Read Iloko Isaiah 30 Bible Online

Isaiah 30 - Iloko bible

Isaiah 30

¹Kuna ti Apo: “Asi pay dagiti nasukir nga agtuturay iti Juda. Surotenda dagiti plano a diak inaramid, ket makitulagda kadagiti pagilian a saanko a pagayatan. Agtutuon dagiti basbasolda.

²Mapanda agpatulong iti Egipto a dida makiuman kaniak. Kayatda a salakniban ida ti Egipto, isut' gapuna nga agtalekda iti ari ti Egipto.

³Ngem awanto ti pannakabalin ti ari a mangtulong kadakuada ket agtungpalto iti didigra ti pannalaknib ti Egipto.

⁴Uray no nakadanonen dagiti pannakabagida kadagiti siudad ti Zoan ken Hanes idiay Egipto,

⁵agbabawinto dagiti tattao ti Juda iti panagtalekda iti dayta a nasion a di makatulong kadakuada no masapulda ti tulong.”

⁶Daytoy ti pakaammo ti Dios maipapan kadagiti animal iti tay-ak ti abagatan: “Agdaliasat dagiti pannakabagi ti Juda iti napeggad a lugar a pagnaedan dagiti leon, karasaen ken agtaytayab a dragon. Kargaanda dagiti asno ken kamelioda iti agkakangina a sagut nga agpaay iti nasion nga awan ti maitulongna kadakuada.

⁷Awan serserbi ti tulong nga ited ti Egipto. Isut' gapuna a pinanaganak ti Egipto iti ‘Dragon a saan a Mangan-ano!’”

⁸Imbaga kaniak ti Dios nga ilanadko iti maysa a libro ti pudno a kababalin dagiti tattao tapno agpaay daytoy a mataginayon a pammaneknek iti kinadakesda.

⁹Kankanayon nga agsukirda iti Dios, kankanayon nga agulbodda, kankanayon a dida kayat ti dumngeg kadagiti pannursuro ti Apo.

¹⁰Ibagada nga agulimek dagiti profeta. Kunada, “Diyo ibaga kadakami no ania ti rumbeng. Ibagayo ti kayatmi a denggen. Diyo pukawen dagiti arapaapmi.

¹¹Aglisikayo ket didakami bibiangan. Dimi kayat a denggen ti sasaoyo maipapan iti ‘Nasantoan a Dios ti Israel.’”

¹²Ngem kastoy ti kuna ti Nasantoan a Dios ti Israel: “Diyo ikankano ti ibagbagak kadakayo ket agtalekkayo iti ranggas ken allilaw.

¹³Nakabasolkayo. Mayarigkay iti nangato a bakud a nagrekka manipud ngato aginggat' baba. Pagammoan la ta mapasagkayo.

¹⁴Maburburakkayto a kasla iti banga a mawarawara a mamimpinsan ket pulos nga awan dakkel a pasetna a mabalin a pagadaw iti beggang wenno pagtako iti danum iti bubon.”

¹⁵Kuna ni Apo Dios, ti Nasantoan a Dios ti Israel, kadagiti tattao: “Agsublikayo. No agtalek ken makikappiakayo kaniak, masarakanyonto ti pigsa ken talged.” Ngem diyo kayat nga aramiden daytoy!

¹⁶Panggepyo ketdi ti agsakay kadagiti napardas a kabalio tapno itarayanyo dagiti kabusoryo. Ket tumutop ti aramidenyo—masapul nga aglibaskayo! Ipagarupyo a napardas dagiti kabalioyo ngem naparpardas pay dagiti mangkamkamat kadakayo!

¹⁷No makakitakayo iti maysa a kabusor, agtaray ti sangaribu kadakayo ket limanto la a kabusor ti umdas a mamagtaray kadakayo amin. Awanto ti mabati iti armadayo malaksid ti palo ti bandera a nabaybay-an iti tapaw ti maysa a turod!

¹⁸Nupay kasta, agur-uray ti Apo a mangngaasi kadakayo. Wen, agur-uray a mangparabur kadakayo gapu ta kanayon a maiparbeng ti aramidna. Nagasat ti tao nga agtalek iti Apo.

¹⁹Dakayo nga agnaed iti Jerusalem, dikayton agsangit. Manangngaasi ti Apo ket no umasugkayo nga agpatulong kenkuana, ipangagnakayo.

²⁰Paglak-amennakayo ti Apo iti rigat, ngem addanto latta a mangisuro kadakayo ket dinto masapulen a birokenyo.

²¹No sumiasikayo iti dalan, mangngegyonto ti timekna iti likudanyo nga agkuna, “Daytoy ti dalan a pagnaanyo.”

²²Alaenyonto dagiti imahen dagiti didiosenyo a nakalupkopan iti pirak ken dagiti nadigos iti balitok ket ibellengyonto ida a kas rugit. Kunayonto, “Awan serserbiyon!”

²³Tunggal agmulakayo, pagtudoento ti Apo tapno dumakkel dagiti mulayo ket nawadwadto ti apityo ken adunto ti araben dagiti animalyo.

²⁴Kasayaatan ken kalangtoan a ruot ti kanento dagiti pagar-aradoyo a baka ken asno.

²⁵Iti aldaw a masakup dagiti sarikedked dagiti kabusoryo ket mapapatay dagiti tattaoda, agayusto dagiti danum kadagiti ubbog manipud kadagiti bambantay ken turturod.

²⁶Kaslanto raniag ti init ti raniag ti bulan. Mamimpitonto met ti karaniag ti init ngem ti sigud a raniagna, kas iti agtitipon a raniagna iti pito nga aldaw. Mapasamakto amin dagitoy inton bedbedan ken agasan ti Apo dagiti sugat nga impalak-amna kadagiti tattaona.

²⁷Manipud iti adayo, adtoyen nga umay ti dayag ken pannakabalin ti Apo! Sumungsungaden! Apuy ken asuk ti mangipakita iti pungtotna. Agsao ket kasla gumilgil-ayab nga apuy dagiti balikasna.

²⁸Paunaenna ti angin a kasla layus a mangyanud iti amin. Lapunosenna dagiti nasion agingga a madadaelda ket gibusanna dagiti dakes a panggepda.

²⁹Ngem dakayo a tattao ti Dios, naragsakkayto ket agkakantakayo a kas iti panagkakantayo iti rabii ti nasagradoan a fiesta. Naragsakkayto a kas kadagiti mapan iti Templo ti Apo, ti Mangsalaknib iti Israel, isuda a matoktokaran kadagiti flauta iti pannagnada nga agturong sadiay.

³⁰Ipangngegto ti Apo ti nadayag a timekna iti amin a tao ket ipariknananto ti bileg ti pungtotna. Addanto apuy, bumayakabak a tudo ken yelo.

³¹Agbutengto dagiti Asirio inton mangngegda ti timek ni Yahweh ket mariknada ti bileg ti panangdusana kadakuada.

³²Tunggal dissoan ida ti Apo, agtambor ken agarpanto dagiti tattaona. Ti Dios a mismo ti manggubat kadagiti Asirio.

³³Idi un-unana, addan naisagana a lugar a pakapuoran iti ari ti Asiria. Nauneg ken nalawa daytoy a disso a nakatuontuonan ti adu a kayo. Ket arigto iti gumilgil-ayab nga asufre ti anges ti Apo a mangpasged kadagiti kayo.