Read Iloko Isaiah 10 Bible Online

Isaiah 10 - Iloko bible

Isaiah 10

¹Asikayo pay, dakayo nga agaramid iti linteg a mangparigat kadagiti tattaok.

²Kasta ti pamuspusanyo tapno saan a magun-od dagiti napanglaw ti kalinteganda ket dida matunton ti hustisia. Kasta ti pamay-anyo tapno maalayo ti sanikua dagiti balo a babbai ken ul-ulila.

³Anianto ti aramidenyo inton dusaennakayo ti Dios? Anianto ti aramidenyo inton idissuorna kadakayo ti didigra nga aggapu iti adayo a daga? Sadinonto ti pagkamanganyo nga umawag iti tulong? Sadinonto ti pangilemmenganyo iti kinabaknangyo?

⁴Mataykayto iti paggugubatan wenno maulod-ulodkayto a mayadayo a kas balud. Uray no kasta, saan nga agbaaw ti pungtot ti Apo ket silalayat pay laeng ti imana a mangdusa.

⁵Kinuna ti Apo, “Kakaasika, Asiria! Aramatenka a kas pang-or a pangdusa kadagiti kapungtotko a tattao.

⁶Imbaonka a mangraut iti nasion a saan nga agbuteng iti Dios, kadagiti tattao a namagpungtot kaniak. Imbaonko ida nga agsamsam, agtakaw ken mangibaddebaddek kadagiti tattao a kas tapok kadagiti kalsada.”

⁷Ngem adda nadawel a panggep ti emperador ti Asiria. Inkeddengna a dadaelen ti adu a nasion.

⁸Ipangpangasna: “Ari amin a pangulo ti buyotko!

⁹Pinarmekko dagiti siudad ti Calno ken Carkemis, kasta met dagiti siudad ti Hamat ken Arpad. Pinarmekko pay ti Samaria ken Damasco.

¹⁰Dinusak dagiti pagarian nga agdaydayaw kadagiti imahen nga ad-adu ngem ti adda iti Jerusalem ken Samaria.

¹¹Dinadaelko ti Samaria ken amin nga imahen a pagdaydayawan dagiti tattao. Kastanto met ti aramidek iti Jerusalem ken kadagiti imahen a pagdaydayawanda sadiay.”

¹²Ngem kuna ti Apo, “Inton malpasko ti ar-aramidek idiay Bantay Sion ken idiay Jerusalem, dusaekto ti emperador ti Asiria gapu iti kinatangsit ken kinapalangguadna.”

¹³Ipasindayag ti emperador ti Asiria: “Sisiak ti nangaramid kadagitoy. Napigsaak, masiribak ken nasikapak. Inikkatko dagiti beddeng dagiti nasion ket innalak dagiti sanikua nga inurnongda. Kaslaak la toro a baka a nangibaddebaddek kadagiti tattao nga agnaed sadiay.

¹⁴Mayarig dagiti nasion ti lubong iti umok ti tumatayab ket linaklakak a kinaut dagiti sanikuada a kaslaak la nagpidut iti itlog. Awan ti payak a nagpayakpak a nangkigtot kaniak. Awan ti nagkiak a nangpaadayo kaniak!”

¹⁵Ngem kuna ti Apo, “Mabalin kadi nga ibaga ti wasay a natantan-ok ngem iti agwasay? Napatpateg kadi ti ragadi ngem ti agragadi? Saan a ti pang-or ti mangiggem iti tao. Ti tao ti mangiggem iti pang-or.”

¹⁶Idissuorto ti Apo a Mannakabalin-amin ti sakit a pangdusa kadagiti tattao a nabuslonen ti taraonna. Addanto apuy a sumsumged kadagiti bagida.

¹⁷Ti Dios a silaw ti Israel, agbalinto nga apuy. Wen, agbalinto nga apuy ti nasantoan a Dios ti Israel, apuy nga iti las-ud ti maysa nga aldaw uramenna ti amin, uray dagiti siitsiitan a mula ken kalkalunay.

¹⁸Madadaelto a mamimpinsan dagiti nasamek a kabakiran ken nadam-eg a pagtatalonan a kas iti panangdadael ti nadagsen a sakit iti maysa a tao.

¹⁹Bassitto ti matda a kayo ket mabalinto a bilangen ti uray maysa la nga ubing.

²⁰Dumtengen ti tiempo a dinton agtalek dagiti nakalasat nga Israelita iti pagilian a dandani nangdadael kadakuada. Agtalekdanto a sipupudno iti Apo, ti Nasantoan a Dios ti Israel.

²¹Addanto sumagmamano nga Israelita nga agsubli iti nabileg a Diosda.

²²Uray no adu ita dagiti Israelita a kas iti kaadu ti darat ti baybay, bassitto laeng ti agsubli. Adda pannakadadael nga agur-uray kadagiti tattao ket tumutop a madusada.

²³Wen, idissuorto ti Apo Dios a Mannakabalin-amin ti pannakadadael ti entero a pagilian kas imbagana.

²⁴Kuna ti Apo Dios a Mannakabalin-amin kadagiti tattao nga agnaed idiay Sion, “Dikay agbuteng kadagiti taga-Asiria, uray no parigatendakayo a kas iti inaramid idi dagiti Egipcio.

²⁵Iti saan a mabayag, agpatingganton ti panangdusak kadakayo ket kalpasanna dadaelekto ida.

²⁶Siak, ni Yahweh a Mannakabalin-amin, saplitekto ida a kas iti panangsaplitko kadagiti tattao ti Midian idiay Bato ti Oreb. Pagsagabaekto ti Asiria a kas iti inaramidko iti Egipto.

²⁷Inton dumteng dayta a tiempo, wayawayaankayto iti pannakabalin ti Asiria, ket maikkatton ti sangol nga inkabilda kadagiti tengngedyo.”

²⁸Sinakupen ti armada dagiti kabusor ti siudad ti Aiyat. Nalabsandan ti Migron! Imbatida dagiti gargaretda idiay Mikmas!

²⁹Linasatda ti bessang ket umianda idiay Geba! Mabuteng dagiti tattao iti ili ti Rama ket nagtataray dagiti umili ti Gabaa a nakayanakan ni Ari Saul.

³⁰Agpukkawkayo, dakayo a tattao ti Gallim! Dumngegkayo, dakayo a tattao ti Laisa! Sumungbatkayo, dakayo a tattao ti Anatot!

³¹Agtatalawen dagiti tattao ti Madmena ken Gebim tapno maisalakanda ti biagda.

³²Ita nga aldaw, adda dagiti kabusor iti ili ti Nob ket ilaylayatda dagiti gemgemda iti Bantay Sion, iti siudad ti Jerusalem.

³³Pukanento ida ti Apo a Mannakabalin-amin, kas iti pannakapukan dagiti sangsanga ti kayo. Ipababanto ni Yahweh ti katayagan ken kangatoan kadakuada ket ibabainnanto ida.

³⁴Pukanento ti Apo ida a kas iti panangpukan ti wasay kadagiti kayo iti tengnga ti bakir. Uray dagiti kasayaatan a kayo ti Libano mapukanda!