Read Iloko Isaiah 19 Bible Online

Isaiah 19 - Iloko bible

Isaiah 19

¹Daytoy ti pakdaar maipapan iti Egipto. Mapan ti Apo idiay Egipto. Napardas ti ulep a paglugananna. Agtigerger dagiti didiosen ti Egipto iti imatangna, ket tumakrot dagiti Egipcio.

²Kuna ti Apo, “Pataudek ti riribuk idiay Egipto. Agbibinnusorto dagiti agkakabsat ken dagiti agkakaarruba. Aggugubatto dagiti siudad ket pagiinnagawanto dagiti ari ti turay.

³Paayekto ti panggep dagiti taga-Egipto ket dadaelekto ti tured ti pakinakemda. Agpatulongdanto kadagiti didiosenda. Makiumandanto kadagiti mammuyon ket pabagbagaandanto kadagiti espiritu dagiti natay.

⁴Yawatkonto dagiti Egipcio iti naranggas a tao ket iturayanto ida ti nauyong nga ari.” Daytoy ti sao ti Apo a Mannakabalin-amin.

⁵Umababawto ti Karayan Nile ket mangin-inutto nga agmaga.

⁶Mabungsotto dagiti pagayusan ti karayan bayat ti in-inut a panages-esna. Malaylayto dagiti runo ken tanubong.

⁷Magangonto amin a mulmula iti igid ti Karayan Nile ket mayangindanto.

⁸Agasug ken agsangitto dagiti mangngalap nga agbibiag babaen iti panagkalkalapda iti karayan. Awanto ti serserbi dagiti banniit ken iketda.

⁹Mapukawto ti namnama dagiti agab-abel iti lupot a linen.

¹⁰Lumdaang ken agladingitto dagiti umaabel ken nalaing nga agtrabaho.

¹¹Maag dagiti papangulo iti siudad ti Zoan! Minamaag ti balakad dagiti mamasirib iti Egipto. Ania ket a tureddan a mangibaga iti ari nga isuda ti timmawid iti laing dagiti mamasirib ken dagiti ari!

¹²Sika nga ari ti Egipto, sadino ti ayan dagiti mamasirib a mamagbaga kenka? Nalabit a maibagada kenka ti plano ti Apo a Mannakabalin-amin maipapan iti Egipto.

¹³Maag dagiti papangulo ti Zoan ken Memfis. Rumbeng nga isuda ti mangidalan iti nasion ngem isuda ketdi ti nangyaw-awan.

¹⁴Aramid ti Apo ti pannangtedda kadagiti balakad a mangyaw-awan. Gapu iti daytoy, pasig a dakes ti aramid ti Egipto. Agibar-ibar a kas iti nabartek. Mabaddekanna ti saruana ket maikaglis.

¹⁵Awan a pulos ti maaramid ti Egipto, nabaknang man wenno napanglaw, nanumo man wenno natan-ok.

¹⁶Dumtengen ti tiempo a tumakrot a kasla babbai dagiti tattao ti Egipto. Agtigergerdanto iti buteng inton makitada ti Apo a Mannakabalin-amin a mangilayat iti imana a pangdusa kadakuada.

¹⁷Tunggal malagipda ti Juda, agtigergerdanto iti buteng ket malagipda met ti kinadaksanggasat nga insagana ti Apo a Mannakabalin-amin nga agdissuor kadakuada.

¹⁸Inton dumteng dayta a tiempo, Hebreo ti maaramatto a pagsasao iti lima a siudad ti Egipto. Agsapatanto dagiti tattao sadiay iti nagan ti Apo a Mannakabalin-amin. Maysanto kadagiti siudad ti maawagan iti “Siudad ti Init.”

¹⁹Inton dumteng dayta a tiempo, addanto altar a maidaton iti Apo iti daga ti Egipto. Addanto met nasagradoan nga adigi a naikonsagrar kenkuana iti beddeng ti Egipto.

²⁰Agserbinto dagitoy a pakakitaan iti kaadda ti Apo a Mannakabalin-amin idiay Egipto. Inton maparparigat dagiti tattao sadiay ket agpatulongda iti Apo, mangibaonto iti mangispal kadakuada.

²¹Ipakaammonto ti Apo ti kinasiasinona kadagiti Egipcio ket bigbigen ken agdaydayawdanto kenkuana. Agidatagdanto kenkuana kadagiti sakrifisio ken daton. Agsapatadanto kenkuana ket tungpalendanto ti karida.

²²Dusaento ni Yahweh dagiti Egipcio ngem paimbagennanto met la ida. Agsublidanto kenkuana ket ipangagnanto dagiti kararagda ken paimbagennanto ida.

²³Inton dumteng dayta a tiempo, addanto dakkel a kalsada nga aggapu iti Egipto nga agturong idiay Asiria. Makapanto dagiti taga-Asiria idiay Egipto ket makapanto met dagiti taga-Egipto idiay Asiria. Agmaymaysanto dagiti dua a nasion iti panagdaydayawda.

²⁴Inton dumteng dayta a tiempo, maipadanto ti Israel iti Egipto ken Asiria. Agbalinto dagiti tallo a nasion a bendision iti entero a daga.

²⁵Bendisionanto ti Apo a Mannakabalin-amin ida. Kunananto, “Bendisionanka, Egipto, dakayo a tattaok; sika, Asiria, a pinarsuak; ken sika, Israel, a pinilik a tattaok.”