Read Iloko Isaiah 53 Bible Online

Isaiah 53 - Iloko bible

Isaiah 53

¹Isungbat dagiti tattao: “Adda ngata mamati iti ipadamagmi ita? Siasino ngata ti makabigbig iti pannakabalin ti Apo iti daytoy?

²Nagayatan ti Apo a dumakkel ti adipenna a kas maysa a mula a nagramut iti namaga a daga. Awan takneng ken daegna tapno maawisnakami. Awan ti makaay-ayo a buyana tapno makayawankami.

³Inuy-uyaw ken saanmi nga inawat, inibturanna ti rigat ken panagsagaba. Awan kimmita kenkuana— dimi inkaskaso a kasla awan serserbina.

⁴“Ngem sinagabana dagiti sagabaentayo koma, ti rigat a datayo koma ti naglak-am imbaklayna. Impagaruptayo a ti rigat a naglabasanna maysa a dusa nga impatay ti Dios kenkuana.

⁵Ngem nasugat gapu kadagiti basbasoltayo, nasaplit gapu kadagiti dakes nga aramidtayo. Nawayawayaantayo gapu iti dusa a sinagabana, naagasantayo gapu iti pannakasapsaplitna.

⁶Mayarigtay amin iti karnero a napukaw, nagturong ti tunggal maysa iti kinaykayatna. Ngem impabaklay ti Apo kenkuana ti dusa a maipatay koma kadatayo.

⁷Naparparigat ngem inibturanna a sipapakumbaba; pulos a saan a nagsao, awan imbalikasna. Kasla urbon ti karnero a maipan iti pagpartian, kas iti karnero a mapukisan, pulos a saan a nagsao, awan insawangna.

⁸Natiliw ken naikeddeng a madusa, ket naipanaw a mapapatay; awan ti nangay-ay iti gasatna. Napapatay gapu kadagiti basol ti sangkataoan.

⁹Naitanem a naitipon kadagiti managdakdakes, naitabon iti denna dagiti babaknang, idinto a pulos nga awan dakes nga inaramidna wenno ulbod a sinaona.”

¹⁰Kuna ti Apo, “Nagayatak ti panagsagabana; maysa a daton ti ipapatayna a mangyeg iti pannakapakawan ti basol. Iti kasta, makitananto dagiti kaputotanna, ket atiddogto ti panagbiagna; isunto ti maaramat iti panagballigi ti panggepko.

¹¹Agrag-onto manen kalpasan ti panagtutuokna; maammoannanto nga adda serbi ti panagsagabana. Isu ti nalinteg nga adipenko, awitennanto ti dusa dagiti adu, ket gapu kenkuana pakawanekto ida.

¹²Ikkakto ngarud iti natan-ok a saad, saad a maipaay kadagiti natan-ok ken nabileg a tattao. Siaayat a nangted iti biagna, ket naibilang kadagiti managdakdakes. Innalana ti lugar dagiti adu a managbasol, ket sinagabana ti dusa a maipatay kadakuada.”