Read Iloko Isaiah 7 Bible Online

Isaiah 7 - Iloko bible

Isaiah 7

¹Rimsua ti gubat bayat ti panagturay iti Juda ni Ari Ahaz nga anak ni Jotam ken apoko ni Uzzias. Rinaut da Rezin nga ari ti Siria ken Peka nga anak ni Remalias nga ari ti Israel ti Jerusalem ngem dida naparmek ti siudad.

²Idi maipadamag iti ari ti Juda nga addan dagiti armada ti Siria iti sakup ti Israel, kasta unay ti butengna, kasta met amin a tattaona ket nagpigergerda a kas kadagiti kayo a daldalapusen ti angin.

³Kinuna ni Yahweh ken ni Isaias, “Itugotmo ni Sear Jasub nga anakmo ket inkay sabten ni Ari Ahaz. Masarakanyonto ti ari iti dalan a pagtartrabahoan dagiti agar-aramid iti lupot, iti pungto ti kanal a pagayusan ti danum nga aggapu iti akingngato a dan-aw.

⁴Ibagam kenkuana nga agsiput, saan a maringgoran ket saan nga agbuteng wenno mariribukan. Ibagam kenkuana a saan a napeggad ti pungtot ni Ari Rezin ken dagiti Sirio a tattaona ken ni Ari Peka. Mayarig laeng ti pungtotna iti asuk ti dua a sumsumged a kayo.

⁵Nagtulag ti ari ti Siria ken ari ti Israel.

⁶Rantada a sakupen ti Juda, butbutngenda dagiti tattao tapno kumapponda kadakuada ket isaadda ti anak ni Tabeel nga agturay a kas ari.

⁷“Ngem siak, ni Yahweh, ipakaammok a pulos a saan a mapasamak daytoy.

⁸Apay? Gapu ta saan a napigpigsa ti Siria ngem ti Damasco a kabesera a siudadna. Saan met a napigpigsa ti Damasco ngem ni Ari Rezin. No maipapan iti Israel, iti 65 a tawen maparigatto iti kasta unay ket saanton a maysa a nasion.

⁹Saan a napigpigsa ti Israel ngem ti Samaria a kabesera a siudadna. Saan met a napigpigsa ti Samaria ngem ni Ari Peka. “No saan a napigsa ti pammatiyo, pulos a dikayto agbayag.”

¹⁰Sabali manen a mensahe ti impakaammo ni Yahweh ken ni Ahaz:

¹¹“Agkiddawka iti Apo a Diosmo ti pagilasinan. Mabalin nga aggapu iti pagilasinan iti yuyeng ti lubong dagiti natay wenno idiay ngato sadi langit.”

¹²Insungbat ni Ahaz, “Saanak nga agkiddaw iti pagilasinan. Saanko a suoten ti Apo.”

¹³Iti daytoy, kinuna ni Isaias, “Dumngegka, ita, sika a kaputotan ni Ari David. Dika aya mapnek a mangibus iti anus ti tao ta ibusem pay ti anus ti Dios?

¹⁴Ngarud, ti Apo a mismo ti mangted kenka iti pagilasinan. Adtoy, agsikogto ti maysa nga agtutubo a balasang. Aganakto iti lalaki ket panagananna iti Immanuel.

¹⁵Inton dakkelen ket ammonan a liklikan ti dakes ken pilien ti naimbag, gatas ken diro ti taraonnanto.

¹⁶Uray iti sakbay ti idadateng dayta a tiempo, aglangalangton dagiti daga nga iturayan dagita dua nga ari a pagbutbutnganyo.

¹⁷“Yegto ti Apo kenka, kadagiti tattaom ken iti entero a familiam, dagiti aldaw dagiti didigra a nakarkaro ngem dagidi didigra a dimteng manipud simmina ti pagarian ti Israel iti Juda—yegnanto kadakayo ti ari ti Asiria!

¹⁸“Inton dumteng dayta a tiempo, agsultipto ti Apo a kas pagilasinan dagiti Egipcio ket umaydanto a kasla pangen ti ngilaw. Aggapudanto kadagiti kaadayoan a sanga ti Karayan Nile. Umayto met dagiti taga-Asiria ket kasdanto la pangen ti uyokan.

¹⁹Sakupendanto dagiti kabatbatoan a tanap, dagiti rukib kadagiti kabatoan ket agsaknapdanto iti amin a siitsiitan a mula ken pagpaaraban.

²⁰“Inton dumteng dayta a tiempo, manangdanto ti Apo iti barbero iti ballasiw ti Eufrates—ti ari ti Asiria!—ket kuskosannanto ti uloyo, ibarbasannakayto ken kiskisannanto dagiti sakayo.

²¹“Inton dumteng dayta nga aldaw, uray no maymaysa ti baka ti maysa a mannalon ken dudua ti kaldingna,

²²adunto ti maitedda a gatas ket addanto amin a kasapulanna. Wen, addanto gatas ken diro a taraon dagiti amin a natda iti daga.

²³“Inton dumteng dayta nga aldaw, agtubonto dagiti siitsiitan a mula ken kalkalunay kadagiti nasayaat a kaubasan a namulaan iti rinibu a kapuon ti ubas ken agpateg ti tunggal kaubasan iti sangaribu a bagi ti pirak.

²⁴Awanto ti makaitured a mapan sadiay malaksid no adda armasna a bai ken pana. Wen, agbalinto a nasamek a kasisiitan ti entero a daga.

²⁵Amin a katurturodan a namulmulaan idi, agbalindanto a nasamek a kasisiitan ket mabutengton ti tao a mapan sadiay. Pagarabanton dagiti baka ken karnero.”