillaw no agkanka, no masabatka iti kalsada.

²Yawidka koma iti balay ti inak ket isuronak nga agayat. Ikkanka koma iti nalaokan nga arak, ti arak a nagtaud iti granada a mulak.

³“Agpungpunganak iti kannigid a takkiagmo, ket lalailoennak ti kannawanmo.

⁴Ikariyo kaniak, babbai iti Jerusalem, a diyo singsingaen ti ayatmi.”

⁵“Siasino daytoy sumungad nga aggapu iti let-ang nga agkibkibinda iti ay-ayatenna?” “Riniingka iti sirok ti mansanas, iti lugar a nakaipasngayam.

⁶Siak laeng ti ayatem, siak laeng ti arakupem. Nabileg ti ayat a kas iti patay; naranggas ti imon a kas iti tanem. Rumasuk a kas sumgiab nga apuy, ket gumil-ayab a kas iti nadawel nga uram.

⁷Saan a masebseban ti adu a danum, ket awan ti layus a makaiddep. Ngem no adda agpanggep a gumatang iti ayat, pannakaumsinto laeng ti inna maragpat.”

⁸“Adda kabsatmi nga ubing a babai, babassit pay la dagiti susona. Anianto ti ipaaymi iti kabsatmi inton adda barito nga agarem kenkuana?

⁹No maysa a bakud ti kabsatmi, ibangonanmi iti pirak a torre a salaknibna. No maysa a ruangan, pakalupkopanmi iti sedro.”

¹⁰“Maysaak a bakud ket dagiti susok ti torrena. Ammo unay ti kaayan-ayatko a natalged ti salaknibko ket awan pakaan-anoak.”

¹¹“Adda kaubasan ni Solomon iti lugar a managan Baal Hamon. Adda dagiti mannalon a nangipaabanganna; tunggal maysa sangaribu a bagi ti pirak ti ibayadna.

¹²Adda met bukodko a kaubasan. Solomon, kukuam ti rinibu a pirakmo, ket maibingayan dagiti mannalon iti sagdudua a gasutda.

¹³Denggek man ti timekmo manipud iti hardin, ayatko, Dagiti kakaduak aggagarda a makangngeg kenka.”

¹⁴“Biagko, darasem ti umay kaniak. Agtarayka a kas iti ugsa, iti kabambantayan a napno iti nabanglo a mulmula.”