Read Iloko Isaiah 66 Bible Online

Isaiah 66 - Iloko bible

Isaiah 66

¹Kuna ti Apo, “Ti langit ti tronok ket ti daga ti pagbatayak. Ania ngarud a kita ti balay ti mabalinyo a bangonen nga agpaay kaniak? Ania a kita ti lugar ti mabalinyo nga isagana a pagnaedak?

²Siak a mismo ti nangparsua iti sangalubongan! Maay-ayoak kadagiti napakumbaba ken managbabawi, kadagiti agbuteng ken agtulnog kaniak.

³“Aramiden dagiti tattao ti kaykayatda. Iti imatangda, awan pagdumaan dagiti aramidda. Agpartida man iti toro a baka a kas sakrifisio, wenno agidatagda iti tao a kas daton; agidatonda man iti urbon a karnero, wenno rungdoenda ti tengnged ti aso. Agidatagda iti daton a makan wenno agidatagda iti dara ti baboy. Agpuorda iti insenso wenno agkararagda iti imahen. Maragsakanda iti makarimon a panagdaydayaw.

⁴Iti kasta, idissuorkonto ti didigra kadakuada—dagiti banag a kabutengda, agsipud ta awan ti simmungbat idi immawagak wenno nangipangag idi nagsaoak. Kaykayatda ti agsukir kaniak ken ti agaramid iti dakes.”

⁵Dakayo nga agbuteng ken agtulnog iti Apo, denggenyo ti kunana, “Agsipud ta napudnokayo kaniak, guraendakayo ti sumagmamano kadagiti kailianyo, ket awan ti panangikankanoda kadakayo. Rabrabakendakayo ket kunada, ‘Kayatmi a makita a naragsakkayo; ngarud, ipakita koma ti Apo ti kinatan-okna ket isalakannakayo.’ Ngem isudanto ti maibabain!

⁶Denggenyo! Dayta arimbangaw iti siudad, dayta ikkis nga aggapu iti Templo, isut' timek ti Apo a mangdusdusa kadagiti kabusorna!

⁷“Mayarig ti nasantoan a siudadko iti ina a kellaat a nangipasngay iti anak a lalaki, a pulos a di nagpasikal.

⁸Adda kadin nakakita wenno nakadamag iti kastoy a pasamak? Adda kadin nasion a naipasngay iti maysa la nga aldaw? Saan a nasken nga agsagaba ti Sion iti mabayag sakbay a maipasngay ti nasion.

⁹Diyo ipagarup a lapdak ti pannakayanak dagiti tattaok a dandanin maipasngay.” Daytoy ti sao ti Apo.

¹⁰Makipagragsakkayo iti Jerusalem; agrag-okayo gapu kenkuana, dakay a mangipatpateg iti daytoy a siudad. Makipagrag-okayo itan kenkuana, dakay a nangdung-aw idi kenkuana.

¹¹Mairanudkayto iti kinarang-ayna, kas iti maladaga a sumuso iti inana.

¹²Kuna ti Apo, “Itedkonto kadakayo ti agnanayon a kinarang-ay. Kaslanto karayan a di agmaga ti panagayus ti kinabaknang dagiti pagilian nga umay kadakayo, kas iti karayan a di agmaga. Mayarigkayto iti maladaga a paspasusoen ti inana, ub-ubbaen ken dungdungoenna.

¹³Liwliwaenkayto idiay Jerusalem a kas iti panangliwliwa ti maysa nga ina iti anakna.

¹⁴Agragsakkayto inton makitayo a mapasamak daytoy. Papigsaen ken pasalun-atennakayto. Iti kasta, maammoanyonto a siak, ni Yahweh, tulongak dagiti agtulnog kaniak, ket idissuorkonto ti pungtotko kadagiti kabusorko.”

¹⁵Umayto ti Apo a buyogen ti apuy. Agluganto iti payak ti napigsa nga angin tapno dusaenna dagiti kapungtotna.

¹⁶Babaen iti apuy ken kampilan dusaennanto dagiti amin a tattao ti lubong a masarakanna a nakabasol, ket mataydanto.

¹⁷Kuna ti Apo, “Asidegen ti kanibusanan dagiti mangdalus kadagiti bagbagida kas mayannurot iti alagaden ti panagdaydayaw dagiti pagano, ket aglibotda kadagiti minuyongan a sagrado. Wen, asidegen ti kanibusanan dagiti agsida iti karne ti baboy ken bao ken kadagiti dadduma a makarimon a taraon.

¹⁸Ammok dagiti panunot ken aramidda. “Umayko ummongen dagiti tattao ti amin a nasion. Inton dumtengda, maimatangandanto no kasano ti kinabilegko,

¹⁹ket maammoandanto a siak ti mangdusa kadakuada. Ngem ispalekto ti sumagmamano kadakuada tapno maibaonda kadagiti pagilian ken kadagiti adayo a daga a dipay nakadamag kaniak wenno nakakita iti dayag ken pannakabalinko. Ibaonkonto ida idiay Espania, Libya ken Lydia, agraman dagiti pumapana a tattaona ken idiay Tubal ken Grecia. Ibagadanto kadagitoy a nasion ti kinatan-okko.

²⁰Alaendanto dagiti amin a kailianyo manipud kadagiti pagilian ket yawiddanto ida a kas sagut kaniak. Sumangpetdanto a silulugan kadagiti kabalio, mulo, kamelio, lugan a pakigubat ken karison. Maipandanto iti nasantoan a bantayko idiay Jerusalem, kas ipapan dagiti Israelita iti Templok tapno agidatagda kadagiti daton a makan, a naikarga iti nadalus nga alikamen.

²¹Pagbalinekto a papadi ken Levita ti sumagmamano kadakuada.

²²“Kas iti panagpaut ti baro a langit ken ti baro a daga babaen iti bilegko, kastanto met ti panagpaut dagiti kaputotanyo ken ti naganyo.

²³Tunggal Fiesta ti Lutuad ken Aldaw a Panaginana, umayto ditoy Jerusalem dagiti tattao iti amin a nasion tapno agdaydayawda kaniak,” kuna ti Apo.

²⁴“Bayat ti ipapanawda, makitadanto dagiti bangkay dagiti nagsukir kaniak. Pulos a dinto matay dagiti igges nga agkaan kadagiti bangkayda, ket dinto met maiddep ti apuy a manguram kadakuada. Karimonto ida dagiti amin a tattao a makakita kadakuada.”