Read Iloko Leviticus 1 Bible Online

Leviticus 1 - Iloko bible

Leviticus 1

¹Inayaban ni Yahweh ni Moises manipud iti Tolda ti Dios ket intedna dagitoy nga alagaden

²dagiti Israelita no agidatonda. No adda mangidatag iti daton a mapuoran, mabalin a maysa kadagiti bakana, wenno karnero, wenno kaldingna.

³No maysa kadagiti bakana ti idatagna a kas sakrifisio, mangted iti toro nga awan pakapilawanna ket ipanna iti ruangan ti Tolda ti Dios tapno awaten ni Yahweh.

⁴Ipatayna ti imana iti ulo ti animal ket maawatto a kas daton a mangikkat kadagiti basbasolna.

⁵Patayennanto ti toro sadiay, ket idatag dagiti papadi a kapuonan ni Aaron ti dara ti animal ken ni Yahweh sada ibuyat kadagiti igid ti altar nga adda iti ruangan ti Tolda.

⁶Lalatenna ti animal sana rangrangkayen.

⁷Urnosen dagiti papadi dagiti kayo a pagsungrod iti rabaw ti altar sada aronan.

⁸Iparabawdanto dagiti narangrangkay a paset ti animal iti apuy, agraman ti ulo ken ti taba.

⁹Buggoan ti mangidaton dagiti lalaem ken dagiti kammaudi a saka ti animal. Paggigiddanento ti padi a puoran dagiti daton iti rabaw ti altar, kas nabanglo a daton iti Apo.

¹⁰No karnero wenno kalding ti maidaton, masapul a kalakian ken awan depektona ti idatagna.

¹¹Patayennanto daytoy iti akin-amianan a paset ti altar, ket ibuyat dagiti papadi ti dara ti animal kadagiti uppat a sikigan ti altar.

¹²Kalpasan ti panangrangrangkayna, iparabaw ti padi dagiti amin a paset ti animal agraman ti ulo ken ti taba iti sumsumged a kayo iti altar.

¹³Mabuggoan nga umuna dagiti lalaem ken dagiti kammaudi a saka ti animal ket mapuoranda iti altar. Makaay-ayo ken nabanglo daytoy a daton ken ni Yahweh.

¹⁴No tumatayab ti datonna a mapuoran, masapul a pagaw wenno sibong ti kalapati ti idatagna.

¹⁵Ipanto ti padi iti altar, tiritirenna sana pulsoten ti tengnged ti tumatayab ket puoranna sadiay ti ulo. Maipaaruyot ti darana iti sikigan ti altar.

¹⁶Ikkatenna ti kinarakaran ken dagiti nagyanna sana ibelleng iti akindaya a paset ti altar a pakaikabilan iti dapu.

¹⁷Pisangenna ti bagi ti tumatayab, ngem dina isinsina dagiti payakna sananto puoran ti sibubukel a tumatayab iti rabaw ti altar. Makaay-ayo ken nabanglo daytoy a daton iti Apo.