Read Iloko Isaiah 2 Bible Online

Isaiah 2 - Iloko bible

Isaiah 2

¹Daytoy ti mensahe ti Dios nga impakaammona ken ni Isaias nga anak ni Amoz maipapan iti Juda ken Jerusalem:

²Kadagiti masakbayan nga aldaw, ti bantay a nakabangonan ti Templo isunto ti kangatoan, rimbawanna dagiti katurturodan. Adunto dagiti nasion a mapan kenkuana

³ket kunanto dagiti tattaoda, “Sumang-attayo iti bantay ti Apo, intayo iti Templo ti Dios ti Israel. Isuronatayo ti kayatna nga aramidentayo; magnatay iti dalan a pinilina. Aggapu iti Jerusalem ti pannursuro ti Apo; manipud Sion agsao kadagiti tattaona.”

⁴Agtugawto a kas ukom dagiti nasion ket risutennanto ti parikut dagiti adu a tattao. Pandayendanto nga arado dagiti kampilanda, pagbalinendanto a kumpay dagiti pikada. Saanton nga aggugubat dagiti pagilian, saandanton nga agsagana a makigubat.

⁵Ita, dakayo a kaputotan ni Jacob, magnatay iti lawag nga ited kadatayo ti Apo!

⁶O Dios, binaybay-am dagiti tattaom, isuda a kaputotan ni Jacob! Nagsaknap iti daga ti panagsalsalamangka a naggapu iti Daya. Agbuybuyonda a kas kadagiti taga-Filistia. Tultuladen dagiti tattao ti ugali dagiti ganggannaet.

⁷Napno ti dagada iti pirak ken balitok ket saan nga agpatingga dagiti gamengda. Iti entero a dagada, adu ti kabalio ket saan a mabilang dagiti luganda a pakigubat.

⁸Napno ti dagada kadagiti imahen, ket agdaydayawda kadagiti banag nga inaramidda.

⁹Maibabain ken maipababanto ti tunggal maysa. Dimo pakawanen ida, O Apo.

¹⁰Aglemmengdanto kadagiti rukib kadagiti kabatoan a turod wenno agkalida iti abut iti daga tapno maliklikanda ti pungtot ni Yahweh ken iti pannakabalin ken dayagna!

¹¹Dumtengto ti aldaw nga agpatingga ti kinapalangguad ti tao ken mapukaw ti kinatangsitna. Ninto laeng Yahweh ti maitan-ok.

¹²Iti dayta nga aldaw, ipababanto ni Yahweh a Mannakabalin-amin dagiti natangsit, dagiti napalangguad ken dagiti tattao a ti laeng bagida ti talkenda.

¹³Dadaelennanto dagiti natayag a sedro ti Libano ken amin a lugo iti daga ti Basan.

¹⁴Palanasennanto dagiti nangangato a bantay ken turod.

¹⁵Rebbaennanto dagiti nangato a pagwanawanan ken dagiti bakud dagiti sarikedked.

¹⁶Palnedennanto uray dagiti kadakkelan ken kapintasan a barko.

¹⁷Aggibuston ti kinatangsit ken kinapalangguad ti tao. Iti dayta nga aldaw, awanton dagiti imahen ket ninto la Yahweh ti maitan-ok.

¹⁹Agkamangto dagiti tattao kadagiti rukib iti katurturodan wenno agkalida kadagiti abut iti daga tapno maliklikanda ti pungtot ni Yahweh wenno mailemmenganda ti pannakabalin ken dayagna inton umayna gunggonen ti daga.

²⁰Inton dumteng dayta nga aldaw, ibellengdanto dagiti balitok ken pirak nga inaramidda a didiosenda ket bay-anda ida kadagiti marabutit ken kurarapnit.

²¹Inton umay gunggonen ni Yahweh ti daga, agkamangto dagiti tattao kadagiti abut ken rukib kadagiti katurturodan tapno maliklikanda ti pungtot ni Yahweh wenno mailemmenganda ti pannakabalin ken dayagna.

²²Dika agtalek iti tao ta ania aya ti pannakabalinna?