Read Iloko Isaiah 28 Bible Online

Isaiah 28 - Iloko bible

Isaiah 28

¹Asi pay ti pagarian ti Israel! Agkupkupasen ti dayagna a kas iti pintas dagiti sabong a korona dagiti nabartek a pangulona. Nasayaat ti pannakabangbanglo dagiti natangig nga uloda ngem addada sadiay a napasag gapu iti nakaro a pannakabartekda.

²Adda nabileg ken mannakabalin nga isagsagana ti Apo a mangdarup kadakuada. Umayto a kas kadagiti agtinnag a yelo, kas iti bumayakabak a tudo, kas iti napegges ken nadawel a layus a manglapunos iti daga.

³Maibaddebaddekto ti kinatangsit dagita nabartek a papangulo.

⁴Awanton ti agpukpukaw a dayag dagita natangsit a pangulo. Mayarigdanto kadagiti umuna a bunga ti igos a mapuros ken makan apaman nga agluomda.

⁵Dumtengen ti aldaw nga agbalinto ti Apo a Mannakabalin-amin a kas nadayag a korona a sabsabong kadagiti makalasat a tattaona.

⁶Ikkannanto dagiti ukom iti sirib tapno nalinteg ti ipaulogda a sentensia. Paturdennanto dagiti guardia tapno maparmekda dagiti kabusor a mangraut kadagiti ruangan ti siudad.

⁷Kasta unay met ti bartek dagiti profeta ken dagiti papadi ket urayda la maibasbasing. Gapu iti adu nga arak a nainumda, urayda la maitiktikleb a dida ammo ti ar-aramidenda. Kasta unay ti bartek dagiti profeta, isu a dida maawatan dagiti parmata nga ipakita ti Dios. Nabartek met dagiti papadi ket dida maibanag dagiti kaso a maidatag kadakuada.

⁸Agkaiwara ti sarua kadagiti lamisaan ket awan ti paset a nadalus.

⁹Kastoy ti kunkunada a maibusor kaniak: “Siasino ti ipagarup dayta a tao nga isursurona? Siasino ti makasapul iti mensahena? Agpaay laeng kadagiti kapuspusot a maladaga!

¹⁰Padpadasennatayo nga isuro iti tunggal letra, tunggal linia, tunggal leksion.”

¹¹No didak ipangag, aramaten ti Dios dagiti tattao a ganggannaet ti pagsasaoda a mangisuro kadakayo.

¹²Indiayana kadakay amin ti inana ken liwliwa ngem diyo impangag.

¹³Daytoy ti gapuna nga isuronakayo ti Apo iti tunggal letra, tunggal linia, tunggal leksion. Iti kasta, matuangkayto tunggal magnakayo. Masugatankayto, maipalab-ogkayto ket matiliwkayto a maibalud.

¹⁴Ita, dakayo a natangsit nga agtuturay ditoy Jerusalem, a mangituray kadagitoy a tattao, denggenyo ti ibagbaga ti Apo.

¹⁵Ipalpalangguadyo a nakitulagkayo ken ni patay ket adda nagnunumoanyo iti lubong dagiti natay. Mangnamnamakayo a dikayto maan-ano inton dumteng ti didigra, gapu ta agtalekkayo kadagiti ulbod ken allilaw tapno maispalkayo.

¹⁶Ita, kastoy ti sao ni Apo Dios: “Mangikabilak iti Sion iti natibker ken nalagda a fondasion. Isaadko ti natangken a pasuli a bato a pakaisuratan dagitoy a balikas, ‘Naanus ti addaan iti natibker a pammati.’

¹⁷Kinalintegto ti pagrukodan ti fondasion ket ti kinapudno ti agserbi a tinnagna.” Bagio ken layus ti mangyanudto iti amin a kinaulbod a talged ken kamangyo.

¹⁸Mawaswasto ti nagtutulaganyo iti patay ket mapunasto ti nagnunumoanyo iti lubong dagiti natay. Inton dumteng ti didigra, maparukmakayto.

¹⁹Ulit-ulitennakayto a pagsagabaen ket binigatto nga agsubli. Aldaw ken rabii a masapul nga ibturanyo ti ipalak-amna. Tunggal adda ipakaammo ti Dios, yegna ti baro a panagbuteng.

²⁰Ngamin, mapasamakto kadakayo ti kunkuna ti pagsasao: At-atiddog ti agidda ngem ti pagiddaan, basbassit ti ules ngem ti agules.

²¹Ta kas iti inaramidna idiay Bantay Perazim ken iti tanap ti Gabaon, tumakderto ti Apo a mangiparikna ti pungtotna tapno ibanagna ti panggepna nga aramiden, uray no kasla naidumduma ti aramidna. Leppasennanto ti trabahona ket nakaskasdaawto dayta a trabaho.

²²Diyo katawaan ti iballaagko kadakayo. No katawaanyo, narigrigatto pay ti panaglisiyo. Nangngegko ti pangngeddeng ti Apo a Mannakabalin-amin: dadaelenna ti entero a pagilian.

²³Denggenyo ti sasawek. Ipangagyo ti ibagbagak kadakayo.

²⁴Awan ti mannalon nga agnanayon a mangar-arado ken mangisagsagana iti talon a mulaanna.

²⁵No naisagananan, imulana dagiti bukel a kas kadagiti bukel ti anis ken kumino. Agmula kadagiti agbabatog a trigo ken sebada ket iti igid ti talon agmula iti dadduma a kita ti bukel.

²⁶Ammona nga aramiden ti trabahona ta insuro ti Dios.

²⁷Saanna nga usaren ti nadagsen a pang-or a pangruros kadagiti bukel ti anis ken kumino. Usarenna ketdi ti nalag-an a runo a kalkalainganna ti kadakkelna.

²⁸Saanna a dadaelen dagiti binukel ti trigo iti aglablabes a panangirikna. Ammona nga iriken ti trigo babaen ti panangipatulidna iti karison a saan a marumek dagiti binukel.

²⁹Agtaud amin daytoy a kinasirib iti Apo a Mannakabalin-amin. Nainsiriban dagiti plano ti Dios ket kanayon nga agballigida.