Read Iloko Isaiah 63 Bible Online

Isaiah 63 - Iloko bible

Isaiah 63

¹Siasino daytoy sumungad, daytoy aggapu iti siudad ti Bosra iti Edom? Siasino daytoy nakadaydayag ti kawesna a nalabbaga, isu a magmagna a napnoan iti pigsa? Isu ti Apo, ti mannakabalin a mangisalakan! Umayna ipakaammo iti panagballigina.

²Apay a nalabbaga ti pagan-anayna? Apay a kasla iti pagan-anay ti tao nga agpespespes iti ubas a maaramid nga arak?

³Isungbat ti Apo, “Binaddebaddekko dagiti nasion a kasla ubas ket awan ti immay timmulong kaniak. Pinayatpayatko ida gapu iti pungtotko ket nagparsiak ti darada iti pagan-anayko.

⁴Inkeddengko a dimtengen ti tiempo nga isalakanko dagiti tattaok. Dimtengen ti tiempo a dusaek dagiti kabusorda.

⁵Nasdaawak a nakakita nga awan ti tumulong kaniak. Ngem pinapigsanak ti pungtotko ket nagballigiak.

⁶Iti pungtotko, binaddebaddekko dagiti pagilian ket nawarawarada. Imbuyatko ti darada iti daga.”

⁷Saritaek ti di agbaliw nga ayat ti Apo; itan-okko gapu iti amin nga inaramidna kadatayo. Pinaraburanna a sibubuslon dagiti Israelita, gapu iti asi ken di agbalbaliw nga ayatna.

⁸Kinuna ti Apo, “Tattaok ida, ket saandakto nga allilawen.” Ket insalakanna ida

⁹iti amin a sagsagabaenda. Saan nga anghel ti nangisalakan kadakuada no di ket ti Apo. Wen, ti Apo ti nangispal kadakuada gapu iti ayat ken asina. Kanayon nga inay-aywananna ida iti napalabas.

¹⁰Ngem nagsukirda kenkuana ket pinagladingitda. Ngarud, nagbalin ti Apo a kabusorda ket isu a mismo ti nakiranget kadakuada.

¹¹Ngem linagipda ti napalabas, daydi tiempo ni Moises nga adipen ti Apo ket sinaludsodda, “Sadino itan ti ayan ti Apo a nangisalakan kadagiti pangulo dagiti tattaona iti ipapatayda iti baybay? Ayan ti Apo a nangted ken ni Moises iti naisangsangayan a pannakabalin?

¹²Ayan ti Apo a nangaramat iti pannakabalinna ket nagaramid kadagiti naindaklan a banag babaen iti panangaramatna ken ni Moises? Biningayna ti danum ti baybay iti imatang dagiti tattaona tapno maidaydayaw iti agnanayon.”

¹³Idi inlasat ida ti Apo iti adalem a danum, natibker dagiti sakada a kas kadagiti kabalio ket pulos a dida naikaglis.

¹⁴Kas iti pannakaipan ti arban ti baka iti nalangto a pagaraban iti tanap, kasta met ti pannangted ti Apo iti panaginana kadagiti tattaona. Indalan ngarud ti Apo dagiti tattaona ket naidaydayaw ti naganna.

¹⁵O Apo, tannawagannakami dita langit a pagnaedam iti kinasanto ken kinadayagmo. Sadino ti ayan ti panangipategmo unay kadakami? Sadino ti ayan ti pannakabalinmo? Ayan ti ayat ken panangngaasim? Dinakam kad baybay-an.

¹⁶Sika ti Amami. Dinakam matulongan da Abraham ken Jacob a kapuonanmi, ngem sika, O Apo, ti Amami. Sika ti nangis-ispal kadakami.

¹⁷Apay nga ipalubosmo a sumiasikami kadagiti dalanmo? Apay nga ipalubosmo nga agsukirkami ket tallikudandaka? Agsublika, ipagpagapum kadagiti agserbi kenka, ipagpagapum kadagiti tattao a kukuam.

¹⁸Dandanin papanawen a mamimpinsan dagiti kabusormi dagiti tattaom ket tinulawanda ti Templo.

¹⁹Ibilangnakami a kasla saan a sika ti nangituray kadakami, a kasla saan a dakami ti tattaom.