Read Iloko Isaiah 3 Bible Online

Isaiah 3 - Iloko bible

Isaiah 3

¹Ita, ti Apo, ni Yahweh a Mannakabalin-amin dandaninan ipanaw dagiti pagtaltalkan dagiti tattao ti Jerusalem ken Juda. Alaennanto ti taraon ken danumda,

²dagiti bannuar ken soldadoda, dagiti ukom ken dagiti profetada, dagiti mammadles ken dagiti panglakayenda,

³dagiti pangulo ti armada ken agtuturay, ken amin a salamangkero a mangiturong kadagiti pasamak.

⁴Isaadto ni Yahweh dagiti awan pay nakemna nga ubbing a lallaki a mangituray kadagiti tattao.

⁵Aggiginnundawaydanto. Dinto agraem dagiti agtutubo kadagiti nataengan. Saanto a raemen dagiti awan serserbina a tattao dagiti appoda.

⁶Dumtengto ti tiempo a ti maysa a kameng ti maysa a familia pumili iti maysa kadakuada ket kunana kenkuana, “Sika laengen ti mangituray kadakami iti daytoy a tiempo ti riribuk. Naimbag la kenka ta adda ikawesmo.”

⁷Ngem isungbatna, “Saan a siak! Dikay matulongan. Awan taraon wenno kawesko. Didak isaad a panguloyo!”

⁸Wen, nasentensiaanen a madadael ti Jerusalem! Marmarban ti Juda! Maibusor ken ni Yahweh ti amin a sao ken aramidda. Insultoenda ti Dios iti sango dagiti tattao.

⁹Ti panangidumdumada ti pakaukomanda. Iparangda ti panagbasolda a kas kadagiti taga-Sodoma. Nasentensiaanda a madadael ket isuda met la ti nangyeg iti pakadusaanda.

¹⁰Naragsakto dagiti nalinteg a tattao ket nasayaatto ti kasasaadda. Sagrapendanto ti bunga dagiti nagbannoganda.

¹¹Ngem nailunod dagiti managdakdakes. Ikarodanto ti dusa ti dakes nga aramidda.

¹²No maipapan kadagiti tattaok, dagiti ubbing ti mangidadanes kadakuada ket babbai dagiti turayenda. Dakayo a tattaok, yaw-awandakayo dagiti panguloyo, isu a diyo ammo ti turturongenyo.

¹³Sisasagana ni Yahweh a mangidatag iti pammabasolna. Sisasagana a mangukom kadagiti tattaona.

¹⁴Isaklang ni Yahweh dagiti panglakayen ken pangulo. Daytoy ti ipabasolna kadakuada: “Dinadaelyo dagiti kaubasan ken napno dagiti balbalayyo kadagiti sinamsamyo kadagiti napanglaw.

¹⁵Awan ti kalinteganyo a mangilupitlupit kadagiti tattaok ken manggundaway kadagiti napanglaw.” Daytoy ti sao ti Apo Dios a Mannakabalin-amin.

¹⁶Kinuna ni Yahweh, “Kitaenyo ti kinaparammag dagiti babbai ti Jerusalem! Natangigda a magmagna. Kanayonda a manggargari. Agkinnikinnida a magna ket agkilingkiling dagiti pulseras dagiti sakada.

¹⁷Ngem dusaekto ida: kuskosakto dagiti uloda ket lukaisak dagiti ilemlemmengda.”

¹⁸Dumtengto ti aldaw nga alaen ni Yahweh dagiti amin a pagtangtangsit dagiti babbai iti Jerusalem: dagiti pulseras ti palaypalay, dagiti arkos ti uloda, dagiti kuentasda,

¹⁹ken dagiti pulserasda. Ikkatennanto dagiti abbong ti rupada,

²⁰dagiti kallugongda; dagiti naibedbed nga arkos dagiti takkiag ken siketda;

²¹dagiti singsing ken aritos ti agongda;

²²dagiti napipintas a pagan-anayda, dagiti nagayad a badoda, kagay ken dagiti petakada;

²³dagiti makagargari a pagan-anayda, dagiti linen a panioda, dagiti panio a maiputipot iti tengngedda ken dagiti atiddog a belo iti uloda.

²⁴Imbes nga agayamuonda iti bangbanglo, agadiwaradanto iti buyok. Imbes a napintas a barikes, nakersang a tali; imbes a naurnosto ti buok, kalbodanto; imbes a napintas ti pagan-anayda, rutayrutaydanto. Pakaibabainandanto ti pintasda.

²⁵Matayto iti gubat dagiti lallaki iti siudad; wen, matayto uray dagiti kapigsaan.

²⁶Agdung-aw ken agsangitto dagiti ruangan ti siudad, ket mayarigto ti mismo a siudad iti babai a lamolamo nga agtugtugaw iti daga.