Read Iloko Isaiah 16 Bible Online

Isaiah 16 - Iloko bible

Isaiah 16

¹Manipud iti siudad ti Sela iti let-ang, nangibaon dagiti taga-Moab kadagiti mapan idiay Jerusalem tapno ipanda dagiti urbon a karnero a sagutda iti agturay sadiay.

²Agur-uray dagiti tattao ti Moab iti igid ti Karayan Arnon ket agpagnapagnada. Kasda la billit a nabugaw kadagiti umokda.

³Kunada kadagiti tattao ti Juda, “Ibagayo ti aramidenmi. Salaknibandakami a kas iti kayo a mangted iti nalamiis a linong iti agmatuon ket paginanaendakam iti sirokyo. Pimmanawkam iti ilimi. Ilemmengdakami koma iti lugar nga awan ti makasarak kadakami.

⁴Pagnaedendakam iti dagayo. Salaknibandakami kadagiti agpanggep a mangdadael kadakami.” (Agpatingganto ti panagidadanes ken panagdadael ket awanton dagiti mangdaddadael iti pagilian.

⁵Kalpasanna, agarinto ti maysa kadagiti kaputotan ni David. Napudno ken napnoanto iti ayat ti panangiturayna kadagiti tattao. Dagdagusennanto nga ipakat ti kinalinteg ket ikagumaannanto a maipagna ti hustisia.)

⁶Kuna dagiti tattao ti Juda, “Nadamagmi ti kinatangsit dagiti tattao ti Moab. Ammomi a napalangguad ken napasindayagda ngem awan serserbi ti panagpangasda.”

⁷Agdung-awto dagiti tattao ti Moab gapu kadagiti didigra a sagabaenda. Agsasangitdanto amin inton malagipda dagiti naimas a taraon a kinkinnanda idi addada iti siudad ti Kir Heres. Mapukawdanto a mamimpinsan ti namnamada.

⁸Nadadael dagiti talon iti asideg ti Hesbon ken dagiti kaubasan ti Sibma—dagiti kaubasan a nagtaudan ti arak a nangbarbartek kadagiti agtuturay dagiti nasion. Adda idi tiempo a dagiti lanut ti ubas nagwarasda a nagpadaya agingga iti siudad ti Jazer ken iti let-ang ket nagpalaud agingga iti ballasiw ti Natay a Baybay.

⁹Ita, sangitak dagiti ubas ti Sibma a kas iti panangsangitko iti Jazer. Agarubos dagiti luak gapu iti Hesbon ken Eleale, ta awanen ti maapit a mangparagsak kadagiti tattao.

¹⁰Awanen ti naragsak a tao kadagiti nadam-eg a talon. Awanen ti agdidir-i wenno agkakanta kadagiti kaubasan. Awanen ti agpespes iti ubas a maaramid nga arak. Nagpatinggan dagiti dir-i ti ragragsak.

¹¹Aguga-ogak gapu iti ladingitko iti Moab ken iti Kir Heres.

¹²Bambannogen laeng dagiti taga-Moab ti bagbagida a mapan agkararag kadagiti bantay a pagdaydayawanda ken kadagiti temploda, ta awanto ti magangganabda.

¹³Kasta ti immuna a pakdaar ti Apo maipapan iti Moab.

¹⁴Ngem ita, kunana, “Kalpasan ti tallo a tawen, mapukawton ti adu a kinabaknang ti Moab. Kadagiti adu a tattaona, manmanonto laeng ti makalasat ket nakapsutdanto.”