Read Iloko Isaiah 34 Bible Online

Isaiah 34 - Iloko bible

Isaiah 34

¹Umaykayo, dakay a tattao ti amin a nasion! Umasidegkayo ket dumngegkayo. Umay koma ti entero a daga agraman dagiti amin nga agnaed kenkuana ket dumngegda.

²Kapungtot ni Yahweh dagiti amin a nasion ken dagiti amin nga armadada. Impaulogna ti sentensia ti pannakadadaelda.

³Saanto a maikali dagiti bangkayda, ngem maiwalangdanto nga agrupsa ken agbuyok. Lumabaganto dagiti bambantay gapu iti dara.

⁴Tumapokto ti init, ti bulan ken dagiti bituen. Agpukawto ti langit a kas iti malukot a pagbasaan, ket agtinnagto dagiti bituen a kas iti panagtinnag dagiti bulong ti ubas wenno igos.

⁵Insaganan ti Apo ti kampilanna sadi langit, ket ita, agdisso kadagiti tattao ti Edom a sinentensiaanna a madadael.

⁶Agaruyotto ti kampilanna iti dara ken taba, kas iti dara ken taba dagiti karnero ken kalding a maidaton. Idatagto ti Apo daytoy a daton idiay siudad ti Bosra. Adunto ti papatayenna idiay Edom.

⁷Mapasagto dagiti tattao a kas kadagiti atap a baka ken dagiti bumaro a baka. Agayusto ti dara iti daga, ket malapunosto iti taba.

⁸Daytoyto ti tiempo a panangispal ti Apo iti Sion, ta balsennanto dagiti kabusor ti Sion.

⁹Agbalinto nga alketran dagiti karayan ti Edom, ket agbalinto nga asufre ti daga. Sumgedto a kas alketran ti entero a pagilian.

¹⁰Sumgedto iti aldaw ken rabii, ket agnanayonto nga agas-asuk. Aglangalangto ti daga iti amin a tiempo, ket awanton a pulos ti magna iti rabawna.

¹¹Dagiti kullaaw ken wak ti agyanto iti daga. Pagbalinento manen ti Apo a langalang ken gusoguso ti Edom.

¹²Awanto ti ari a mangituray iti pagilian, ket mapukawto dagiti amin a pangulo.

¹³Agtubonto dagiti sisiitan ken kalkalunay kadagiti amin a palasio ken kadagiti nabakudan nga il-ili. Agnaedto kadagitoy a lugar dagiti atap nga aso ken kullaaw.

¹⁴Agbalinto dayta a lugar nga ayuyang dagiti atap nga animal, ket agpipinnukkawto dagiti demonio. Umayto ti pagbutbutngan iti rabii nga agsapul iti paginanaanna.

¹⁵Agumokto sadiay dagiti kullaaw, agitlog, agukop ken aywananda dagiti annakda. Aguummongto sadiay dagiti buitre.

¹⁶Sukimatenyo ti libro ti Apo ket basaenyo ti kunana. Addanto amin dagitoy ket awanto ti uray maysa nga awan ti kaparehana. Kasta ti imbilin ti Apo, ket ti Espiritu met laeng ti mamagtitipon kadakuada.

¹⁷Isunto ti mangbingbingay iti daga, ket ikkannanto ti tunggal maysa iti bingayna. Agnaeddanto iti daga iti amin a tiempo, ket kukuadanto iti agnanayon nga awan inggana.