Read Iloko Isaiah 9 Bible Online

Isaiah 9 - Iloko bible

Isaiah 9

¹Pulos nga awanto ti pamuspusanda tapno malisianda daytoy a tiempo ti rigat. Naibabain idi ti daga dagiti tribu ti Zabulon ken Neftali. Ngem iti masakbayan, maitan-okto daytoy a daga manipud Mediterranean nga agpadaya iti daga ti ballasiw ti Jordan agingga iti Galilea a taeng dagiti ganggannaet.

²Dagiti tattao a nagna iti kasipngetan nakitada ti lawag a nagpaidumat' raniagna! Nagnaedda iti daga dagiti anniniwan ngem ita agraniag kadakuada ti lawag.

³Kasta unay ti ragsakda, O Apo; inyegmo ti rag-oda. Gapu iti inaramidmo, agragsakda a kas kadagiti tattao a naragsak no agan-anida wenno bingbingayenda dagiti sinamsamda.

⁴Inikkatmo ti sangol a dadagsenda, tinukkolmo ti pang-or a nangparigat kadakuada. Pinarmekmo ti pagilian a nangidadanes ken nanggundaway kadagiti tattaom a kas iti panangparmekmo iti armada ti Midian idi un-unana.

⁵Mapuoranto dagiti amin a botas ken dagiti daradara a pagan-anay dagiti soldado a rimmaut.

⁶Naipasngay kadatayo ti maysa nga ubing! Adda ubing a lalaki a naited kadatayo! Ket isunto ti mangituray kadatayo! Maawaganto iti, “Nakaskasdaw a Mammagbaga,” “Mannakabalin a Dios,” “Agnanayon nga Ama,” “Prinsipe ti Kappia.”

⁷Dumakkelto a dumakkel ti bilegna a kas ari; addanto latta kappia iti pagarianna. Isunto ti sumukat ken ni Ari David nga agturay. Ibataynanto ti turayna iti kinapudno ken kinalinteg manipud ita ingganat' inggana. Aramiden nga aramiden amin daytoy ti Apo a Mannakabalin-amin.

⁸Impatay ti Apo ti dusa iti pagarian ti Israel, kadagiti kaputotan ni Jacob.

⁹Maammoanto dagiti amin nga Israelita ken dagiti agnaed iti siudad ti Samaria nga inaramidna daytoy. Ita, natangsit ken napalangguadda. Kunada,

¹⁰“Narban dagiti patakder a naaramid iti ladrilio ngem agipatakderkaminto iti sukatda a naaramid iti bato. Naikkaten dagiti awanan a sikamoro ngem suktanminto ida iti kasayaatan a sedro.”

¹¹Sinugsogan ti Apo dagiti kabusorda tapno rautenda ida.

¹²Iti daya ken iti laud, sisasagana ti Siria ken ti Filistia a mangalun-on iti Israel. Uray no kasta, saan nga agbaaw ti pungtot ti Apo ket silalayat pay laeng ti imana a mangdusa.

¹³Saan a nagbabawi dagiti Israelita. Uray no dinusa ida ti Apo a Mannakabalin-amin, saanda a nagsubli kenkuana.

¹⁴Iti las-ud ti maysa nga aldaw, dusaento ti Apo dagiti pangulo ti Israel agraman dagiti tattaona. Isinananto iti ulo ken ipus, ti sanga ken bulong.

¹⁵Dagiti lallakay ken mararaem isuda ti ulo. Dagiti profeta a mangisursuro iti kinaulbod isuda ti ipus!

¹⁶Dagiti pangulo dagiti Israelita ti nangallilaw ken nangyaw-awan a namimpinsan kadakuada.

¹⁷Iti kasta, saanto nga ipalubos ti Apo nga adda makalasat nga agtutubo a lalaki. Awanto ti balo a babai ken ulila a kaasianna. Ngamin, awanan Dios dagiti tattao ken managdakdakesda. Dakes ti sawen ti tunggal maysa. Ngem uray no kasta, saanto nga agbaaw ti pungtot ti Apo ket silalayat pay laeng ti imana a mangdusa.

¹⁸Mayarig ti kinadakes dagiti tattao iti apuy a manguram kadagiti siitsiitan a mula ken kalkalunay. Sumged a kas apuy iti bakir a pagtaudan dagiti umasimbuyok nga asuk.

¹⁹Gapu ta makapungtot ti Apo a Mannakabalin-amin, kasla iti apuy ti pannusana nga agkayamkam iti entero a daga a mangdadael kadagiti tattao, ket ikaluya ti tunggal maysa ti bagina.

²⁰Iti amin a paset ti pagilian, kanen dagiti tattao ti aniaman a makan a magammatanda ngem pulos a saanda a mabsog. Kanenda uray dagiti bukodda nga annak!

²¹Aggugubat dagiti tattao ti Manases ken Efraim ngem agmaymaysada a mangraut iti Juda. Uray no kasta, saan nga agbaaw ti pungtot ti Apo ket silalayat pay laeng ti imana a mangdusa.