Read Iloko Leviticus 10 Bible Online

Leviticus 10 - Iloko bible

Leviticus 10

¹Nangala da Nadab ken Abiu nga annak ni Aaron iti saggaysada a pagpuoran iti insenso. Kinargaanda iti beggang, inikkanda iti insenso ket indatagda ken ni Yahweh. Ngem saan a nasantoan ti apuy nga inaramatda gapu ta saanda nga inaramid ti imbilin ni Yahweh kadakuada nga idatagda.

²Pagammoan, nangibaon ni Yahweh iti apuy a nangpuor kadakuada agingga a natayda sadiay iti imatang ni Yahweh.

³Kalpasanna, kinuna ni Moises ken ni Aaron, “Daytoy ti kayat a sawen ti Apo idi kinunana, ‘Masapul a raemen dagiti amin nga agserserbi kaniak ti kinasantok. Iparangarangkonto ti dayagko kadagiti tattaok.’” Ngem nagulimek ni Aaron.

⁴Inayaban ni Moises da Misael ken Elisafan nga annak ni Uzziel nga uliteg ni Aaron. Kinunana kadakuada, “Alaenyo dagiti bangkay dagiti kabagianyo iti nasagradoan a Tolda ket ipanyo ida iti ruar ti kampo.”

⁵Ket napanda binagkat dagiti bangkay a sikakawes pay laeng sada impan iti ruar ti kampo, kas imbilin ni Moises.

⁶Kinuna ni Moises ken ni Aaron ken kadagiti annakna nga Eleazar ken Itamar, “Diyo kusokusoen dagiti buokyo wenno ray-aben dagiti pagan-anayyo a mangipakita iti panagladingityo. No aramidenyo dayta, mataykayo ket kapungtot ti Apo ti entero a gimong. Ngem mapalubosan amin a padayo nga Israelita a mangdung-aw iti pannakapapatayda iti apuy nga inyeg ti Apo.

⁷Tapno saankayo a matay, dikay pumampanaw iti ruangan ti Tolda ti Dios gapu ta naikonsagrarkayo babaen iti lana ti Apo.” Tinungpalda ti imbaga ni Moises.

⁸Kinuna ni Yahweh ken ni Aaron,

⁹“No sumrekka ken dagiti annakmo iti Tolda, kitaenyo a saankayo a nakainum iti arak wenno aniaman a makabartek amangan ta mataykayo. Linteg daytoy a masapul nga annuroten dagiti amin a kaputotanyo.

¹⁰Rebbengna a paggiddiatenyo dagiti banag a kukua ti Dios ken dagiti gagangay a maaramat, dagiti nadalus iti imatang ti linteg ken dagiti saan a nadalus.

¹¹Rumbeng nga isuroyo kadagiti Israelita dagiti amin a linteg nga intedko ken ni Moises.”

¹²Kinuna ni Moises ken ni Aaron ken kadagiti nabati nga annakna nga Eleazar ken Itamar, “Alaenyo ti natda iti daton a makan a naidatag iti Apo ket aramidenyo a tinapay nga awan lebadurana. Gapu ta nasantoan unay daytoy a daton, masapul a kanenyo iti abay ti altar.

¹³Wen, kanenyo iti nasantoan a lugar, ta paset daytoy ti taraon a naidaton iti Apo ken nailasin nga agpaay kadakayo nga agaama. Daytoy ti imbilin kaniak ti Apo.

¹⁴Ngem mabalinyo a kanen, kasta met dagiti familiayo, ti barukong ken ti kammaudi a saka a naidatag a naisangsangayan a sagut ken naisangsangayan a maited iti Apo nga agpaay kadagiti papadi. Mabalinyo a kanen iti sadinoman a lugar a maibilang a nadalus. Naited dagitoy a daton kenka ken kadagiti annakmo a kas bingayyo iti daton a pakikappia nga idatag dagiti Israelita.

¹⁵Yegda ti kammaudi a saka ken ti barukong iti tiempo a pannakapuor ti taba a maidaton iti Apo. Agnanayon nga agpaay kadakayo dagitoy a paset, sika ken dagiti annakmo, kas imbilin ti Apo.”

¹⁶Dinamag ni Moises ti maipapan iti kalding a naidatag a daton gapu iti basol ket naammoanna a napuoranen ti animal. Nakapungtot kada Eleazar ken Itamar, isut' gapuna a sinaludsodna,

¹⁷“Apay a diyo kinnan ti daton gapu iti basol iti nasantoan a disso? Nasantoan unay daytoy a daton ket inted ti Apo kadakayo tapno maikkat ti basol dagiti umili.

¹⁸Gapu ta saan a naipan ti darana iti nasagradoan a Tolda, rumbeng koma a kinnanyo ti sakrifisio sadiay, kas imbilinko.”

¹⁹Insungbat ni Aaron, “Maragsakan ngata ti Apo no kanek ita nga aldaw ti daton gapu iti basol? Ita nga aldaw, indatag dagiti tattao iti Apo ti datonda gapu iti basol ken ti datonda a mapuoran ngem nagdissuor latta kaniak dagitoy nakaam-amak a banag.”

²⁰Napnek ni Moises iti palawag ni Aaron.