Read Iloko Isaiah 22 Bible Online

Isaiah 22 - Iloko bible

Isaiah 22

¹Daytoy ti pakdaar maipapan iti Tanap ti Parmata. Ania kadi ti mapaspasamak? Apay nga immulikayo kadagiti tuktok dagiti balbalay?

²Kumaribuso ti entero a siudad. Umariwawa dagiti tattao. Dagiti soldadom a natay saanda a natay iti kampilan wenno napasag iti paggugubatan.

³Nagtataray dagiti amin a pangulom ket natiliwda sakbay nga adda imbiatda a pana.

⁴Ita, dakayo a tattao, bay-andak nga agsangit iti nasaem. Didak liwliwaen ta adu ti natay kadagiti tattaok.

⁵Tiempo ita ti panagbuteng, pannakaparmek ken pannakariribuk iti Tanap ti Parmata, ket ti Dios, ti Apo Dios a Mannakabalin-amin, ti nangibaon kadagitoy nga umay kadatayo. Narban dagiti bakud ti siudadtayo, ket dagiti ikkis dagiti tattao nga agpatulong nagallangogan kadagiti turturod.

⁶Immay dagiti mannakigubat a taga-Elam. Sikakabalio ken nakaarmasda kadagiti pana. Sisasagana dagiti kalasag dagiti soldado a naggapu iti daga ti Kir.

⁷Napno dagiti nadam-eg a tanap ti Juda kadagiti lugan a pakigubat, ket dagiti soldado a sikakabalio nagyanda iti sangoanan dagiti ruangan ti Jerusalem.

⁸Narban dagiti amin a sarikedked ti Juda. Idi napasamak dayta, inruarmo dagiti armasmo iti nakaidulinanda.

⁹Nasarakam dagiti paset dagiti bakud ti Jerusalem a masapul a matarimaan. Binilangmo dagiti balbalay iti Jerusalem ket rinakrakmo dagiti dadduma a balay tapno alaem dagiti batoda a pangtarimaan kadagiti bakud ti siudad. Tapno makaurnongka iti danum iti uneg ti siudad,

¹¹nangaramidka iti tangke iti uneg ti siudad tapno adda pagurnongan iti danum nga aggapu iti daan a waig. Ngem dimo inkankano ti Dios a nangplano kadagitoy iti nabayagen a tiempo, ken nangaramid iti daytoy.

¹²Ay-ayabannakay idi ti Apo Dios a Mannakabalin-amin tapno agsangit ken agdung-awkayo, kuskosanyo dagiti uloyo ken agarruatkayo iti nakersang a lupot.

¹³Ngem nagkakatawakayo ken nagrarambakkayo ketdi. Nagpartikayo kadagiti karnero ken baka a sindayo, ket nagiinumkayo iti arak. Kinunayo, “Mangan ken uminumtayo ketdi, ta inton bigat mataytayo.”

¹⁴Kinuna kaniak ti Apo Dios a Mannakabalin-amin, “Saan a mapakawan daytoy a kinadakesda bayat ti panagbiagda.” Daytoy ti sao ti Apo Dios a Mannakabalin-amin.

¹⁵Imbaonnak ti Apo Dios a Mannakabalin-amin a mapan ken ni Sebna a mayordomo iti balay ti ari tapno ibagak daytoy kenkuana:

¹⁶“Ania ti pangipagarupam iti bagim? Apay a nagkalika iti bukodmo a tanem iti bakras ti kabatoan a turod?

¹⁷Mabalin a nalatakka a tao, ngem pidutennakanto ti Apo ket ipurruaknakanto iti adayo.

¹⁸Pidutennakanto a kas iti bola sanaka ipurruak iti dakdakkel a pagilian. Mataykanto sadiay, iti abay dagiti lugan a pakigubat a pinagtangtangsitmo. Sika ti pakaibabainan ti familia ni apom.

¹⁹Ipababanakanto ti Apo. Ikkatennakanto iti nangato a saadmo.”

²⁰Kinuna ti Apo ken ni Sebna, “Inton mapasamak dayta, paayabakto ni adipenko nga Eliakim nga anak ni Hilkias.

²¹Ikaweskonto kenkuana ti kawesmo a kas ofisial ket ibarikeskonto kenkuana ti barikesmo. Itedkonto kenkuana ti amin a pannakabalin nga adda idi kenka. Isunto ti pannakaama dagiti tattao iti Jerusalem ken iti Juda.

²²Itedkonto kenkuana ti naan-anay a turay iti babaen ti ari a kaputotan ni David. Addanto kenkuana dagiti tulbek ti ofisina. Aniaman a luktanna, awan ti makaiserra. Aniaman a serraanna, awan ti makalukat.

²³Ipatakderkonto a kas iti natibker a pasok, ket isunto ti pakaidayawan ti entero a familiana.

²⁴“Ngem agbalinto a dadagsenna dagiti amin a kakabagian ken familiana. Agbitindanto kenkuana a kas kadagiti banga ken malukong a nakabitin iti pasok.

²⁵Inton mapasamak dayta, lumukayto ti pasok a natibker ti pannakaipalokna ket matuang. Daytanto ti kanibusanan ti amin a naibitin kenkuana.” Daytoy ti imbaga ti Apo.