Read Iloko Isaiah 65 Bible Online

Isaiah 65 - Iloko bible

Isaiah 65

¹Kinuna ti Apo, “Sidadaanak idi a mangipangag iti kararag dagiti tattaok ngem dida met nagkararag. Inur-urayko ida a mangbirok kaniak, ngem dida inggay-at ti mangbirok kaniak. Saan a nagkararag kaniak ti nasion, nupay sisasaganaak a mangibaga iti daytoy: ‘Adtoyak a tumulong kenka.’

²Sisasaganaak nga umawat kadagitoy a tattao, isuda a mangipapilit nga agaramid iti dakes ket mapanda iti kaykayatda.

³Dida agbain a kanayon a mamagpungtot kaniak. Agidatagda kadagiti sakrifisio nga idatdatag dagiti pagano kadagiti minuyongan a sagrado ken agpuorda iti insenso kadagiti altar dagiti pagano.

⁴Iti rabii, mapanda kadagiti rukib ken tantanem tapno makiumanda kadagiti espiritu dagiti natay. Agsida dagitoy a tattao iti karne ti baboy. Umigupda iti digo ti karne a naidatag iti panagdaton dagiti pagano.

⁵Kalpasanna, ibagada kadagiti tattao nga umadayoda ket dida sagiden ida ta nasantoanda unay. Diak maanusan dagiti kastoy a tattao. Kasla apuy a saan a maiddep ti pungtotko kadakuada.

⁶“Inkeddengkon ti dusa nga ipatayko kadakuada ket naisuraten ti sentensia. Diak pakawanen ti inaramidda ket dusaek ida

⁷gapu kadagiti basbasolda ken kadagiti basbasol dagiti kapuonanda. Nagpuorda iti insenso kadagiti turod a pagdaydayawan dagiti pagano ket dakes ti saoda maipapan kaniak. Dusaek ngarud ida a kas mayannatup kadagiti inaramidda.”

⁸Kuna ti Apo, “Awan ti mangdadael kadagiti nasayaat nga ubas. Aramidenda ketdi nga arak. Diak met dadaelen dagiti amin a tattaok—isalakankonto dagiti agserbi kaniak.

⁹Bendisionakto dagiti Israelita a nagtaud iti tribu ti Juda ket tagikuaento dagiti kaputotanda ti dagak a kabambantayan. Agnaedto sadiay dagiti pinilik a tattaok, isuda nga agserbi kaniak.

¹⁰Agdaydayawdanto kaniak ket ipaarabdanto dagiti karnero ken bakada iti Tanap ti Saron iti laud ken iti Tanap ti Riribuk iti daya.

¹¹“Ngem saanto a kasta ti maaramid kadakayo a mangtallikud kaniak, dakayo a di mangikankano iti Sion, ti nasantoan a bantayko ken agdaydayaw kada Gad ken Meni a didiosen ti gasat ken pagbanagan.

¹²Intudingkayo a matay iti kampilan gapu ta didak impangag idi inayabankayo. Didak inkankano idi nagsaoak. Kinaykayatyo ti nagsukir kaniak ken nagaramid iti dakes.

¹³Ibagak ngarud kadakayo nga adunto ti kanen ken inumen dagiti agdaydayaw ken agtulnog kaniak, ngem mabisinan ken mawawkayto. Naragsakdanto ngem maibabainkayto.

¹⁴Agkantadanto gapu iti rag-o, ngem agsangitkayto gapu iti ladingityo.

¹⁵Aramatento dagiti pinilik a tattao a pagilunod iti naganyo. Siak nga Apo Dios ti mangpapatayto kadakayo. Ngem ikkakto iti baro a nagan dagiti agtulnog kaniak.

¹⁶Siasinoman nga agnaed iti daga nga agkiddaw a mabendisionan, agdawatto iti napudno a Dios. Siasinoman nga agsapata, pagsapatananto ti nagan ti napudno a Dios. Awanton dagiti riribuk iti napalabas ket malipatandanton.”

¹⁷Kuna ti Apo, “Mangaramidak iti baro a langit ken baro a daga. Malipatanton a mamimpinsan dagiti napasamak iti napalabas.

¹⁸Agrag-o ken agragsakkayo iti agnanayon gapu iti parsuaek. Mapnonto iti rag-o ti baro a Jerusalem a parsuaek. Naragsakto dagiti tattaona.

¹⁹Mapnoakto met iti rag-o gapu iti Jerusalem ken kadagiti tattaona. Awanton ti agsangit sadiay, awanton ti umawag iti tulong.

²⁰Awanton ti matay a maladaga. Madanonto ti tunggal maysa ti naikeddeng a panagbiagna. Maibilang nga ubing pay ti tao a makadanon iti sangagasut a tawen. No adda matay sakbay ti naikeddeng a kaatiddog ti biagna, maipakita a dinusak.

²¹Agbangonto dagiti tattao iti balbalayda ket isudanto a mismo ti agnaed—dinto usaren ti sabali a tao. Agmuladanto iti ubas ket isudanto ti uminum iti arakna—dinto inumen ti sabali. Napautto ti biag dagiti tattaok a kas iti kapaut ti kayo. Isudanto ti naan-anay nga agnam-ay kadagiti nagbannoganda.

²³Agballigidanto iti amin nga aramidda ket awanto ti didigra a sumangbay kadagiti annakda. Bendisionakto ida ken dagiti kaputotanda iti amin a tiempo.

²⁴Sungbatakto ida uray madama pay laeng nga agkarkararagda.

²⁵Agkakaarabto dagiti lobo ken dagiti urbon ti karnero. Manganto ti leon iti garami a kas iti baka. Saanton a napeggad ti uleg. Awanton ti aniaman a makadangran wenno dakes idiay Sion a nasantoan a bantayko.”