Read Iloko Isaiah 58 Bible Online

Isaiah 58 - Iloko bible

Isaiah 58

¹Kuna ti Apo, “Agpukkawka iti amin a pigsam! Ipakaammom kadagiti tattaok nga Israelita dagiti basolda!

²Inaldaw nga agdaydayawda kaniak. Kunada nga aggagarda a makaammo kadagiti dalanko ken mangtungpal kadagiti lintegko. Kunada nga ikkak ida kadagiti linteg nga awan idumdumana ken pagaayatda ti agdaydayaw kaniak.”

³Saludsoden dagiti tattao, “Ania ti serserbi ti panagayunarmi no di met la ikaskaso ti Apo? Apay a parigatenmi ti bagbagimi no dina met la italtalek?” Kuna ti Apo kadakuada, “Kinapudnona, no agayunarkayo, birokenyo ti bukodyo a pagragsakan ket idadanesyo dagiti pagtartrabahoenyo.

⁴Agayunarkayo tapno agtungpal laeng daytoy iti kinadawel ket agririri ken agkakabilkayo. Ipagarupyo kadi nga ipangagko dagiti kararagyo iti kastoy a panagayunaryo?

⁵No agayunarkayo, pagsagabaenyo dagiti bagbagiyo, agdumogkayo a kas iti ruot, ket agyaplagkayo kadagiti nakersang a lupot ken warakiwakanyo iti dapu dagiti pagiddaanyo. Kasta ti kunayo a panagayunar? Ipagarupyo kadi a maragsakanak iti kasta?

⁶“Kastoy ti kayatko a panagayunar: Ikkatenyo ti kawar ti panangidadanes ken ti sangol ti kinakillo, ket wayawayaanyo dagiti maparparigat.

⁷Ibingayanyo iti taraonyo dagiti mabisin. Pasangbayenyo dagiti napanglaw nga awan pagtaenganna. Kawesanyo dagiti awan aruatenna, ket diyo ipaidam ti tulongyo kadagiti bukodyo a kakabagian.

⁸“No aramidenyo daytoy, kaslanto init iti bigbigat ti paraburko a mangraniag kadakayo, ket mabiitto a maimbagan dagiti sugatyo. Kanayonto nga addaak kadakayo tapno isalakankayo. Ti kaaddak ti mangsalaknibto kadakayo iti sadinoman nga ayanyo.

⁹No agkararagkayo, sungbatankayto. No awagandak, ipangagkayto. “No isardengyo ti panagidadanesyo, ti panangipakitayo iti gurayo ken liklikanyo dagiti dakes a sao,

¹⁰no pakanenyo dagiti mabisin ken no itedyo ti masapul dagiti napanglaw, naraniagto a kas iti agmatuon ti sipnget a nanglikmut kadakayo.

¹¹Kankanayonto nga idalankayo, ket itedkonto ti amin nga agkakaimbag a bambanag a kayatyo. Pagtalinaedenkayto a napigsa ken nasalun-at. Mayarigkayto iti hardin nga adu ti danumna, kas iti ubbog a pulos a di agmaga.

¹²Bangonento manen dagiti tattaoyo dagiti pasdek a nabayagen a narba. Agpatakderdanto manen kadagiti daan a fondasion. Maawagankayto a kas tattao a nangipatakder manen kadagiti bakud, ken nangbangon manen kadagiti narpuog a balbalay.”

¹³Kuna ti Apo, “No ibilangyo a nasagradoan ti Aldaw a Panaginana, ket diyo biroken ti bukodyo a pagimbagan iti dayta nga aldaw; no ipategyo ti nasantoan nga aldawko ket kas panangipakitayo iti panagdayawyo, dikay agbiahe, agtrabaho, wenno agsao iti awan kapapay-anna iti dayta nga aldaw,

¹⁴magun-odyonto ti rag-o a patauden ti panagserbiyo kaniak. Agraemto kadakayo ti entero a lubong. Lak-amenyonto ti kinabaknang ti daga nga intedko ken ni Jacob a kapuonanyo. Siak, ni Yahweh, ti nangibaga iti daytoy.”