Read Iloko Isaiah 1 Bible Online

Isaiah 1 - Iloko bible

Isaiah 1

¹Iti daytoy a libro, nailanad dagiti mensahe ti Dios maipapan iti Juda ken Jerusalem. Impakaammona dagitoy ken ni Isaias nga anak ni Amoz kadagiti panawen a panagturay dagiti ari ti Juda: da Uzzias, Jotam, Ahaz ken Hezekias.

²Kinuna ti Apo, “Dakayo a langit ken daga, denggenyo ti saok. Sinukirdak dagiti ubbing a pinadakkelko.

³Ammo dagiti baka ti akinkukua kadakuada. Ammo met dagiti asno ti lugar a pangpakanan ti apoda kadakuada. Ngem awan ti ammo dagiti Israelita. Saan a makaawat dagiti tattaok.”

⁴Nasentensiaanka a madadael, sika a managbasol a nasion, dakayo a rinuker ken managdakdakes a tattao! Ilumlomnakayo dagiti basbasolyo! Linaksidyo ti Apo, ti Nasantoan a Dios ti Israel, ket tinallikudanyo.

⁵Apay a diyo isardeng ti agsukir? Kayatyo kadi a manayonan pay ti dusayo? Nalapunos ti uloyo iti sugat ket saan a nasalun-at ti puso ken panunotyo.

⁶Pasig a sugat ti entero a bagiyo manipud dapan agingga iti ulo. Awan ti nasalun-at a paset ti bagiyo. Nalapunoskayo iti dunor, gaddil ken sugat. Saan a nadalusan wenno nabedbedan dagiti sugatyo. Awan ti nayagas kadakuada.

⁷Nadadael a namimpinsan ti pagilianyo ket napuoran dagiti siudadyo agingga a dimmapuda. Iti imatangyo, sakupen dagiti ganggannaet ti dagayo ket dadaelenda ti amin.

⁸Ti laeng Jerusalem ti nabati, maysa a siudad a nalakub—awan salaknibna a kas iti kalapaw ti agbambantay iti kaubasan wenno iti paglinongan iti talon a namulaan iti pipino.

⁹No saan nga impalubos ti Apo a Mannakabalin-amin a makalasat ti sumagmamano a tattao, nadadael koman a namimpinsan ti Jerusalem a kas iti Sodoma ken Gomorra.

¹⁰Jerusalem, maipada dagiti turayem ken tattaom kadagidi turayen ken tattao ti Sodoma ken Gomorra. Denggem ti ibagbaga ti Apo kenka. Imdengam ti isursuro ti Dios kenka.

¹¹Kunana, “Ipagarupmo kadi a kayatko dagiti amin a daton nga idatdatagmo kaniak? Naumaakon kadagiti karnero nga idatdatagmo a daton a mapuoran ken iti taba dagiti kasayaatan nga animal. Diak kayaten ti dara dagiti toro a baka, karnero ken kalding.

¹²Siasino ti nangibaga nga agitugotkayo kadagitoy no umaykay agdaydayaw kaniak? Siasino ti nangibaga kadakayo nga umaykay agpagnapagna iti Templok?

¹³Diak kayaten dagiti awan serserbina a datonyo. Naumaakon iti angot ti insenso nga idatdatonyo. Diak maanusan dagiti panangrambakyo iti Fiesta ti Lutuad, ti Aldaw a Panaginana, ken panaggigimongyo. Namulitanda amin gapu kadagiti basbasolyo.

¹⁴Kagurak ti panangrambakyo iti Fiesta ti Lutuad ken ti panangrambakyo kadagiti nasantoan nga aldaw. Nagbalindan a dadagsen a diakon maibturan.

¹⁵“No agkararagkayo nga umawag kaniak, dikayto talliawen. Uray kararagkayo a kararag, dikayto denggen ta namansaan iti basol dagiti imayo.

¹⁶Dalusanyo dagiti bagbagiyo. Isardengyon ti amin a kinadakes a makitkitak nga ar-aramidenyo. Wen, isardengyon ti agaramid iti dakes

¹⁷ket sursuroenyo ti agaramid iti naimbag. Ikagumaanyo a maipakat ti hustisia—tulonganyo dagiti maidadanes, ikalinteganyo dagiti ul-ulila, ket salaknibanyo dagiti balo.”

¹⁸Kuna ni Yahweh, “Ita, umaykayo ta aglilinnawagtayo. Nalabaga ti mansayo gapu iti basol, ngem dalusankayo agingga nga agbalinkayo a napudaw a kas iti kapas. Uray no nakalablabbaga ti mansayo, pumudawkayto a kas iti puraw a de lana.

¹⁹No la ket agtulnogkayo kaniak, sagrapenyonto dagiti agkakaimbag a maapit iti daga.

²⁰Ngem no dikay agtulnog ket sukirendak, masentensiaankayto a matay.” Daytoy ti sao ni Yahweh.

²¹Daydi siudad a napudno, awanen dumana iti balangkantis a babai! Nagtaeng idi sadiay dagiti nalinteg a tattao, ngem ita, pasig a mammapatay ti nabati.

²²Jerusalem, mayarigka idi iti pirak ngem ita, awanen ti serserbim. Kaska la naimas nga arak idi, ngem ita, nagamporankan iti danum.

²³Nasukir dagiti pangulom ket gagayyem ida dagiti mannanakaw. Kanayonda nga umawat iti regalo ken pasuksok. Ngem dida ikalintegan dagiti ul-ulila iti pangukoman wenno denggen dagiti balo a babbai no idatagda ti darumda.

²⁴Ita ngarud, denggenyo ti sao ti Apo a Mannakabalin-amin, ti mannakabalin a Dios ti Israel. Kunana, “Balsenkayto, dakayo a kabusorko, ket awanton ti parikut a yegyo kaniak.

²⁵Ipariknakto kadakayo ti pungtotko. Dalusankayto a kas iti pannakagugor ti landok. Ikkatek amin a kinarugityo.

²⁶Ikkankayto kadagiti pangulo ken mammagbaga a kas kadagidi adda kadakayo idi un-unana. Kalpasanna, maawaganto ti Jerusalem a nalinteg ken napudno a siudad.”

²⁷Gapu ta nalinteg ti Apo, isalakannanto ti Jerusalem ken dagiti amin a tattao sadiay nga agbabawi iti basolna.

²⁸Ngem pukawennanto ti siasinoman nga agbasol ken agsukir kenkuana. Papatayennanto amin dagiti mangtallikud kenkuana.

²⁹Agbabawikayto iti panagdaydayawyo kadagiti kayo ken ti panagipasdekyo kadagiti minuyongan a sagrado kadakayo.

³⁰Magangokayto a kas iti matmatay a kayo ti lugo, kas iti hardin a di masibsibogan.

³¹Kas iti pannakapuor ti nagango a kayo babaen iti apuy, kastanto met ti pannakadadael dagiti nabileg a tattao gapu kadagiti dakes nga aramidda ket awanto ti makaatipa iti pannakadadael.