Read Iloko Isaiah 29 Bible Online

Isaiah 29 - Iloko bible

Isaiah 29

¹Asika pay, Ariel, ti siudad a nagkampoan ni David! Maysa wenno dua pay a tawen a pannakangilin dagiti fiesta ken ramrambak.

²Kalpasanna, idissuorko iti siudad a maaw-awagan iti “altar ti Dios.” Addanto sangsangit ken dungdung-aw ket agbalinto ti mismo a siudad a kas altar a pagpuoran kadagiti sakrifisio!

³Rautenkanto ket agaramidak iti panglakub iti lawlawmo.

⁴Mayarigkanto iti al-alia a marigatan nga agsao manipud iti uneg ti daga. Kaslanto maap-apput ti ngiwatmo nga agsao manipud iti tapok.

⁵Maitayabto a kasla tapok dagiti amin a ganggannaet a mangraut kenka. Mayanginto a kasla arutang dagiti nakabutbuteng nga armadada. Kellaat ken diyonto mapakpakadaan

⁶nga ispalenkayo. Aramatekto dagiti nadawel nga allawig ken ginggined. Mangyegakto iti napipigsa nga angin ken gumilgil-ayab nga apuy.

⁷Ket agpukawto a kasla tagtagainep dagiti amin nga armada dagiti pagilian a mangraut iti Ariel, agraman dagiti amin nga armas ken alikamenda a pakigubat. Wen, agpukawdanto a kas iti arapaap iti rabii.

⁸Mayarigdanto amin iti mabisin a tao nga agtagtagainep a mangmangan ngem agriing met a mabisin. Kaslanto iti tao a matmatay iti waw nga agtagtagainep nga umin-inum ngem agriing a namaga ti karabukobna. Wen, kastoyto ti mapasamak kadagiti pagilian a nagtitipon a mangraut iti Bantay Sion.

⁹Ala, itultuloyyo latta ti kinamaagyo! Ala, itultuloyyo ti panagimbubulsekyo! Agbartekkayo uray awan ti nainumyo nga arak! Agbasingbasingkayo uray pulos nga awan ti arak a natilmonyo!

¹⁰Pinagyepyepnakayo ti Apo tapno umay ti nargaan a turogyo. Dagiti koma profeta ti pannakamata dagiti tattao ngem kinullaapan ti Apo dagiti matada.

¹¹Mailemmengto kadakayo ti kaipapanan dagiti amin a parmata; kaslanto iti nailanad iti naserraan a pagbasaan. No ipanmo iti tao a makaammo nga agbasa ket dawatem nga ibasana kenka, kunananto a dina mabasa ta naserraan.

¹²No itedmo iti tao a dina ammo ti agbasa ket dawatem a basaenna, kunananto a dina ammo ti agbasa.

¹³Kinuna ti Apo, “Ibagbaga dagitoy a tattao nga agdaydayawda kaniak ngem barengbareng ti saoda ket adayo ti pusoda kaniak. Awan mamaay ti panagdaydayawda, ta alagaden ken linteg laeng ti tao ti inkabesada.

¹⁴Ngarud, makigtotdanto inton agsasaruno a yegko ti saan a mapakpakadaan a didigra. Agbanagto a maag dagiti masirib ket awanto ti imbag nga ipaay kadakuada ti kinasikapda.”

¹⁵Asi pay dagiti mangilemmeng kadagiti panggepda iti Apo! Ibanagda dagiti panggepda iti nalimed ket ipagarupda nga awan ti makakita kadakuada wenno makaammo iti ar-aramidenda.

¹⁶Ballikugenda dagiti amin a banag. Ania ti nasnasken, ti agdamdamili wenno ti damili? Mabalin kadi a sawen ti inaramid ti maysa a tao iti nangaramid kenkuana, “Saannak nga inaramid?” Wenno kunana kenkuana, “Dimo ammo ti ar-aramidem?”

¹⁷Kas iti pagsasao, “Iti saan a mabayag, agbalinto a talon ti nasamek a kabakiran, ket ti talon agbalin manen a kabakiran.”

¹⁸Inton dumteng dayta nga aldaw, mangngegto ti tuleng ti maibasa kenkuana a libro ket makakitanton a nalawag dagiti bulsek a nagbibiag iti sipnget.

¹⁹Masarakanto manen dagiti napanglaw ken napakumbaba a tattao ti ragsak nga ited ti Nasantoan a Dios ti Israel.

²⁰Isunton ti kanibusanan dagiti mangparparigat kadagiti padada a tao ken mangipakita iti gurada iti Dios. Mapukawto aminen a managbasol.

²¹Dadaelento ti Dios dagiti mamadpadakes, dagiti manglapped iti pannakadusa dagiti managdakdakes ken dagiti agsaksaksi iti ulbod tapno saan a matuntonan ti naimbag a tao ti kalinteganna.

²²Ita ngarud, kastoy ti kuna ti Apo a Dios ti Israel a nangispal ken ni Abraham iti riribuk, “Dakayo a tattaok, awanton ti rumbeng a pagbainan wenno pagbutenganyo.

²³Inton makitayo dagiti annak nga iparaburko kadakayo, bigbigenyonto a siak ti Nasantoan a Dios ti Israel. Padayawan ken raemendakto.

²⁴Makaawatto dagiti maag ket agragsakto a paisuro dagiti kanayon nga agtantanabutob.”