Read Iloko Isaiah 43 Bible Online

Isaiah 43 - Iloko bible

Isaiah 43

¹Israel, kuna ti Apo a namarsua kenka, “Saanka nga agbuteng—salaknibanka. Inawagak ti naganmo—kukuaka.

²No aglasatka kadagiti adalem a karayan, addaakto kenka; dinakanto parmeken dagiti pakariribukam. No magnaka iti apuy, dikanto mauram; dikanto maan-ano kadagiti nakaro a pakasuotam.

³Ta siak ni Yahweh a Diosmo, ti Nasantoan a Dios ti Israel a mangisalakan kenka. Yawatkonto ti Egipto tapno mawayawayaanka; yawatkonto ti Etiopia ken ti Seba.

⁴Yawatkonto dagiti nasion tapno maisalakan ti biagmo. Napategka ngamin kaniak gapu ta itan-okka ken ay-ayatenka.

⁵Dika agbuteng ta addaak kenka! “Pagawidekto dagiti tattaom manipud iti kaadayoan a paset ti daya ken laud.

⁶Bilinekto ti amianan a palubosanna ida, ibagakto iti abagatan a dina igawid ida. Palubosanyo nga agsubli dagiti tattaok manipud kadagiti adayo a daga, manipud iti amin a suli ti lubong agawidda.

⁷Isuda dagiti tattaok; pinarsuak ida tapno idaydayawdak.”

⁸Kuna ti Dios, “Idatagyo dagiti tattaok iti pangukoman. Adda matada ngem bulsekda; adda lapayagda ngem tulengda!

⁹Ayabanyo dagiti pagilian iti pangukoman. Siasino kadagiti didiosenda ti makaipadto iti mapasamak iti masakbayan? Siasino kadakuada ti nangipakpakauna kadagiti mapaspasamak iti agdama? Itugot man dagitoy a didiosen dagiti saksida tapno paneknekanda nga adda kalinteganda, tapno saksianda ti kinapudno ti saoda.

¹⁰“Dakayo nga Israelita, dakayo ti saksik; pinilikayo a nasion nga agserbi kaniak tapno maam-ammodak ken mamatikayo, ket maawatanyo a sisiak ti Dios. Malaksid kaniak, awan ti sabali a Dios; awan ti immun-una ngem siak, ket awanto met ti sumaruno.

¹¹“Siak ni Yahweh, siak la ti makaisalakan kadakayo.

¹²Impakpakaunak idi ti mapasamak, ket kalpasanna, immayak timmulong kadakayo. Awan ti didiosen a nakaaramid iti daytoy; dakayo ti mangsaksi kaniak.

¹³Siak ti Dios, ket agnanayonak a Dios. Awan ti makaliklik iti pannakabalinko, awan ti makabalbaliw iti aramidko.”

¹⁴Kastoy ti kuna ti Apo, ti nasantoan a Dios ti Israel, a mangisalakan kadakayo: “Tapno maisalakankayo, mangibaonakto iti armada a mangraut iti Babilonia. Rebbaekto dagiti ruangan ti siudad, ket agbalinto a sangsangit ti dir-i dagiti tattaona.

¹⁵Siak ni Yahweh, ti Nasantoan a Diosyo. Pinarsuaka, Israel, ket siak ti ariyo.”

¹⁶Idi un-unana, nangaramid ti Apo iti dalan iti baybay, maysa a pagnaan iti nadawel a danum.

¹⁷Inturongna ti nabileg nga armada iti pakadadaelanna, armada a buklen dagiti lugan a pakigubat ken dagiti nagkabalio. Limnedda ket didan limmung-aw; naiddepda a kasla silaw ti pabelo!

¹⁸Ngem kuna ti Apo: “Lipatenyo dagiti napalabas a pasamak; diyo panunotenen dagiti naaramid idi un-unana.

¹⁹Kitaenyo ti baro a banag nga aramidek. Mangrugin nga agparang—makitayo itan! Mangaramidak iti dalan iti let-ang; sadiay, ikkankayto kadagiti ubbog ti danum.

²⁰Uray dagiti atap nga animal itan-okdakto; idaydayawdakto dagiti abestrus ken lobo inton pagayusek dagiti karayan iti let-ang tapno adda inumen dagiti pinilik a tattao.

²¹Isuda dagiti tattao a pinarsuak nga agpaay kaniak— ket ikankantadanto ti pakaidaydayawak!”

²²Kuna ti Apo, “Ngem saan a siak ti nagdaydayawam; naumaka kaniak, sika, Israel.

²³Saanka a nangidatag iti karnero a mapuoran a kas daton kaniak. Saan a siak ti pinadayawam kadagiti sakrifisio nga indatonmo. Dika pinadagsenan iti panagdawatko iti sagutmo; dika rininggor iti panagkiddawko iti mapuoran nga insenso.

²⁴Dinak inggatangan iti insenso, wenno pinennek iti taba dagiti animalmo. Pinadagsenannak ketdi kadagiti basolmo; naumaak kadagiti dakes nga inar-aramidmo.

²⁵“Ngem siak ti Dios a mangikkat kadagiti basolmo, ket aramidek daytoy gapu iti kinadiosko. Diakton isingir dagiti basbasolmo.

²⁶Inta iti pangukoman, idatagmo dagiti pammabasolmo; ilawlawagmo ti rasonmo a mangipaneknek nga adda kalintegam!

²⁷Nagbasol daydi immuna a kapuonam; nagbasol kaniak dagidi pangulom.

²⁸Tinulawan dagiti agtuturaymo ti santuario. Daytoy ti gapuna nga inyegko ti pannakadadael iti Israel; impalubosko a maibabain dagiti tattaok.”