Read Iloko Isaiah 37 Bible Online

Isaiah 37 - Iloko bible

Isaiah 37

¹Apaman a naammoan ni Ari Hezekias ti impadamag dagiti ofisialesna, rinay-abna ti pagan-anayna gapu iti ladingitna. Nagkawes iti nakersang a lupot sa napan iti Templo ni Yahweh.

²Binaonna ni Eliakim a mayordomo, ni Sebna a sekretario ken dagiti lallakay a papadi a mapan ken ni profeta Isaias nga anak ni Amoz. Nakakawesda met iti nakersang a lupot.

³Daytoy ti pinaibaga ti ari ken ni Isaias: “Aldaw a panagsagaba ita. Madusdusa ken maibabaintayo. Kaslatay iti babai a dandani agpasngay ngem nakapsut unayen.

⁴Imbaon ti emperador ti Asiria ti kangatoan nga ofisialna a nanglais iti sibibiag a Dios. Sapay koma ta mangngeg ti Apo a Diosmo dagitoy a panglais ket dusaenna dagiti nagsao. Ngarud, ikararagam dagiti makalasat a tattaotayo.”

⁵Idi maawat ni Isaias ti pakaammo ni Ari Hezekias,

⁶kastoy ti pinaibagana iti ari: “Kuna ti Apo a dika agdanag kadagiti panglalais kenka dagiti taga-Asiria.

⁷Pataudento ti Apo ti maysa a damag a panggapuan ti emperador nga agsubli iti bukodna a pagilian ket papapataynanto sadiay.”

⁸Nadamag ti ofisial a taga-Asiria a pimmanaw ti emperador idiay Lakis ket gubgubatenna ti kabangibang a siudad ti Libna. Iti kasta, napan sadiay tapno makiuman kenkuana.

⁹Nadamag dagiti taga-Asiria a rauten ida ti armada ti Egipto nga impanguloan ni Tirhaka nga ari ti Etiopia. Idi maammoan daytoy ti emperador, nagsurat ken ni Hezekias nga ari

¹⁰ti Juda. Kinunana: “Imbaga kenka ti Dios a pagtaltalkam a dikanto matnag iti pannakabalinko. Ngem saanka koma a maallilaw.

¹¹Awan duadua a nadamagmon ti aramiden ti emperador ti Asiria iti aniaman a pagilian nga ikeddengna a dadaelen. Ipagarupmo kadi a makalisika?

¹²Dinadael dagidi kapuonak dagiti siudad ti Gozan, Haran, ken Resef. Pinapatayda met dagiti tattao ti Beteden a nagnaed idiay Telasar. Awan kadagiti didiosenda ti nakaisalakan kadakuada.

¹³Sadino ti ayan ti ari ti Hamat, ti ari ti Arpad, ti ari ti Sefarvaim, ti ari ti Hena ken ti ari ti Ivva?”

¹⁴Inawat ni Hezekias ti surat nga inted dagiti naibaon ket binasana. Kalpasanna, napan iti Templo sana inkabil ti surat iti imatang ni Yahweh.

¹⁵Inkararagna:

¹⁶“O Apo a Mannakabalin-amin a Dios ti Israel, sika a nakatugaw iti ngatoen dagiti kerubim, sika laeng ti Dios a mangituray iti amin a pagarian ditoy lubong. Pinarsuam ti langit ken ti daga.

¹⁷Dumngegka ngarud, O Apo, ket kitaem ti mapaspasamak kadakami. Denggem ti amin a sao ni Senakerib a pangumsi kenka, sika a sibibiag a Dios.

¹⁸Ammomi amin, O Apo, nga adu a nasion ti dinadael dagiti emperador ti Asiria ket pinaglangalangda dagiti dagada.

¹⁹Pinuoranda dagiti didiosen dagita a nasion—saanda a pudno a dios no di ket kayo ken bato laeng a ladawan nga aramid ti tao.

²⁰Ita, O Apo a Diosmi, ispalennakami kadagiti taga-Asiria tapno maammoan dagiti amin a pagilian ditoy lubong a siksika ti Dios.”

²¹Impakaammo ni Isaias ken ni Ari Hezekias a kas sungbat ti kararag ti ari,

²²kinuna ni Yahweh, “Senakerib, katawaannaka ti siudad ti Jerusalem ket pagang-angawannaka.

²³Siasino ti ipagarupmo a linalais ken inum-umsim? Awan ti panagraemmo kaniak, siak a Nasantoan a Dios ti Israel.

²⁴Imbaonmo dagiti adipenmo tapno ipalangguadda kaniak nga inaramatmo dagiti luganmo a pakigubat a pinangparmek kadagiti kangatoan a bantay ti Libano. Impangpangasmo a pinukanmo sadiay dagiti katayagan a sedro ken dagiti kapintasan a parwa ket kunam a nadanonmo ti kasamekan a paset dagiti bakir.

²⁵Impalangguadmo a nagkalika kadagiti bubon ket imminumka iti danum dagiti ganggannaet a daga. Imbagam a binaddebaddek dagiti soldadom ti Karayan Nile agingga a nagmaga.

²⁶“Dimo aya nadamag a nabayagen a naplanok dagitoy? Ita, tinungpalkon. Intedko kenka ti pannakabalin a mangdadael kadagiti nasarikedkedan a siudad agingga a nagbalinda a gabgabsuon dagiti maburburak a batbato.

²⁷Awan gaway dagiti tattao nga agnaed sadiay. Nakigtot ken nailabegda. Kasdala iti mula iti talon wenno ruot nga agtubtubo iti tuktok ti balay a basnotan ti dumardarang nga angin-daya.

²⁸“Ngem ammok ti amin maipapan kenka. Ammok ti aramidem ken papanam. Ammok ti gumilgil-ayab a pungtotmo kaniak.

²⁹Nangngegko ti maipapan iti dayta a pungtot ken kinatangsitmo. Ita, taldenganka ket busalanka saka isubli iti naggapuam. Ipagnaka iti isu met la dalan a nagnaam nga immay.”

³⁰Kalpasanna, kinuna ni Isaias ken ni Ari Hezekias, “Daytoy ti pagilasinan iti mapasamakto: Ita ken iti sumaruno a tawen, dagitinto la maapit kadagiti balang a trigo ti kanem. Ngem iti maikatlo a tawen, mabalinmonton ti agmula ken agapit iti trigo ken agmula iti ubas ken mangan kadagiti bungana.

³¹Rumang-ayto dagiti nakalasat iti nasion ti Juda. Mayarigdanto iti mula nga umuneg ti ramutna ket adunto ti bungana.

³²Addanto tattao a makalasat idiay Jerusalem ken iti Bantay Sion, agsipud ta inkeddeng ti Apo a Mannakabalin-amin a mapasamak daytoy.

³³“Kastoy ti kinuna ti Apo maipapan iti emperador ti Asiria, ‘Saanto a sumrek iti daytoy a siudad wenno mangibiat iti uray maysa a pana iti irarautna. Awanto ti soldado a nakaiggem iti kalasag ti umasideg iti Jerusalem ket awanto ti patakder a mabangon a panglakub iti siudad.

³⁴Agsublinto iti naggapuanna ket magnanto iti isu met laeng a dalan a nagnaanna nga immay a saan a bimmaddek iti daytoy a siudad. Siak, ni Yahweh, ti agsasao.

³⁵Salaknibak daytoy a siudad ket isalakanko gapu iti dayawko ken gapu iti karik ken ni David nga adipenko.’”

³⁶Napan ti anghel ni Yahweh iti kampo dagiti taga-Asiria ket pinatayna ti 185,000 a mannakigubat. Iti parbangon iti sumuno nga aldaw, napasagda amin sadiay!

³⁷Pimmanaw ni Senakerib nga emperador ti Asiria ket nagsubli idiay Nineve.

³⁸Iti maysa nga aldaw, idi agdaydayaw ni Senakerib iti templo ni Nisroc a didiosenna, pinatay ti dua kadagiti annakna, da Adramelec ken Sarezer, sada naglibas a napan iti daga ti Ararat. Ni Esarhadon a maysa kadagiti annakna ti simmukat kenkuana nga emperador.