Read Iloko Isaiah 45 Bible Online

Isaiah 45 - Iloko bible

Isaiah 45

¹Ni Ciro ti ari a pinili ni Yahweh! Dinutokanna a mangparmek kadagiti nasion, imbaonna a mangparukma kadagiti nabileg nga ari; ilukatto ni Yahweh kenkuana dagiti ruangan dagiti siudad. Kuna ni Yahweh ken ni Ciro,

²“Siakto ti mangisagana iti dalanmo. Simpaekto dagiti bambantay ken turturod. Rakrakekto dagiti bronse a ruangan; tukkolekto dagiti landok a balunetda.

³Ikkankanto kadagiti gameng nga aggapu kadagiti nasipnget, nalimed a lugar. Iti kasta, maammoamto a siak ni Yahweh, ket pinilinaka ti Dios ti Israel.

⁴Dutokanka a tumulong kadagiti Israelita, dagiti tattao a pinilik nga adipenko. Inikkanka iti naindaklan a pammadayaw, nupay dinak am-ammo.

⁵“Siak ni Yahweh, awan ti sabali a dios. Itedkonto ti pigsa a masapulmo, nupay dinak am-ammo.

⁶Aramidek daytoy tapno maammoan amin a tattao iti amin a suli ti lubong a siak ni Yahweh, ken awan ti sabali a Dios.

⁷Paaddaek ti lawag ken ti sipnget; yegko ti bendision ket idissuorko ti didigra. Siak, ni Yahweh, ti agaramid amin kadagitoy.

⁸Itedkonto ti balligi manipud langit kas iti tudo; aglukatto ti daga a mangawat kenkuana, ket agsabongto iti wayawaya ken hustisia. Siak, ni Yahweh, ti akinnakem a mapasamak amin dagitoy.”

⁹Asi pay ti makisuppiat iti nangdamili kenkuana, ta maysa laeng a banga kadagiti adu a banga. Saludsodenna kadi iti agdamdamili no ania ti ar-aramidenna? Pagduaduaanna kadi ti kabaelan ti nangdamili kenkuana?

¹⁰Adda kadi makaitured nga agkuna kadagiti nagannak kenkuana, “Apay nga inaramiddak a kastoy?”

¹¹Ni Yahweh a Nasantoan a Dios ti Israel ken mangbukel iti masakbayan, kunana: “Ania koma ti bibiangmo maipapan kadagiti annakko? Ania ti kalintegam a mangibaga ti rumbeng nga aramidek?

¹²Siak ti nangaramid iti daga ken namarsua iti sangkataoan nga agnaed kenkuana. Inyukradko dagiti langit babaen iti bilegko; inurnosko ti init, ti bulan ken dagiti bituen.

¹³Tinignayko ni Ciro a mangtungpal iti panggepko, ken mangpalinteg iti amin a banag. Simpaekto dagiti amin a dalan a pagnaanna; bangonennanto manen ti siudadko a Jerusalem, ket wayawayaannanto dagiti tattaok a naibalud. Awan nangtangdan wenno nangpasuksok kenkuana tapno aramidenna daytoy.” Daytoy ti sao ni Yahweh a Mannakabalin-amin.

¹⁴Kuna ni Yahweh iti Israel, “Kukuamto ti kinabaknang ti Egipto ken Etiopia, tagabuemto dagiti natatayag a tattao ti Seba; sikakawardanto a sumursurot kenka. Agrukbabdanto kenka ket kunada, ‘Adda ti Dios kenka, is-isu laeng ti Dios.

¹⁵Ti Dios ti Israel, maysa a Dios a saan a makita; isalakanna dagiti tattaona.

¹⁶Maibabainto dagiti amin nga agar-aramid iti imahen; malalaisdanto amin.

¹⁷Ngem insalakan ni Yahweh ti Israel, ket agnanayon ti balligina; pulos a dinto maibabain dagiti tattaona.’”

¹⁸Pinarsua ni Yahweh dagiti langit— isu laeng ti pudno a Dios! sinukog ken inaramidna ti daga— inaramidna a natibker ken mataginayon awan inggana. Saanna nga inaramid nga awan serserbina, no di ket pagnaedan dagiti tattao. Isu ti agkuna, “Siak ni Yahweh, ket awanen ti sabali a Dios.

¹⁹Saanak a nagsao iti nalimed, saanko met nga inlimed ti panggepko. Diak imbilin kadagiti Israelita a birokendak iti lugar a gusoguso. Siak ni Yahweh, ket pudno ti ibagak; ipakaammok no ania ti nalinteg.”

²⁰Kuna ni Yahweh, “Aguummongkayo, dakayo a tattao dagiti nasion, dakayo amin a nakalasat idi matnag ti pagarian, idatagyo dagiti bagbagiyo tapno mausigkayo. Nengneng dagiti mangilibut kadagiti imahen a didiosenda a kayo, ken agkararag kadagiti didiosen a saan a makaisalakan kadakuada! Pulos nga awan ti ammo dagitoy a tattao!

²¹Umaykayo ket idatagyo dagiti kasoyo iti pangukoman, bay-anyo nga agiinnuman dagiti naidarum. Siasino ti nangipadto idi un-unana, a daytoyto ti mapasamak? Saan aya a siak, ni Yahweh, ti Dios a mangisalakan kadagiti tattaona? Awanen ti sabali a Dios, malaksid kaniak.

²²“Agsublikayo kaniak tapno maisalakankayo, dakay a tattao iti entero a daga. Siak ti Dios, awan ti sabali.

²³Pudno ti ikarik ket saan a mabaliwan. Sipapasnekak a mangikari nga agparintumengto dagiti amin a tao iti sangoanak, ket isapatada a napudnoda kaniak.

²⁴“Kunadanto a siak lat' pagtaudan ti balligi ken pigsa; ngem maibabainto amin a gumura kaniak.

²⁵Siak, ni Yahweh, ti mangisalakanto kadagiti amin a kaputotan ni Jacob, ket idaydayawdakto.