Read Iloko Isaiah 24 Bible Online

Isaiah 24 - Iloko bible

Isaiah 24

¹Dadaelento ti Apo ti daga ket baybay-annanto nga aglangalang. Gusogusoennanto ti rabaw ti daga ket warawaraennanto dagiti tattaona.

²Agpapadanto ti pagtungpalan ti tunggal maysa—dagiti papadi ken dagiti tattao, dagiti tagabu ken dagiti appoda, dagiti aggatgatang ken dagiti agtagtagilako, dagiti agpapautang ken dagiti umut-utang.

³Madadaelto ti daga ket aglangalang. Insao daytoy ti Apo ket matungpalto.

⁴Agmaga ti daga ket agtikag. Agangrag ken aglaylay ti lubong. Agpada nga agkapsut ti langit ken daga.

⁵Tinulawan dagiti tattao ti daga gapu ta sinalungasingda dagiti linteg ti Dios ket dida nagtungpal iti agnanayon a tulag.

⁶Iti kasta, adda lunod a mangdadael iti daga, ket agsagsagaba dagiti tattao gapu iti kinadakesda. Bassit dagiti matda a sibibiag.

⁷Malaylay dagiti ubas, ket kumirang ti arak. Naladingiten dagiti amin a naragsak idi,

⁸ket nagsardengen dagiti naragsak a tokar dagiti arpa ken tamborda.

⁹Awanen dagiti naragsak a kankanta no adda agiinum iti arak. Saanen a naimas ti arak.

¹⁰Nariribuk ken awan urnos ken talna iti siudad. Imbalunet dagiti tattao dagiti balbalayda tapno awan ti makastrek.

¹¹Agpukpukkaw dagiti tattao kadagiti kalsada gapu ta awanen ti arak. Napukawen a namimpinsan ti ragragsak iti daga.

¹²Narba ti entero a siudad, ket narakraken dagiti ruanganna.

¹³Kastoyto ti mapasamak iti amin a pagilian iti entero a lubong. Kaslanto iti pannakalpas a mawagwag dagiti bunga ti olibo iti tunggal kayo ken maburas ti maudi nga ubas iti puonna.

¹⁴Agkantanto dagiti nakalasat gapu iti ragsakda. Manipud iti Laud, itan-okdanto ti Apo,

¹⁵ket idaydayawto met dagiti adda iti Daya. Idaydayawto dagiti tattao nga agnaed iti igid ti baybay ni Yahweh a Dios ti Israel.

¹⁶Manipud iti kaadayoan a paset ti lubong, mangngegtayto dagiti kanta a pangidaydayaw iti Israel, ti nalinteg a nasion. Ngem awan ti pangnamnamaak! Kaslaak la marunrunot a kandela! Ngamin, dumegdeg a dumegdeg ti panangliput dagiti traidor!

¹⁷Dumngegkayo, dakayo nga agnaed ditoy daga. Adda dagiti pagbutngan, palab-og, abut ken bateng nga agur-uray kadakayo.

¹⁸Ti agpanggep a mangliklik iti pagbutngan, matnagto iti abut. Ti makalisi iti abut, matiliwto iti palab-og. Maibuyatto manipud langit ti bumayakabak a tudo ket madayyegto dagiti fondasion ti daga.

¹⁹Agrenggat ken agungapto ti daga, ket agpisi.

²⁰Kas iti nabartek, agibar-ibarto ti daga ket agpallayogto a kas iti kalapaw iti tiempo ti bagio. Gapu iti dagsen dagiti basol a bakbaklayenna, marsuodto ti lubong ket pulos a dinton bumangon.

²¹Iti dayta nga aldaw, dusaento ti Apo dagiti pannakabalin iti ngato ken dagiti agtuturay iti daga.

²²Ipisokto ti Dios dagiti ar-ari a kas kadagiti balud iti uneg ti abut. Ipupoknanto ida iti pagbaludan agingga a dumteng ti tiempo a pannakadusada.

²³Agsipngetto ti bulan ket saanton nga aglawag ti init, agsipud ta agarinton ti Apo a Mannakabalin-amin. Agturayto idiay Jerusalem, iti Bantay Sion, ket makitanto dagiti pangulo dagiti tattao ti dayagna.