Read Iloko Isaiah 18 Bible Online

Isaiah 18 - Iloko bible

Isaiah 18

¹Iti labes dagiti karayan ti Etiopia, adda pagilian a pakangngegan iti banerber dagiti payak.

²Manipud iti dayta a daga, maibaon dagiti embahador a nakalugan kadagiti bilog a naaramid iti runo ket aglayagda iti Karayan Nile. Agsublikayo, dakayo a napardas a babaonen, iti dagayo a biningay dagiti karayan. Yawidyo ti maysa a mensahe a maiturong iti napigsa ken nabileg a nasionyo, kadagiti natatayag ken nalinis ti kudilna a kailianyo a pagbutbutngan ti entero a lubong.

³Dumngegkayo, dakay amin nga agnaed iti lubong, dakay amin nga agnaed iti daga! Kitaenyo ti bandera a maibayog iti tapaw dagiti bantay! Denggenyo ti aweng ti trumpeta!

⁴Kinuna ni Apo kaniak, “Manipud langit, tumannawagak a siuulimek a kas iti pudot ti dumardarang nga init iti agmatuon wenno ulep ti linnaaw iti nadagaang a panagapit.”

⁵Sakbay ti pannakaburas dagiti ubas, kalpasan ti pannakaregreg dagiti amin a sabongna ket maluluomen dagiti bunga, kumpayennanto dagiti uggot ken dagiti narangpaya a sanga.

⁶Mabaybay-andanto nga agpaay a kanen dagiti tumatayab ken atap nga animal kadagiti bantay. Iti kalgaw, kanento dagiti tumatayab ida ket iti tiempo ti lam-ek, bumaginto met dagiti animal.

⁷Dumtengen ti tiempo nga umawat ti Apo a Mannakabalin-amin kadagiti sagut nga aggapu iti daytoy a daga, a biningay dagiti karayan, daytoy napigsa ken nabileg a nasion, dagitoy natatayag ken nalinis ti kudilna a tattao a pagbutbutngan ti entero a lubong. Umaydanto iti Bantay Sion a pakadaydayawan ni Yahweh a Mannakabalin-amin.