Read Iloko Leviticus 12 Bible Online

Leviticus 12 - Iloko bible

Leviticus 12

¹Inted ni Yahweh ken ni Moises dagitoy nga alagaden

²nga agpaay kadagiti Israelita. No lalaki ti ipasngay ti maysa nga ina, pito nga aldaw a maibilang a narugit kas iti pannakaibilangna bayat ti panagreglana.

³Iti maikawalo nga aldaw, masapul a makugit ti ubing.

⁴Palabsen pay ti babai ti 33 nga aldaw santo maibilang a nadalusan iti panagruar ti darana. Maiparit a sagidenna ti aniaman a nasantoan ket saan a makastrek iti nasagradoan a Tolda no di maturpos dagiti aldaw a pannakadalusna.

⁵No met babai ti ipasngay ti maysa nga ina, maibilang a narugit iti las-ud ti 14 nga aldaw a kas iti pannakaibilangna bayat ti panagreglana. Palabsenna pay ti 66 nga aldaw santo maibilang a nadalusan iti panagruar ti darana.

⁶No maturpos dagiti aldaw a pannakadalusna, lalaki man wenno babai ti anakna, masapul a mangidaton iti urbon ti karnero a maysa ti tawenna para iti daton a mapuoran ken maysa a sibong ti kalapati wenno pagaw para iti daton gapu iti basol. Ipanna dagitoy kadagiti papadi iti ruangan ti Tolda ti Dios.

⁷Idatag ti padi dagitoy iti Apo ket aramidenna ti seremonia a mangikkat iti kinarugit; kalpasanna, maibilangton a nadalus. Daytoy ti rumbeng nga aramiden ti babai kalpasan ti panagpasngayna.

⁸No di kabaelan ti babai ti mangidaton iti urbon a karnero, mangala iti dua a kalapati wenno pagaw; maysa ti daton a mapuoran ket daton gapu iti basol ti maysa. Annongen ti padi ti seremonia a mangikkat iti kinarugit ti babai ket maibilangton a nadalus.