Read Iloko Isaiah 20 Bible Online

Isaiah 20 - Iloko bible

Isaiah 20

¹Babaen iti bilin ni Emperador Sargon ti Asiria, rinaut ti kangatoan nga ofisial ti armada ti Asiria a siudad ti Asdod idiay Filistia ket pinarmekna.

²Tallo a tawen sakbay daytoy, imbilin ni Yahweh ken ni Isaias nga anak ni Amoz nga uksobenna ti nakersang a lupot a pagan-anayna, ken ikkatenna ti sandaliasna. Nagtungpal ni Isaias ket naglamolamo ken nagsakasaka.

³Idi naparmeken ti Asdod, kinuna ni Yahweh, “Tallo a tawenen a lamolamo ken sakasaka ni Isaias nga adipenko. Daytoy ti pagilasinan iti mapasamakto iti Egipto ken iti Etiopia.

⁴Ipanawto ti emperador ti Asiria dagiti Egipcio ken dagiti taga-Etiopia a matiliwna a kas balud. Lamolamo ken sakasakanto dagiti matiliwna a balud kadagitoy dua a nasion. Ubbing man wenno lallakay, magnadanto a sakasaka ken lamolamo a makitkita dagiti ilemlemmengda ket pakaibabainanto daytoy ti Egipto.

⁵Maupay ken mariribukto dagiti nagtalek iti Etiopia ken nangitangtangsit iti Egipto.

⁶Inton dumteng dayta a tiempo, kunanto dagiti agnaed iti igid ti baybay ti Filistia, ‘Kitaenyo ti napasamak kadagiti nagtaltalkantayo a mangispal kadatayo iti pannakabalin ti emperador ti Asiria! Makalasattayo pay ngata?’”