Read Iloko Isaiah 14 Bible Online

Isaiah 14 - Iloko bible

Isaiah 14

¹Kaasianto manen ti Apo dagiti tattaona nga Israelita ket pagbalinenna ida a kukuana. Pagnaedennanto manen ida iti bukodda a daga. Umayto dagiti ganggannaet ket makipagnaeddanto kadakuada.

²Adunto a nasion ti tumulong kadagiti Israelita nga agsubli iti daga nga inted ti Apo kadakuada ket sadiay, agserbinto dagiti pagilian a kas tagabu ti Israel. Dagiti nangparmek idi kadagiti Israelita, parmekento met dagiti Israelita. Iturayandanto dagiti nangidadanes idi kadakuada.

³Palung-awento ti Apo dagiti Israelita. Ikkatennanto ti saem ken panagsagabada ken ti nadagsen a trabaho a naipabaklay kadakuada.

⁴Inton aramidenna daytoy, rabrabakendanto ti ari ti Babilonia ket kunada: “Napasagen ti naranggas nga ari! Saannanton a parigaten ti siasinoman!

⁵Ginibusan ti Apo ti bileg dagiti nadangkok nga agturay

⁶a sipupungtot a nangidadanes kadagiti tattao ket dida insardeng ti panangparigatda kadagiti nasion a pinarmekda.

⁷Ita, adda met laengen talna ken kappia iti entero a daga ket agkanta a siraragsak ti tunggal tao.

⁸Agragsak uray dagiti parwa ken dagiti sedro ti Libano gapu ta napasagen ti ari ket awanen ti mangpukan kadakuada!

⁹“Agsagsaganan ti lubong dagiti natay a mangpasangbay iti ari ti Babilonia. Agriing dagiti natay a nabileg nga agturay idi iti daga. Bumangbangon dagiti natay nga ari kadagiti tronoda.

¹⁰Agmaymaysada amin a mangipukkaw kenkuana, ‘Ita, agpapadatayon a nakapuy. Maysakan kadakami!

¹¹Mararaemka idi ket toktokarandaka kadagiti arpa, ngem ita, addakan iti lubong dagiti natay! Dagitinto sur-it ti pagiddaam ket dagitinto igges ti inka pagules!’”

¹²Sika, ari ti Babilonia, sika a baggak ti agsapa, anian a pannakatnagmo! Pinarmekmo idi dagiti nasion, ngem ita naidasaykan iti daga.

¹³Inkeddengmo ti umuli sadi langit tapno ipasdekmo ti tronom iti ngatoen dagiti kangatoan a bituen. Impagarupmo nga agtugawka a kas maysa nga ari iti dayta a bantay iti amianan a paguummongan dagiti didiosen.

¹⁴Imbagam nga umulika iti tapaw dagiti ulep ket agbalinka a kas iti Mannakabalin-amin.

¹⁵Ngem naipababaka ketdi iti kaunggan a paset ti lubong dagiti natay.

¹⁶Mulagatandakanto dagiti natay ket masdaawdanto iti napasamak kenka. Saludsodendanto, “Daytoy kadi daydi nanggunggon iti daga ken namagtigerger kadagiti pagarian?

¹⁷Daytoy kadi ti nangdadael kadagiti siudad ken namagbalin a let-ang ti lubong? Daytoy kadi daydi saan a nangwayawaya kadagiti baludna wenno nangpagawid kadakuada?”

¹⁸Naikabil kadagiti napintas a tanem ti bangkay dagiti amin nga ari ti daga

¹⁹ngem saanka a naitanem ket naiwalang ti bangkaymo a nabaybay-an nga agrupsa. Nagaburan ti bangkaymo kadagiti bangkay dagiti soldado a napapatay iti paggugubatan. Nairaman kadagiti bangkayda a naipurruak iti abut a kabatbatoan, ket mapayatpayatan.

²⁰Gapu ta dinadaelmo ti pagilian ket pinataymo dagiti bukodmo a tattao, dikanto maitanem a kas kadagiti dadduma nga ari. Awanto ti makalasat iti managdakdakes a familiam.

²¹Irugiyo ti panagpapatay! Matayto dagiti annak daytoy nga ari gapu kadagiti basol dagiti kapuonanda. Awanto kadakuada ti agturay iti lubong wenno agbangon kadagiti siudad a mangpunno iti daga.

²²Kuna ti Apo a Mannakabalin-amin, “Darupek ti Babilonia ket dadaelek a mamimpinsan. Awan ti ibatik uray maysa—awan uray dagiti ubbing. Awanto a pulos ti makalasat. Siak, ni Yahweh, ti nangibaga iti daytoy.

²³Pagbalinekto ti Babilonia a kadandanuman a daga ket agnaedto sadiay dagiti kullaaw. Sagadakto ti Babilonia agingga a maikkat ti amin kenkuana. Siak, ni Yahweh a Mannakabalin-amin, ti nangibaga iti daytoy.”

²⁴Insapata ti Apo a Mannakabalin-amin: “Matungpal a matungpal ti inkeddengko nga aramiden. Awan duadua a mapasamak ti inkeddengko a maaramid.

²⁵Dadaelekto dagiti taga-Asiria nga adda iti dagak nga Israel ket payatpayatek ida kadagiti bantayko. Wayawayaakto dagiti tattaok iti panangtagabu dagiti Asirio kadakuada. Ikkatekon dagiti nadagsen nga awitda.

²⁶Daytoy ti panggepko nga agpaay iti sangalubongan ket nailayat ti imak a mangdusa kadagiti nasion.”

²⁷Sisasagana ti Apo a Mannakabalin-amin a mangaramid iti daytoy. Silalayat ti imana ket awan ti makapasardeng kenkuana a mangdusa.

²⁸Daytoy ti mensahe a naipakaammo iti tawen nga ipapatay ni Ari Ahaz.

²⁹Tattao ti Filistia, dikay agragsak gapu ta natukkolen ti sarukod a nangpang-or kadakayo. Ngamin, no matay ti maysa nga uleg, sumukat ti dakdakes. No agpessa ti itlog iti uleg, agbalin a nauyong a karasaen!

³⁰Agbalinto ti Apo a pastor dagiti napanglaw a tattaona ket agbiagdanto a sitatalged. Ngem idissuornanto kadakayo, dakay a Filisteo, ti nakaro a bisin a mangikisap a mamimpinsan kadakayo.

³¹Agdung-awkayo ket umawagkayo iti tulong, dakay amin a siudad dagiti Filisteo! Agbutengkayo, dakayo amin! Adda umalipugpog a tapok nga aggapu iti amianan—maysa nga armada a pasig a natutured dagiti kamengna.

³²Anianto ti isungbatmi kadagiti naibaon a naggapu idiay Filistia? Ibagaminto kadakuada nga impasdek ti Apo ti Sion ket natalgedton sadiay dagiti agsagsagaba a tattaona.