Read Iloko Isaiah 5 Bible Online

Isaiah 5 - Iloko bible

Isaiah 5

¹Dumngegkayo ta kantaek daytoy a kanta, kanta ti gayyemko ken ti kaubasanna: Adda idi kaubasan ti gayyemko iti nakadamdam-eg a turod.

²Kinalina ti daga ket inikkatna amin a batona; napili ken kasayaatan nga ubas dagiti immulana. Nangbangon iti torre a pagbantayanna, ket nagkali iti abut a pagpespesanna. Inurayna ti panagbunga dagiti mulana ngem naalsem amin dagiti ubas idi maluomda.

³Ita, kuna ti gayyemko, “Dakayo nga agnaed iti Jerusalem ken Juda, ania ti makunayo maipapan kaniak ken iti kaubasak?

⁴Inaramidko amin a pagsayaatan ti kaubasak. Apay ngarud a nagbunga iti naalsem a saan a kas iti nasam-it a ninamnamak?

⁵“Kastoy ti aramidek iti kaubasak. Ikkatek dagiti mula a pannakaaladna. Rebbaek ti bakudna ket bay-ak nga araben ken payatpayaten dagiti atap nga animal.

⁶Bay-ak nga agkaruotan. Diak arbasan dagiti ubas wenno kalian dagiti puonda. Bay-ak a kumotan dagiti sisiitan a mula ken kalkalunay. Diak ipalubos a matudoanda.”

⁷Ti Israel ti kaubasan ni Yahweh a Mannakabalin-amin; dagiti taga-Juda ti ubas nga immulana. Ninamnamana a naimbag ti aramidenda, ngem panagpapatay ketdi ti inaramidda. Ninamnamana a nalinteg ti aramidenda, ngem immawag iti hustisia dagiti indadanesda!

⁸Asikayo pay, dakayo nga aggatgatang iti balbalay ken taltalon a nayon dagiti sigud a balbalay ken taltalonyo. Iti saan a mabayag, awanton ti pagyanan ti padayo a tao ket dakdakayton ti agnaed iti daga.

⁹Nangngegko ti sao ti Apo a Mannakabalin-amin. Kinunana, “Agrakayanto dagitoy dadakkel ken napipintas a balbalay ket awanto ti nagyanda.

¹⁰Sangagalonto la nga arak ti maala iti uppat a hektaria a kaubasan. Sangasalupto laeng a trigo ti maapit iti sangapulo a salup a bukel a maimula.”

¹¹Asikayo pay, dakayo a nasapa a bumangon ket rugianyon ti aginum iti arak agingga a marabrabiyankayo. Kasta unay ti pannakabartekyo.

¹²Adda arpa, pandereta, flauta ken arak kadagiti fiestayo. Ngem diyo maawatan ti ar-aramiden ti Apo

¹³ket maitalawkayto a kas balud. Matayto iti bisin dagiti panguloyo, ket matayto iti waw dagiti kaaduan.

¹⁴Kayat ida nga alun-onen ti lubong dagiti natay, ket silulukat ti ngiwatna kadakuada. Alun-onenna dagiti natan-ok a tattao ti Jerusalem agraman dagiti naariwawa nga umili.

¹⁵Maibabainto ti tunggal maysa ket maipababanto ti amin a napalangguad.

¹⁶Ngem ipakita ni Yahweh a Mannakabalin-amin ti kinatan-okna babaen iti panangaramidna iti nalinteg. Iparangarangna ti kinasantona babaen iti panangukomna kadagiti tattaona.

¹⁷Kadagiti rebba dagiti siudad, agarabto dagiti urbon a karnero ken addanto pagaraban dagiti urbon ti kalding.

¹⁸Asikayo pay, dakayo a mangguyguyod iti kinadakes a kasla tali a naikawar kadakayo.

¹⁹Kunayo, “Aramiden koma a dagus ti Apo ti ibagana nga aramidenna tapno makitayo. Ibanag koman ti Nasantoan a Dios ti Israel dagiti panggepna. Kitaentayo no ania ti pampanunotenna.”

²⁰Asikayo pay, dakayo a mangibilang a naimbag ti dakes ket ti dakes, naimbag! Ibilangyo a sipnget ti lawag ket ti lawag, sipnget. Ibilangyo a nasam-it ti napait ket ti napait, nasam-it.

²¹Asikayo pay, dakayo a mangibilang a masirib ken nasikapkayo!

²²Asikayo pay, dakayo a nalatak iti panaginum iti arak! Natured ken bannuarkayo maipapan iti panagtempla iti arak!

²³Ngem pasuksokandakayo laeng, wayawayaanyon ti nakabasol ket lapdanyo ti awan basolna a mangtunton iti kalinteganna.

²⁴Ngarud, kas iti panagkaretket ti garami ken ti nagango a ruot no mapuoranda, malungsotto dagiti ramutyo ket malaylayto dagiti buselyo agingga a mayanginda gapu ta linaksidyo ti insuro kadatayo ti Apo a Mannakabalin-amin, ti Nasantoan a Dios ti Israel.

²⁵Kapungtot ti Apo dagiti tattaona ket inlayatna ti imana tapno dusaenna ida. Magunggonto dagiti bantay ket kaslanto rugit dagiti bangkay dagiti tattao nga agkaiwara kadagiti kalsada. Ngem uray no maaramid daytoy, dinto agbaaw ti pungtot ti Apo ket silalayatto latta ti imana a mangdusa.

²⁶Mangibayog ni Yahweh iti bandera a pangayab iti maysa a nasion nga adda iti adayo. Agsultip a mangayab kadagiti tattao iti ungto ti daga. Adtoyen nga umayda a sipapardas.

²⁷Awan mabannog kadakuada; awan ti maitibkol. Awan ti agdungsa wenno makaturog. Awan ti nalukay a barikes; awan mapugsat a kordon ti sandalias.

²⁸Natitirad dagiti panada ket nakasagana dagiti baida. Natangken a kas iti bato ti kuko ti saka dagiti kabalioda ket kasla alipugpog ti panagpuligos dagiti pilid ti luganda.

²⁹Agpukpukkaw dagiti mannakigubat. Kasda la leon nga agung-ungor a nakapatay iti animal ket itartarayda tapno awan ti mangagaw iti matukmaanda.

³⁰Inton dumteng dayta nga aldaw, ngerngerandanto ti Israel. Napigsanto ti ngerngerda a kas iti daranudor ti baybay. Kitaenyo daytoy a pagilian! Nakumotan iti sipnget ken panagsagaba! Inalun-on ti sipnget ti lawag.