Read Iloko Isaiah 36 Bible Online

Isaiah 36 - Iloko bible

Isaiah 36

¹Idi maika-14 a tawen a panagturay ni Hezekias nga ari ti Juda, rimmaut ni Senakerib nga emperador ti Asiria. Sinakupna amin a nasarikedkedan a siudad ti Juda.

²Kalpasanna, binaonna ti kangatoan nga ofisialna a mapan idiay Jerusalem tapno kiddawenna ti isusuko ni Hezekias. Nangitugot ti ofisial iti dakkel nga armada ket nagrubbuatda idiay Lakis. Sinakupna ti dalan nga ayan dagiti agar-aramid iti lupot, iti asideg ti kanal a pagayusan ti danum nga aggapu iti akingngato a bassit a dan-aw.

³Rimmuar ti tallo a taga-Juda a nangsabat kenkuana: ni Eliakim a mayordomo iti palasio ken anak ni Hilkias, ni Sebna a sekretario ti palasio, ken ni Joas a para-aywan kadagiti libro ti palasio ken anak ni Asaf.

⁴Imbaga ti ofisial a taga-Asiria a kayat a maammoan ti emperador no ania ti pagpampannakkel ni Ari Hezekias.

⁵Sinaludsodna, “Ipagarupmo kadi a mabalin a pakigubat ti sao a saan ketdi a ti sirib ti armada ken ti bilegna? Siasino ti namnamaem a tumulong kenka a manggubat iti Asiria?

⁶Namnamaem a tulongannaka ti Egipto, ngem arigna dayta iti panangusar iti runo a kas sarukod. Matukkol ket salputenna ti ima. Kastoy ti kayarigan ti ari ti Egipto no adda agtalek kenkuana.”

⁷Intuloy ti ofisial a taga-Asiria, “Wenno kayatmo a sawen nga agtalekka iti Apo a Diosmo? Isu ti akinkukua kadagiti pagdaydayawan ken kadagiti altar a dinadael ni Hezekias, sana imbaga kadagiti tattao ti Juda ken iti Jerusalem a maysa la nga altar ti pagdaydayawanda.

⁸Makitulagak kenka iti nagan ti emperador. Ikkanka iti 2,000 kabalio no la ket makasarakka ti kasta a kaadu ti lallaki nga agsakay kadakuada.

⁹Dimo kabaelan a sarangten ti uray maysa kadagiti kababaan nga ofisial ti Asiria. Nupay kasta, namnamaem kadi nga ikkannaka ti Egipto kadagiti lugan a pakigubat ken kadagiti agkabalio a mannakigubat?

¹⁰Ipagarupmo aya a rinaut ken dinadaelko ti pagariam a dinak tinulongan ti Apo? Isu a mismo ti nangbilin kaniak a rautek ken dadaelek ti dagam.”

¹¹Kinuna da Eliakim, Sebna ken Joas iti ofisial, “Pangngaasim ta agsaoka kadakami iti Arameo. Maawatanmi. Dika agsao iti Hebreo ta dumdumngeg dagiti amin a tattao nga adda iti rabaw ti bakud.”

¹²Ngem kinuna ti ofisial, “Ipagarupyo aya nga imbaonnak ti emperador kadakayo ken iti ariyo tapno dakayo laeng ti pangibagaak kadagitoy a bambanag? Saan! Kasasaok pay dagiti tattao nga agtutugaw iti rabaw ti bakud, isuda a naikeddeng a mangan iti takkida ken uminum iti isboda a kas met ti aramidenyonto.”

¹³Timmakder ti ofisial ket impukkawna iti Hebreo, “Denggenyo ti paibaga ti emperador ti Asiria!

¹⁴Ballaagannakayo: dikay paallilaw ken ni Hezekias. Dinakay maisalakan ni Hezekias.

¹⁵Diyo ipalubos a guyoguyennakayo nga agtalek iti Apo. Ipagarupna nga awan duadua nga isalakannakayo ti Apo ket dina ipalubos a sakupen ti armada ti Asiria ti siudadyo.

¹⁶Diyo patpatien ni Hezekias. Ibilin ti emperador ti Asiria a rummuarkayo ket sumukokayo. Mapalubosankayto amin a mangan iti ubas iti kaubasanyo, ken igos iti kayoyo ken uminum iti danum nga agtaud kadagiti bubonyo.

¹⁷Urayenyo ti panangipan kadakayo ti emperador iti sabali a daga nga umasping iti dagayo nga addaan iti kaubasan a pagtaudan ti arak ken trigo a maaramid a tinapay.

¹⁸Dikay paallilaw ken ni Hezekias iti panangibagbagana nga isalakannakayo ti Apo. Adda kadin didiosen dagiti sabali a pagilian a nakaisalakan iti pagilianna iti pannakabalin ti emperador ti Asiria?

¹⁹Sadino ti ayan itan dagiti didiosen ti Hamat ken Arpad? Ayan dagiti didiosen ti Sefarvaim? Awan ti nakaispal iti Samaria!

²⁰Kaano ti panangispal ti uray siasino kadagitoy a didiosen iti pagilianna iti pannakabalin ti emperadormi? Ania ngarud ti panggapuanyo a mangipagarup a maisalakan ti Apo ti Jerusalem?”

²¹Awan ti naguni kadagiti tattao ta kasta ti imbilin ni Ari Hezekias kadakuada.

²²Kalpasanna, rinay-ab da Eliakim, Sebna ken Joas ti pagan-anayda iti ladingitda sada napan impakaammo iti ari ti imbaga ti ofisial a taga-Asiria.