Read Iloko Isaiah 8 Bible Online

Isaiah 8 - Iloko bible

Isaiah 8

¹Kinuna ni Yahweh kaniak, “Mangalaka iti dakkel a pagsuratan ket isuratmo iti dadakkel a letra: ‘Maher-salal-has-baz.’

²Mangalaka iti dua a mapagtalkan a lallaki nga agserbi a saksi, ni Urias a padi ken ni Zacarias nga anak ni Jeberekias.”

³Iti saan a nabayag kalpasanna, nagsikog ti asawak. Idi maipasngay ti lalaki nga anakmi, imbaga kaniak ni Yahweh a ti naganna ket “Maher-salal-has-baz.”

⁴Sakbay a mabalikas ti ubing ti “Ina” ken “Ama,” italawto ti ari ti Asiria ti amin a sanikua ti Damasco ken ti amin a sinamsam ti Samaria.

⁵Nagsao manen kaniak ti Apo.

⁶Kinunana, “Gapu ta linaksid dagitoy a tattao ti nalinak a danum ti Waig Siloa ken agtigergerda iti sango ni Ari Rezin ken Ari Peka,

⁷siak nga Apo, yegkonto ti emperador ti Asiria ken dagiti amin a soldadona a mangraut iti Juda. Dumarupdanto a kas iti danum nga aggapu iti Karayan Eufrates no dumakkel ti karayan a manglapunos iti amin a teppangna.

⁸Layusendanto ti Juda; ngumatodanto a kasla danum agingga iti abaga ket malapunos ti amin.” Immanuel! Siuukrad dagiti payakna a mangsalaknib iti daga.

⁹Sibubutengkayo nga aguummong, dakayo a nasion! Dumngegkayo, dakayo nga adda iti adayo a daga. Uray no agsaganakayo a makigubat, agbutengkayto! Wen, agsaganakayo ngem agbutengkayo!

¹⁰Agplanokayo ngem dinto agballigi dagiti panggepyo. Agsaokayo iti kaykayatyo! Ngem awanto ti serserbina ta adda kadakami ti Dios.

¹¹Babaen iti dakkel a pannakabalin ni Yahweh, pinakdaarannak a saanak a magna iti dalan a pagpagnaan dagiti tattao. Kinunana,

¹²“Saanka a makiraman kadagiti dakes a panggep dagiti tattao ket saanka met nga agbuteng kadagiti banag a kabutengda.

¹³Laglagipem a siak, ni Yahweh a Mannakabalin-amin, nasantoanak; siak ti masapul a kabutengmo.

¹⁴Gapu iti kinasantok a mangabbukay iti panagdaydayaw, mayarigak iti bato a pakaitibkolan dagiti tattao; kaslaak la palab-og a pakaitinnagan dagiti tattao kadagiti pagarian ti Juda ken Israel ken dagiti agnaed iti Jerusalem.

¹⁵Adunto ti maitibkol ken matnag. Matnagdanto ket marumrumekda. Maipalab-ogdanto.”

¹⁶Dakayo nga adalak, salluadan ken taginayonenyo dagiti mensahe nga inted kaniak ti Apo.

¹⁷Inlemmengan ti Apo dagiti tattaona ngem agtalekak kenkuana ket isu ti pangnamnamaak.

¹⁸Adtoykami kadagiti annakko nga inted kaniak ti Apo a Mannakabalin-amin a naisaad ti tronona idiay Bantay Sion. Imbaonnakami a kas sibibiag a mensahe kadagiti Israelita.

¹⁹Ibaganto dagiti tattao a makiumankayo kadagiti mammadles ken mammuyon nga agar-arasaas ken agtantanamitim. Addanto agkuna, “Makiumankayo kadagiti mammadles ken mammuyon nga agar-arasaas ken agtantanamitim.” Ngem saan kadi a ti Dios ti pakiumanan dagiti tattao? Rumbeng kadi a makiumanda kadagiti natay nga agpaay kadagiti sibibiag?

²⁰Kastoyto ti isungbatyo kadakuada, “Ipangagyo ti isursuro kadakayo ti Apo! Diyo ipangag dagiti makiuman kadagiti natay ta awan magunggonayo iti ibagada kadakayo.”

²¹Maupay ken mabisbisinanto dagiti tattao nga agalla-alla iti daga. Gapu iti bisin ken pungtotda, ilunoddanto ti arida ken ti Diosda. Uray tumangaddanto sadi langit

²²wenno mulenglenganda ti daga, awanto ti makitada no di pasig a rigat ken sipnget, ti nakabutbuteng a sipnget a pakaituronganda.