Read Iloko Isaiah 46 Bible Online

Isaiah 46 - Iloko bible

Isaiah 46

¹“Daytoy ti kanibusanan dagiti didiosen ti Babilonia! Nagdaydayawan idi dagiti tattao dagiti didiosen a Bel ken Nebo. Ngem ita, naikargada kadagiti asno, ket dadagsen ida dagiti nabannog nga animal!

²Daytoy ti kanibusanan dagiti didiosen ti Babilonia. Saan a maisalakan dagiti imahen ti mismo a bagbagida, naagaw ken naitalawda.

³“Denggendak, dakay a kaputotan ni Jacob, dakay amin a natda kadagiti tattaok. Inay-aywanankayo manipud pannakayanakyo.

⁴Siak ti Diosyo ket aywanankayto agingga a duduogankayo. Pinarsuakayo ket aywanankayto; tulongan ken ikanawakayto.

⁵“Siasino ti pangidiliganyo kaniak,” kuna ni Yahweh. “Adda aya sabali a kapadak?

⁶Luktan dagiti tattao dagiti supotda ket ibukbokda dagiti balitok; timbangenda dagiti pirak. Manangdanda iti platero nga agaramid iti didiosen a pagrukbaban ken pagdaydayawanda.

⁷Baklayen ken awitenda; isaadda iti nairanta a pagyananna, ket adda sadiay, di makagaraw iti lugarna. No adda agkararag kenkuana dina masungbatan, ket no dumteng ti didigra dina met maisalakan.

⁸“Laglagipenyo daytoy, dakayo a managbasol; panunotenyo a naimbag dagiti inaramidko.

⁹Laglagipenyo dagiti napasamak idi un-unana; bigbigenyo a siak laeng ti Dios, ket awan ti sabali a kas kaniak.

¹⁰Manipud idi punganay, ti maaramid innak impadto; nabayagen nga imbagak ti mapasamakto. Impakaammok a matungpalto a matungpal dagiti panggepko.

¹¹Mangayabak iti kali nga aggapu iti Daya; sumippayotto a kas maysa a sawi, ket aramidenna ti pinanggepko. Nasaokon ket maaramidto.

¹²“Denggendak, dakay a nasukir a tattao, dakay a mangipagarup nga adayo pay ti balligi.

¹³Yasidegko ti aldaw ti panagballigi— saan unayen a mabayag. Saanto a mataktak ti panagballigik; isalakankonto ti Jerusalem, ket itedkonto ti dayaw ti Israel sadiay.”