Read Iloko Isaiah 41 Bible Online

Isaiah 41 - Iloko bible

Isaiah 41

¹Kuna ti Dios, “Agulimekkayo ket denggendak, dakay a dagdaga iti adayo. Agsaganakayo a mangidatag iti kasoyo iti pangukoman. Addanto gundawayyo nga agsao. Agsasangotay ita ket kitaentayo no siasino ti adda kalinteganna.

²“Siasino ti nangsugsog iti maysa a taga-Daya? Siasino ti mamagballigi kenkuana iti sadinoman a papananna? Siasino ti mangted iti bilegna a mangparmek kadagiti ari ken nasnasion? Patapokenna ida babaen iti kampilanna. Warawaraen ida dagiti panana a kas kadagiti taep nga itayab ti angin.

³Kamatenna ida nga awan manglapped kenkuana; napardas ket kasla di agdisso dagiti dapanna iti daga.

⁴Siasino ti akin-aramid iti daytoy? Siasino ti nangikeddeng iti pannagna ti historia? Siak, ni Yahweh, addaak idi punganay, wen, addaakto iti kamaudianan.

⁵“Nakita dagiti tattao iti adayo a dagdaga ti inaramidko. Agamakda ket agpigpigergerda iti buteng, isu nga aguummongda amin ket umayda.

⁶Agtitinnulong ken agpipinnaregta dagiti nalaing a trabahador.

⁷Kuna ti karpintero iti mammanday, ‘Mayat ti aramidmo.’ Ti mangpitpit kadagiti paset ti ladawan paregtaenna ti mangilansa a mamagkakamang. Adda agkuna, ‘Nasayaat ti pannakalanangna’— ket ilansada ti imahen tapno di matumba.

⁸“Ngem sika, Israel nga adipenko, sika, Jacob a pinilik, dagiti kaputotan ni Abraham a gayyemko.

⁹Innalakayo kadagiti pungto ti daga; inayabankayo kadagiti kaadayoan a sulina, ket kinunak kadakayo, ‘Dakayo ti adipenko.’ Saankayo a linaksid no di ket pinilikayo.

¹⁰Dikay agbuteng—addaak kadakayo! Siak ti Diosyo— diyo ipalubos nga adda mangbutbuteng kadakayo. Papigsaen ken tulongankayo; salakniban ken isalakankayo.

¹¹“Dagiti gumurgura kadakayo, maparmekdanto ket ammodanto ti rikna ti pannakaibabainda. Matayto dagiti manggubat kadakayo, ket mapukawdanto iti rabaw ti daga.

¹²Birokenyonto dagiti kabusoryo ngem diyonto masarakan ida. Dagiti manggubat kadakayo awanto ti kapaypay-anda.

¹³Siak ni Yahweh a Diosyo; Papigsaenkayo ket kunak kadakayo, ‘Dikay agbuteng, tulongankayo.’”

¹⁴Kuna ni Yahweh, “Israel, uray no bassit ken nakapuyka, saanka nga agbuteng ta tulonganka. Siak a Nasantoan a Dios ti Israel, siak ti mannubbotmo.

¹⁵Pagbalinenka a kasla pagirikan, nga addaan kadagiti ngipen a baro ken natatadem. Irikemto dagiti bantay ket dadaelem ida; margaayto dagiti turod ket tumapokda.

¹⁶Ipurruakmonto ida iti ngato ket mayanginda; ti bagio ti mangiwarwara kadakuada. Ngem naragsakkanto ta siak ti Diosmo; siak a Nasantoan a Dios ti Israel, idaydayawnakto.

¹⁷“Inton agbirok dagiti tattaok iti danum gapu iti rigatda, inton mamagaan ti karabukobda iti wawda, siak, ni Yahweh, ipangagkonto ti kararagda; siak a Dios ti Israel, diakto baybay-an ida.

¹⁸Pagayusekto't karkarayan kadagiti turod a natikag; pataudekto dagiti ubbog nga agayus kadagiti tanap. Pagbalinekto a libtong ti let-ang, ket pagayusekto a kas ubbog ti namaga a daga.

¹⁹Iti let-ang, pagtuboekto dagiti sedro, kasta met dagiti akasia, arrayan ken olibo. Agbalinto a kabakiran ti natikag a daga, kabakiran a pagtuboan ti saleng, aruo ken parwa.

²⁰Makitanto daytoy dagiti tattao ket maammoanda a siak, ni Yahweh, ti akin-aramid. Maawatanda a ti Nasantoan a Dios ti Israel ti nangaramid iti daytoy.”

²¹Ti Apo nga ari ti Israel, kunana: “Dakayo a didiosen dagiti pagilian, idatagyo ti darumyo. Iparangyo dagiti kasayaatan a pammaneknekyo!

²²Umaykayo ket ipakaammoyo ti mapasamakto tapno maammoanmi no kaano a dumtengda. Ilawlawagyo iti pangukoman dagiti pasamak idi punganay ket ibagayo kadakami no ania ti kaipapananda.

²³Tapno mapaneknekanmi a dioskayo, ibagayo no ania ti mapasamak iti masakbayan! Agaramidkayo iti naimbag wenno mangyegkayo iti didigra; pagamken ken ikkandakam iti panagbuteng.

²⁴Awan serserbiyo, dakayo ken dagiti aramidyo; makarimon dagiti agdaydayaw kadakayo!

²⁵“Nangpiliak iti lalaki nga agnaed iti daya; manipud iti amianan, umayto rumaut. Payatpayatenna dagiti agtuturay a kasda la pitak; arigna iti agdamdamili a mangibaddebaddek iti damilienna.

²⁶Siasino kadakayo ti nangibaga idi un-unana a mapasamakto ti kasta? Siasino ti nangipakaammo a kastoy ti mapasamakto tapno kunami a pudno ti imbagayo? Awan ti nasasao ti siasinoman kadakayo; awan ti makaibaga nga adda imbagayo!

²⁷Siak, ni Yahweh, ti immuna a nangipadamag iti Sion. Nangibaonak iti nangipakaammo iti Jerusalem: ‘Sumangpet dagiti tattaom! Addadan!’

²⁸Idi kitaek dagiti didiosen, awan ti nasao ti uray maysa kadakuada; awan nakasungbat iti saludsodko.

²⁹Awan serserbi amin dagitoy a didiosen; pulos nga awan maaramidda— nakapsut ken awan ti mabalin dagitoy nga imahen.”