Read Iloko Isaiah 49 Bible Online

Isaiah 49 - Iloko bible

Isaiah 49

¹Denggendak, dakay a purpuro, dakay a tattao nga agnaed iti adayo! Pinilinak ti Apo sakbay a nayanakak, ket dinutokannak nga adipenna.

²Pinagbalinna dagiti saok a kas natadem a kampilan; babaen kadagiti imana, sinalaknibannak! Pinagbalinnak a kasla pana, natirad ken sisasagana a maibiat.

³Kinunana kaniak, “Israel, sika ti adipenko. Gapu kenka, idaydayawdakto dagiti tattao.”

⁴Kinunak, “Awan serserbi ti nagbambannogak. Impanko ti amin a pigsak ngem awan ti nagapuanak.” Nupay kasta, agtalekak iti Apo a mangpalinteg iti amin a banag; gunggonaannakto gapu iti aramidko.

⁵Dinutokannak ti Apo sakbay a nayanakak; pinagbalinnak nga adipenna tapno isublik dagiti tattaona, tapno isublik dagiti nawarawara nga Israelita. Ikkannak ni Yahweh iti pammadayaw, isu ti gubuayan ti pigsak.

⁶Kinuna ti Apo kaniak, “Adda nangnangruna a trabaho nga ipaaramidko kenka nga adipenko! Saanmonto la nga isubli ti kinatan-ok dagiti Israelita a nakalasat, ngem pagbalinenkanto pay a silaw kadagiti pagilian— tapno maisalakan ti sangalubongan.”

⁷Kuna ti Nasantoan a Dios ken mangisalakan iti Israel iti tao a mauy-uyaw unay, gurguraen dagiti nasion ken adipen dagiti agtuturay: “Makitadakanto dagiti ar-ari ket tumakderda a mangipakita iti panagraemda kenka. Makitanto met daytoy dagiti prinsipe, ket agtameddanto a mangpadayaw kenka.” Matungpalto daytoy gapu ta pinili ti Apo ti adipenna; tungpalen ti nasantoan a Dios ti Israel dagiti karina.

⁸Kuna ti Apo kadagiti tattaona, “Inton dumteng ti tiempo nga isalakankayo, paraburankayto, ket sungbatakto ti asugyo. Aywanan ken salaknibankayto ket aramatenkayto iti pannakitulagko kadagiti amin a tattao. Pagnaedenkayto manen iti naglangalang a dagayo.

⁹Kunakto kadagiti balud, ‘Rummuarkayo!’ Kunakto met kadagiti adda iti nasipnget, ‘Agparangkayo!’ Mayarigdanto kadagiti karnero nga agar-arab iti katurturodan;

¹⁰pulos a didanto mawaw wenno mabisinan. Didanto agsagaba iti pudot ti init ken ti let-ang; ta idalanto ida ti mangay-ayat kadakuada. Iturongnanto ida kadagiti ubbog ti danum.

¹¹“Agaramidak iti dalan ti kabambantayan, mangisaganaak iti pagnaan dagiti tattaok.

¹²Dumteng dagiti tattaok manipud iti adayo a lugar; aggapuda iti laud ken iti amianan, kasta met iti Aswan iti abagatan.”

¹³Agkantakayo, dakay a langlangit! Ipukkawmo ti rag-om, sika a daga! Agkanta koma dagiti bambantay! Liwliwaento ti Apo dagiti tattaona; kaasiannanto ida nga agsagsagaba.

¹⁴Ngem kinuna dagiti tattao ti Jerusalem, “Binaybay-annatayo ti Apo! Nalipatannatayon!”

¹⁵Iti kastoy, daytoy ti sungbat ti Apo, “Mabalin aya a lipatan ti ina ti bukodna nga anak? Dina aya ayaten ti maladaga nga impasngayna? Uray no malipatan ti ina ti anakna, ni kaanoman dikanto lipatan.

¹⁶Jerusalem, ni kaanoman dikanto malipatan, insuratko ti naganmo kadagiti dakulapko.

¹⁷“Asidegen ti yaay dagiti mangtarimaan kenka, ket pumanawen dagiti nangdadael kenka.

¹⁸Iwarasmo ti panagkitam, ket kitaem ti mapaspasamak. Aguurnong dagiti tattaom—agsasangpetdan. Isapatak iti naganko a sibibiag a Dios, a pagpannakkelmonto dagiti tattaom kas iti nobia a mangipannakkel kadagiti alahasna.

¹⁹“Nadadael ken naglangalang ti pagiliam, ngem ita, saanen nga umanay a pagnaedan. Dagiti nangdadael kenka, mapapanawdanto iti bukodmo a daga.

²⁰Dagiti tattaom a nayanak iti daga a nakaipananda a kas balud, addanto aldaw a panagkunada kenka, ‘Nailet unay daytoy a lugar a yantayo, masapultayo ti nalawlawa a pagnaedan.’

²¹Iti kasta, kunamto iti bagim, ‘Siasino ti nangted kaniak kadagitoy nga ubbing? Natay dagiti annakko, ket diak naganaken. Naitalawak a kas balud ket nayadayoak— siasino ngarud ti nangpadakkel kadakuada? Maymaysaak a nabati, naggapuan ngarud dagitoy nga ubbing?’”

²²Kuna ni Apo Dios kadagiti tattaona: “Bilinekto dagiti nasion, ket isublidanto dagiti annakmo.

²³Dagitinto ar-ari ti pannakaamam; ket dagitinto reyna ti pannakainam. Agrukbabdanto iti sangoanam, sipapakumbabadanto nga agraem kenka. Iti kasta, maammoanyonto a siak ni Yahweh; awanto ti mapaay a dumawat iti tulongko.”

²⁴Maagawmo aya iti soldado ti sinamsamna? Maispalmo aya dagiti balud iti nauyong nga agturay?

²⁵Kastoy ti sungbat ti Apo, “Kastanto ti mapasamak. Maitalawto dagiti balud ti mannakigubat, maagawto ti sinamsan ti nauyong nga agturay. Gubatekto dagiti manggubat kenka, ket ispalekto dagiti annakmo.

²⁶Pagpipinnatayekto dagiti mangidadanes kenka; agpapasdanto nga agpapatay ken agunget. Maammoanto ti sangkataoan a siak, ni Yahweh, ti mangisalakan ken mangsubbot kenka. Maammoandanto a siak ti mannakabalin a Dios ti Israel.”