Read Iloko Isaiah 33 Bible Online

Isaiah 33 - Iloko bible

Isaiah 33

¹Asi pay dagiti kabusortayo! Nagagaw ken nangliputda idinto ta awan ti nangag-agaw iti sanikuada ken nangliput kadakuada. Ngem agpatingganto ti panagagaw ken panagliputda, ket mismo nga isudanto dagiti biktima ti panagtakaw ken panagliput.

²Kaasiannakami, O Apo. Sika ti pangnamnamaanmi. Salaknibannakam iti inaldaw, ken isalakannakami iti tiempo ti rigat.

³No tulongannakami a makiranget, agtataray dagiti nasion manipud iti arimbangaw ti gubat, ket mawarawarada.

⁴Maagaw dagiti sanikuada ket maipanawda a kas samsam.

⁵Nagtan-ok ketdin ti Apo! Iturayanna ti amin. Isaknapna iti Jerusalem ti kinalinteg ken kinaimbag.

⁶Ikkanna iti talged ti nasion. Kanayon a salaknibanna dagiti tattaona, ket ikkanna ida iti sirib ken ammo. Kapatgan a gamengda ti panagdayawda a sibubuteng iti Apo.

⁷Agdawdawat dagiti natured a lallaki iti tulong! Agsangsangit iti nasaem dagiti naibaon a manggun-od iti kappia.

⁸Napeggad dagiti dakkel a dalan ket awan ti agdaliasat sadiay. Mawaswas dagiti katulagan, ket masalungasing dagiti nagnunumoan. Awanen ti mararaem a tao.

⁹Awanen dagiti mula ket nabaybay-anen ti daga. Nalaylay dagiti bakir ti Libano ken nagbalin a kasla let-ang ti nadam-eg a tanap ti Saron. Agregreg dagiti bulong dagiti kayo idiay Basan ken Bantay Carmel.

¹⁰Kuna ti Apo kadagiti nasion, “Ita, agtignayakon! Ipakitak ti kinabilegko.

¹¹Awan serserbi dagiti planoyo, ket awan mamaay ti amin nga aramidyo. Mayarig ti espirituk iti apuy a mangdadael kadakayo.

¹²Mapuorankayto agingga nga agbanagkayto a kas iti apug, kas kadagiti siitsiitan a mula a mapuoran agingga a dumapu.

¹³Dakayo nga adda iti asideg ken dakayo nga adda iti adayo, denggenyo ti saok maipapan kadagiti inaramidko ket bigbigenyo ti pannakabalinko.”

¹⁴Agtigtigerger iti buteng dagiti managbasol a tattao ti Sion. Kunada, “Kasla apuy a sumsumged nga agnanayon ti panangukom ti Dios. Adda kadi makalasat kadatayo iti kasta nga apuy?”

¹⁵Makalasatka no sawem ken aramidem ti nalinteg. Dimo aramaten ti pannakabalinmo a mangsaur kadagiti napanglaw. Dika met umawat iti pasuksok. Dika makikadua kadagiti agpanggep nga agpapatay wenno kadagiti agaramid iti dadduma a kinadakes.

¹⁶Agballigikanto no aramidem dagitoy, ket natalgedkanto a kas iti adda iti uneg ti natibker a sarikedked. Addanto taraon a kanem ken danum nga inumem.

¹⁷Makitamto manen ti maysa nga ari a sidadayag a mangituray iti daga a dumanon iti amin a suli.

¹⁸Lagipto laengen ti sigud a panagbutengmo kadagiti ganggannaet nga agsingsingir iti buis ken kadagiti espia.

¹⁹Dimonton makita dagiti natangsit a ganggannaet a dimo maawatan ti pagsasaona.

²⁰Kitaem ti Sion, ti siudad a pagramrambakantayo kadagiti naituding a fiestatayo. Kitaem ti Jerusalem! Natalgedto a lugar a pagnaedan. Arignanto iti tolda a pulos a di magaraw, a dagiti pasokna saan a mabag-ut ken saan a magsat dagiti talina.

²¹Ipakitanto ti Apo ti dayagna kadatayo. Agnaedtayto iti igid dagiti nalawa a karayan ken waig, ngem awanto ti barko dagiti kabusor nga aglayag kadakuada.

²²Awan serserbi dagiti tali dagita a barko. Saan a maukrad dagiti layagda! Maitalawto ti amin a kinabaknang ti armada ti kabusor. Adunto unay ti masamsam ket uray dagiti pilay addanto mabingayda. Ti Apo ti aritayto. Iturayan ken salaknibannatayto.

²⁴Awanto ti uray maysa nga agnaed iti dagatayo nga agagal iti sakit, ket mapakawanto dagiti amin a basbasol.