Read Iloko Isaiah 55 Bible Online

Isaiah 55 - Iloko bible

Isaiah 55

¹Kuna ti Apo, “Umaykayo, dakay amin a mawaw— adtoy ti danum! Umaykayo, dakayo nga awan kuartana— gumatangkay iti taraon ket mangankayo! Umaykayo gumatang iti arak ken gatas— gumatangkay ngem awan ti bayadanyo.

²Apay a gastosenyo ti kuartayo iti taraon a saan a makan? Apay a gastoenyo ti sueldoyo, ket kaskasdi nga awan pannakapnekyo? Denggendak ket aramidenyo ti ibagak tapno maramananyo ti kaimasan a makan.

³“Ipangagdak ita, dakay a tattaok, ket umaykayo kaniak; umaykayo ket maaddaankayto iti biag. Makitulagak kadakayo iti agnanayon a tulag, ket itedkonto kadakayo dagiti bendision nga inkarik ken ni David.

⁴Pinagbalinko a pangulo ken agturay kadagiti nasion; inaramatko a mangipakita kadakuada ti bilegko.

⁵Ayabamto dagiti ganggannaet a nasion; saandaka idi nga am-ammo, ngem ita, agtataraydan nga umay tumipon kenka. Siak, ni Yahweh a Diosmo, ti Nasantoan a Dios ti Israel, ti mangaramidto kadagitoy, ket ikkankanto iti dayaw ken dayag.”

⁶Birokenyo ti Apo, ita ta masarakan pay, umawagkayo kenkuana, ita ta asideg pay.

⁷Masapul nga isardeng dagiti managdakdakes ti wagas ti panagbiagda, ket baliwanda ti panagpampanunotda. Agsublida koma iti Apo a Diostayo, isu a manangngaasi ken madadaan a mamakawan.

⁸Kuna ti Apo, “Ti panunotko saan a kas iti panunotyo, ket ti aramidko saan a kas kadagiti aramidyo.

⁹No kasano a nangatngato ti langit ngem ti daga, kasta met a nangatngato ti wagas ken panunotko ngem ti wagas ken panunotyo.

¹⁰“Mayarig ti saok iti tudo ken niebe a mangsibog iti daga. Pagtuboenda dagiti mula; mangtedda iti bukel a bin-i ken taraon.

¹¹Kastanto met dagiti sao nga ibalikasko, aramidendanto nga aramiden dagiti tarigagayko, magun-oddanto ti panggep a nangibaonak kadakuada.

¹²“Naragsakkayto a pumanaw iti Babilonia; sitatalnakayto a mairuar iti siudad. Agkakantanto dagiti bambantay ken turturod, agpukkawto dagiti kaykayo gapu iti rag-o.

¹³Agtubonto dagiti saleng a saan ket a dagiti sisiitan. Agtubonto met dagiti arrayan a saan ket a dagiti kalkalunay. Daytoyto ti pagilasinan nga agpaut iti agnanayon, maysa a baton nga agpaay kaniak, ni Yahweh, gapu iti inaramidko.”