Read Iloko Isaiah 60 Bible Online

Isaiah 60 - Iloko bible

Isaiah 60

¹Bumangonka, Jerusalem, ket agraniagka a kas init; ranraniagannaka ti dayag ti Apo!

²Kinasipngetto ti mangbungon kadagiti dadduma a nasion, ngem ti silaw ti Apo ti agraniag kenka, addanto kenka ti dayag ti kaaddana.

³Umasidegto dagiti pagilian iti silawmo, umayto met dagiti ari iti isisingising ti baro nga aldawmo!

⁴Iwarasmo ti matam ket kitaem ti mapaspasamak: aguummong dagiti tattaom tapno agawidda! Aggapunto iti adayo a daga dagiti lallaki nga annakmo; maubbanto a kasla ubbing dagiti babbai nga annakmo.

⁵Makitamto daytoy ket mapnokanto iti rag-o; agtigergerkanto iti nagpaiduma a ragsakmo. Mayegto kenka ti sanikua dagiti nasion; aggapunto iti ballasiw ti taaw ti kinabaknangda.

⁶Manipud Midian ken Efa, dumtengto ti adu a bunggoy a nagsakay kadagiti kamelio. Aggapudanto idiay Seba a mangyeg iti balitok ken insenso. Ipakaammonto dagiti tattao dagiti naindaklan nga aramid ti Apo!

⁷Amin a karnero ti Kedar ken Nebayot, mayegto kenka a kas sakrifisio. Maidatagdanto iti altar ti Apo a kas daton a makaparagsak iti Apo. Pagbalinento ti Apo ti Templona a nadaydayag pay.

⁸Ania dagitoy barko a kasla ulep ti panaglayagda? Kasdala kalapati nga agsubli iti pagaponanda.

⁹Isuda dagiti nagluganan dagiti tattao ti Dios; naggapuda iti adayo a daga, isangpetda ida. Nagitugotda kadagiti pirak ken balitok a pammadayaw iti nagan ni Yahweh, ti Nasantoan a Dios ti Israel, a nangisungsong kadagiti amin a nasion nga agraemda kadagiti tattaona.

¹⁰Kuna ti Apo iti Jerusalem, “Tarimnento dagiti ganggannaet ti bakudmo, ket agserbinto kenka dagiti arida. Dinusaka gapu iti pungtotko, ngem ita, paraburan ken kaasianka.

¹¹Aldaw-rabiinto a silulukat dagiti ruanganmo tapno yeg dagiti ari dagiti nasion dagiti kinabaknangda kenka.

¹²Ngem madadaelto a mamimpinsan dagiti nasion a saan nga agserbi kenka.

¹³“Mayegto kenka ti saleng, parwa ken aruo, dagiti kasayaatan a tarikayo iti bakir ti Libano. Maaramatdanto a pangtarimaan kenka, Jerusalem, maaramatdanto a pangpapintas iti Templok ken pangpadayag iti siudadko.

¹⁴Umayto dagiti annak dagiti namarparigat kenka, ket agruknoydanto a mangipakita iti panagraemda. Agdaydayawto iti sakaanam dagidi amin a nanglalais kenka. Awagandakanto iti ‘Ti siudad ti Apo,’ ‘Sion, ti Siudad ti Nasantoan a Dios ti Israel.’

¹⁵“Saankanton a mabaybay-an ken magurgura, siudad a napanawan ken naglangalang. Itan-ok ken papintasenkanto, maysa a lugar ti agnanayon a rag-o.

¹⁶Taripatoendakanto dagiti nasion ken ari a kas iti panangtaripato ti ina iti anakna. Maammoamto a siak, ni Yahweh, insalakanka, a ti mannakabalin a Dios ti Israel, wayawayaannaka.

¹⁷“Balitok ti yegkonto kenka a saan ket a bronse; pirak a saan ket a landok, bronse a di ket kayo. Ikkankanto iti landok a saan ket a bato. Didakanto parigaten dagiti mangituray kenka; addanto hustisia ken kappia iti panagturayda.

¹⁸Awanton ariwawa ti panagranggas iti dagam; awanton panagdadael a mangwarawara iti pagiliam. Kaslaakto bakud a mangsalaknib kenka; idaydayawnakto gapu ta insalakanka.

¹⁹“Dimonton masapul ti init a manglawag kenka iti aldaw wenno ti bulan a mangraniag kenka iti rabii. Ta siak nga Apo ti agnanayonto a silawmo, raniagannakanto ti lawag ti dayagko.

²⁰Agpatingganton ti panagladladingitmo. Siak, ni Yahweh, ti agnanayon a silawmo; napapautto ti lawagko ngem ti init ken bulan.

²¹Nalintegto ti aramid dagiti amin a tattaom, ket tagikuaendanto ti daga iti agnanayon. Immulak ida, inaramidko ida, tapno maipakita ti kinatan-okko iti amin a parsua.

²²Uray ti familia a kabassitan ken kanumoan agbalinto a natan-ok a kas iti nabileg a pagilian! Dagdagusekto nga ibanag daytoy inton dumteng ti umisu a tiempo. Siak ni Yahweh!”