Read Iloko Isaiah 25 Bible Online

Isaiah 25 - Iloko bible

Isaiah 25

¹O Apo, sika ti Diosko; itan-okka ket idaydayawko ti naganmo. Nakaskasdaaw dagiti inaramidmo; sipupudnoka a nangtungpal kadagiti planom idi un-unana nga aldaw.

²Rinebbam dagiti siudad, ket rinippuogmo dagiti sarikedkedda. Awanen dagiti palasio a binangon dagiti kabusormi.

³Idaydayawdakanto dagiti nabileg a pagilian; kabutengdakanto dagiti naranggas a nasion.

⁴Nagkamang kenka dagiti napanglaw ken nakakaasi, ket awan nakaan-anoanda iti tiempo ti riribuk. No agbagio, ikkam ida iti salinongda, ket iti makasinit a pudot, linongam ida. Dumarup dagiti naranggas a tattao a kasla bagio iti tiempo ti lam-ek,

⁵ken kas tikag iti namaga a daga. Ngem pinagulimekmo dagiti kabusormi, O Apo; pasardengem dagiti pukkaw ti naranggas a tattao, kas iti panangpalammiis ti ulep iti napudot nga aldaw.

⁶Ditoy Bantay Sion, mangisagananto ti Apo a Mannakabalin-amin iti padaya nga agpaay kadagiti amin a nasion ditoy lubong. Maidasarto dagiti agkakabaknang a taraon ken agkakaimas nga arak.

⁷Iti daytoy a bantay, ikkatennanto ti ulep ni ladingit nga adda iti ngatoen dagiti amin a nasion.

⁸Pukawennanto ti Apo a Dios ni patay iti agnanayon! Punasennanto amin a lua ti tunggal maysa ket ikkatennanto ti pakaibabainan a sinagaba dagiti tattaona iti sangalubongan. Ti Apo a mismo ti nagsao.

⁹Inton mapasamak daytoy, kunanto ti tunggal maysa, “Isu ti Diostayo! Nagtalektayo kenkuana ket inispalnatayo. Isu ti Apo. Nagtalektayo kenkuana. Naragsak ken napnoantayo iti rag-o agsipud ta insalakannatayo!”

¹⁰Salaknibanto ti Apo ti Bantay Sion, ngem maibaddebaddekto dagiti tattao ti Moab a kas iti pannakaibaddebaddek ti garami iti takki.

¹¹Ikagumaandanto ti maispal a kasda la aglanglangoy, ngem ipababanto ida ti Dios ket saanto a makagunay dagiti imada.

¹²Rebbaento ti Apo dagiti sarikedked ti Moab agraman dagiti nangato a bakudna ket tuangennanto ida iti tapok.