Read Iloko Isaiah 11 Bible Online

Isaiah 11 - Iloko bible

Isaiah 11

¹Addanto saringit a tumaud iti puon ni Jesse. Manipud iti ramutna, addanto sanga nga agbunga.

²Ti Espiritu ni Yahweh ti mangted kenkuana iti kinasirib, pannakaammo ken kabaelan a mangituray kadagiti tattaona. Maammoannanto ti pagayatan ni Yahweh ket agbuteng kenkuana

³ken maragsakanto iti panagserbina. Saanna nga ibatay ti panangukomna iti makita wenno mangngegna.

⁴Nalintegto ti panangukomna kadagiti napanglaw; salaknibannanto ti kalintegan ti awan gawayna. Agbilinto ket madusa ti daga; matayto dagiti managdakdakes a tattao.

⁵Iturayannanto dagiti tattaona iti kinalinteg ken kinatakneng.

⁶Aglalangento a sikakappia dagiti lobo ken dagiti karnero. Agkakaiddanto dagiti leopardo ken dagiti urbon a kalding. Dagiti urbon a baka ken urbon a leon agkakapangandanto, ket babassitto nga ubbing ti mangaywan kadakuada.

⁷Agkakapanganto dagiti baka ken oso: agkaiddanto a sitatalna dagiti urbonda. Manganto dagiti leon iti garami a kas kadagiti baka.

⁸Ti maladaga awanto ti pakaan-anoanna uray no agay-ayam iti asideg ti karasaen.

⁹Idiay Sion a nasagradoan a bantay ti Dios, awanto ti agdangran wenno agdadael. Kas iti panagsaknap ti danum iti baybay, agsaknapto iti daga ti pannakaammo ken ni Yahweh.

¹⁰Iti dayta nga aldaw, maibayogto ti ramut ni Jesse ket maibilangto a pagilasinan dagiti nasion. Aguummongdanto iti naarian a siudadna ket ipaaydanto ti pammadayaw kenkuana.

¹¹Inton dumteng dayta nga aldaw, aramatento manen ti Apo ti pannakabalinna. Yawidnanto dagiti nakalasat a tattaona a nabati idiay Asiria, Egipto, Patros, Etiopia, Elam, Babilonia, Hamat ken kadagiti pagilian kadagiti igid ti baybay ken kadagiti purpuro.

¹²Mangibayogto ti Apo iti bandera a mangipakita kadagiti nasion nga ummongenna manen dagiti nawarawara a tattao ti Israel ken Juda ket alaenna ida kadagiti amin a suli ti daga.

¹³Saanton nga apalan ti pagarian ti Israel ti Juda ket saanto metten a kabusor ti Juda ti Israel.

¹⁴Agmaymaysadanto a mangraut kadagiti Filisteo iti laud, ket samsamendanto dagiti sanikua dagiti tattao nga agnaed iti daya. Parmekendanto dagiti tattao ti Edom ken Moab ket agtulnogto kadakuada dagiti tattao ti Ammon.

¹⁵Pamagaanto ni Yahweh ti gulfo ti Egipto ket yegnanto ti napudot nga angin a mangpamaga iti Eufrates. Pitonto laeng a babassit a waig ti ibatina tapno makaballasiw dagiti tattao.

¹⁶Addanto nalawa a kalsada nga aggapu idiay Asiria a pagnaan dagiti tattaona nga Israelita a nakalasat sadiay, kas iti kaadda ti dalan a nagnaan dagidi kapuonanda idi pumanawda idiay Egipto.