Read Iloko Isaiah 57 Bible Online

Isaiah 57 - Iloko bible

Isaiah 57

¹Matay dagiti naimbag a tattao ket awan ti makaawat wenno mangitaltalek. Ngamin, no matayda, maipanawda tapno mayadayoda iti didigra.

²Iti ipapatay dagiti nadalus ti biagna, masarakanda ti talna ken inana.

³Umaykayo ditoy tapno maukomkayo, dakayo a narugit a managbasol! Awan dumayo kadagiti agan-anito, mannakikamalala ken balangkantis a babbai.

⁴Siasino ti rabrabakenyo? Dakayo nga ulbod, siasino ti uy-uyawenyo?

⁵Agdaydayawkayo kadagiti didiosen ti nalabon nga apit babaen iti panagkakaiddayo iti sirok dagiti nasagradoan a kayoyo. Idatonyo dagiti annakyo ket puoranyo ida kadagiti rukib iti asideg dagiti waig.

⁶Mangalakayo sadiay kadagiti nalinis a bato sayo pagdaydayawan a kas didiosen. Agibukbokkayo iti arak a kas daton kadakuada ket yeganyo ida kadagiti daton a makan. Ipagarupyo kadi a maragsakanak kadagitoy nga ar-aramidenyo?

⁷Inkayo kadagiti tapaw dagiti bantay tapno agidatagkayo kadagiti daton ken makikaiddakayo sadiay.

⁸Ikabilyo dagiti naalas a didiosenyo iti asideg ti ruanganyo. Linipat ken tinallikudandak. Aglamolamokayo ket umulikayo kadagiti dadakkel a katreyo a kaduayo dagiti bayadanyo a makikaidda kadakayo. Ket sadiay, ipapasyo ti kinaderrepyo.

⁹Agbangbanglo ken agsapsapokayo iti lana ket inkay agdaydayaw ken ni didiosen a Moloc. Mangibaonkayo kadagiti mapan agsursor iti adayo, uray pay iti lubong dagiti natay, tapno ibirokandakayo kadagiti didiosen a pagdaydayawanyo.

¹⁰Bannogenyo dagiti bagbagiyo nga agbirbirok kadagiti sabali a didiosen ngem dikay agsardeng nga agbirok. Ipagarupyo a dagiti naalas a didiosenyo ti pagtaudan ti pigsayo, isu a pulos a dikay mapaksuyan.

¹¹Kuna ti Apo, “Siasino dagitoy a didiosen a mamagbuteng kadakayo tapno iti kasta, agulbodkayo kaniak ket lipatendak a mamimpinsan? Insardengyo kadin ti panagdaydayawyo kaniak agsipud ta nabayag a nagulimekak?

¹²Ipagarupyo a nasayaat ti aramidyo, ngem ibutaktakkonto ti kinadakesyo ket didakayto matulongan dagiti didiosenyo.

¹³No umawagkayo iti tulong, paisalakankayo man kadagiti didiosenyo! Itayabto ida ti pul-oy ti angin! Ngem agnaedto iti daga dagiti agtalek kaniak ket agdaydayawdanto kaniak iti Templok.”

¹⁴Kuna ti Apo, “Bay-anyo nga agsubli kaniak dagiti tattaok. Ikkatenyo dagiti amin a lapped iti pagnaanda! Aramidenyo ti dalan ket isaganayo!

¹⁵“Siak ti nangato ken Nasantoan a Dios nga agbiag iti agnanayon. Agnaedak iti nangato ken nasantoan a lugar ngem makipagnaedak met kadagiti tattao a napakumbaba ken nakakaasi, tapno mapasublik ti panagtalek ken namnamada.

¹⁶Siak ti nangted iti biag dagiti tattaok. Saan nga agtultuloy nga usigek ida ket saan met nga agpaut iti agnanayon ti pungtotko kadakuada.

¹⁷Nakapungtotak kadakuada gapu iti basol ken agumda, isu a dinusak ken binaybay-ak ida. Ngem nasukirda ket napanda iti kinaykayatda a papanan.

¹⁸“Nakitak dagiti aramidda ngem paimbagekto ida. Idalan ken tulongakto ida ket liwliwaekto dagiti agladladingit.

¹⁹Ikkak ti kappia iti amin, asideg man wenno adayo ti yanda. Paimbagekto dagiti tattaok.

²⁰Ngem mayarig dagiti managdakdakes iti nadawel a taaw a di agsardeng ti panagdalluyonna, ket mangyeg iti rugit ken pitak.

²¹Awan ti talna kadagiti managdakdakes,” kuna ti Apo.