Read Iloko Isaiah 44 Bible Online

Isaiah 44 - Iloko bible

Isaiah 44

¹Kuna ti Apo: “Denggennak, Israel, sika nga adipenko; dakayo a pinilik a tattao, dakayo a kaputotan ni Jacob.

²Siak ni Yahweh a namarsua kenka; manipud nangrugi ti biagmo tinultulonganka. Dika agbuteng; sika ti adipenko, dakayo dagiti pinilik a tattao nga ipatpategko.

³“Ibuyatkonto ti danum iti namaga a daga; pataudekto dagiti karayan iti let-ang. Ibukbukkonto ti Espirituk kadagiti annakmo; bendisionakto dagiti kaputotam.

⁴Lumangtodanto a kas iti ruot a nasayaat ti padanumna, kas lidlidda iti igid dagiti waig.

⁵“Kunanto ti tunggal maysa, ‘Kukuanak ti Apo.’ Umaydanto tumipon kadagiti Israelita. Imarkadanto ti nagan ti Apo iti imada, ket ibilangto ti tunggal tao ti bagina a maysa kadagiti tattao ti Dios.”

⁶Kastoy ti kuna ti Apo a Mannakabalin-amin, ni Yahweh a mangituray ken mangsalaknib iti Israel: “Siak ti umuna ken siak ti maudi; awan sabali a Dios no di la siak.

⁷Adda kadi makaaramid iti inaramidko? Adda kadi makailawlawag iti amin a mapasamak iti masakbayan manipud idi mangrugi agingga nga aggibus ti tiempo?

⁸Dikay agbuteng, dakay a tattaok! Ammoyo a manipud idi un-unana agingga ita, impakpakaunak dagiti amin a mapasamak, ket dakayo ti mangsaksi kaniak! Adda kadi sabali pay a Dios? Adda kadi mannakabalin a Dios a diak pay nadamdamag?”

⁹Awan ti serserbi dagiti amin nga agar-aramid kadagiti imahen. Awan mamaay dagiti didiosen nga ipatpategda unay. Bulsek ken ignorante dagita nga agdaydayaw kadagitoy a didiosen. Maibabaindanto.

¹⁰Bambannog laeng ti agaramid iti ladawan a pagdaydayawan a kas maysa a dios!

¹¹Malalaisto ti amin nga agdaydayaw iti ladawan. Tao laeng a kas kadatayo dagiti agar-aramid kadagiti ladawan. Umayda koma ket mausigda—agbutengdanto ket maibabainda.

¹²Mangala ti platero iti metal ket sukogenna iti apuy. Alaen ti napigsa nga imana ti martilio ket pitpitenna ti metal agingga a masukog. Mabisinan, mawaw ken mabannog ti platero.

¹³Rukoden ti karpintero ti kayo. Mangala iti tisa ket agaramid iti ladawan ti imahen. Alaenna dagiti rimmientana sana kitikitan agingga a masukog ti imahen. Aramidenna ti imahen ti maysa a tao, nataer a lalaki a maikabil iti templo.

¹⁴Mabalin a mangpukan iti sedro nga usarenna wenno mangpili iti kayo a lugo wenno parwa iti kabakiran. Wenno agmula iti kayo a laurel ket agpannuray iti tudo a mangpadakkel iti kayo.

¹⁵Usaren ti tao ti dadduma a paset ti kayo a pagtungona. Aramidenna ti dadduma a kas imahen. Ti dadduma pasgedanna a paginudoanna ken panglutoanna iti tinapay. Ket ti dadduma aramidenna nga imahen a pagdaydayawanna a kas didiosenna.

¹⁶Puoranna ti dadduma. Pagtunoanna iti karne a sidana ket mabsog. Aginudo ket kunana, “Nagsayaat ket ti baranan. Nagpintasen nga apuy!”

¹⁷Ti nabati iti kayo, aramidenna nga imahen. Agdumog ket pagdaydayawanna. Pagkararaganna ket kunana, “Sika ti diosko—isalakannak!”

¹⁸Nakuneng unay dagiti kakasta a tattao. Dida ammo ti ar-aramidenda. Dida kayat a kitaen ken panunoten ti kinapudno.

¹⁹Awan nakem ti agar-aramid iti imahen. No adda panunotna, mabalinna a kuna, “Pinuorak ti dadduma a paset ti kayo, ket naglutoak iti tinapay iti beggangna. Nagtunoak iti karne a sindak. Ti dadduma inaramidko nga imahen nga isu ita ti pagdaydayawak, idinto ta sangkaputed laeng a kayo.”

²⁰Awan duma daytoy iti pannangan iti dapu. Inyaw-awan ti minamaag a panunotna, ket pulos a saanen a matulongan. Dina ammo a saan a pudno a dios ti imahen nga ig-iggamanna.

²¹Kuna ti Apo, “Laglagipem dagitoy, sika, Israel; laglagipem a sika ti adipenko. Pinarsuaka tapno agserbika kaniak, ket dikanto liplipatan.

²²Pinunasko dagiti basbasolmo, kasla ulep a pinukawko. Agsublika ngarud kaniak ta siak ti mangisalakan kenka.”

²³Agpukkawkayo iti rag-o, dakay a langlangit! Agpukkawkayo, dakay a nauneg a paset ti daga! Agpukkawkayo iti rag-o, dakay a bambantay, dakay a kaykayo iti kabakiran! Insalakan ti Apo dagiti tattaona nga Israelita, ket iti kasta, impakitana ti kinatan-okna.

²⁴“Siak ni Yahweh a namarsua ken mangisalakan kenka; siak ni Yahweh a namarsua iti isu amin a banag. Sisiak ti nangyukrad kadagiti langit; idi aramidek ti daga, awan timmulong kaniak.

²⁵Pagbalinek a maag dagiti mammuyon, ket diak patuloyen ti padto dagiti mammadles. Ipakitak a saan a pudno ti sao dagiti mamasirib, ket iparangko a minamaag ti kinasiribda.

²⁶Ngem no adda ipadto ti adipenko, no mangibaonak iti mangipakaammo kadagiti panggepko, ikagumaak a matungpal dagita a plano ken padto. Ibagak iti Jerusalem nga addanto manen tattao nga agnaed sadiay. Ibagak met kadagiti siudad ti Juda a mabangondanto manen. Manipud kadagiti rebrebba, tumakderto dagitoy a siudad.

²⁷Bilinek ti taaw ket agmaga.

²⁸Kunak ken ni Ciro, ‘Sika ti tudingak nga agturay, aramidemto ti kayatko nga aramidem; ibilinmonto a mabangon manen ti Jerusalem ken maisaad ti fondasion ti Templo.’”