Read Iloko Leviticus 13 Bible Online

Leviticus 13 - Iloko bible

Leviticus 13

¹Inted ni Yahweh kada Moises ken Aaron dagitoy nga alagaden.

²No adda gaddil ti maysa a tao wenno letteg, wenno busali a mabalin nga agtinnag a kukutel, masapul a maidatag iti padi, ni Aaron wenno maysa kadagiti annakna.

³Kitaen a naimbag ti padi ti timmubo iti kudil. No pimmuraw ti dutdot iti nagtuboanna ket kasla naun-uneg ti gaddil ngem iti kudil ti lawlawna, makaakar a sakit ti kudil ti timmubo. Iti kasta, ipakaammo ti padi a saan a nadalus daytoy a tao iti imatang ti linteg.

⁴Ngem no puraw ti gaddil ket saan a naun-uneg ngem iti kudil iti lawlawna ken saan a pimmuraw dagiti dutdot, isina ti padi ti tao kadagiti dadduma a tattao iti las-ud ti pito nga aldaw.

⁵Iti maikapito nga aldaw, kitaen manen ti padi ti saksakiten ket no awan namalbaliwan ken saan a nagwaras, maipaing manen ti tao iti sabali pay a pito nga aldaw.

⁶Iti maikapito nga aldaw, kitaen manen ti padi ket no saan a nagwaras ti saksakiten, ipakaammo ti padi a maibilang a nadalus ti tao iti imatang ti linteg; gaddil laeng ti timmubo kenkuana. Labaan ti tao ti pagan-anayna ket maibilangen a nadalus.

⁷Ngem no agwaras ti gaddil kalpasan ti panangkita ti padi, masapul a dumatag manen ti tao iti padi.

⁸No makita ti padi a nagwaras ti gaddil, ipakaammona a saan a nadalus ti tao iti imatang ti linteg; kukutel ti kimpet kenkuana.

⁹Ti siasinoman nga addaan iti kukutel ket maidatag iti padi,

¹⁰a mangeksamen kenkuana. No adda puraw a gaddil iti kudilna a mangpapuraw kadagiti dutdot ken napno iti nana,

¹¹kukutel daytoy. Ipakaammo ti padi a saan a nadalus ti tao iti imatang ti linteg; saan a masapul a maipaing ta nalawag a narugit iti imatang ti linteg.

¹²No nagwarasen ti saksakiten iti entero a bagina, manipud saka agingga iti ulo,

¹³agpakita manen iti padi. No makita ti padi a nagwaras ti sakit ti kudil, ipakaammona a nadalus ti tao iti imatang ti linteg. No pimmuraw ti entero a kudilna, nadalus iti imatang ti linteg.

¹⁴Ngem no bumtak ti gaddil, saan a nadalus ti tao iti imatang ti linteg.

¹⁵Kitaen manen ti padi ket no adda makitana a bimtak a gaddil, ipakaammona a saan a nadalus ti tao iti imatang ti linteg. Makaakar a sakit ti kudil ti bimtak a gaddil ket maibilang a narugit ti tao.

¹⁶Ngem no umimbag ti gaddil ket pumuraw manen ti nagtubboanna, mapan ti tao iti padi

¹⁷a mangkita manen kenkuana. No pimmuraw ti gaddil, nadalus ti tao iti imatang ti linteg ket ipakaammo ti padi a nadalusen.

¹⁸No immimbag ti letteg ti maysa a tao

¹⁹ket kalpasanna adda puraw wenno lumabaga-a-pumuraw a paset ti ayan ti letteg, masapul a mapan ti tao iti padi.

²⁰No makita ti padi a naun-uneg ti timmubo ngem iti kudil iti aglawlawna ken pimmuraw ti dutdot, ipakaammona a saan a nadalus ti tao iti imatang ti linteg. Makaalis a kukutel ti nagtubo a letteg.

²¹Ngem no makita ti padi a saan a pimmuraw dagiti dutdot ken saan a naun-uneg ngem iti kudil iti aglawlaw nupay immolandis ti kolorna, ipaingna ti tao iti las-ud ti pito nga aldaw.

²²No agwaras ti letteg, ipakaammo ti padi a saan a nadalus ti tao iti imatang ti linteg; pudno nga adda sakitna.

²³Ngem no saan a mamalbaliw ken saan a nagwaras, piglat laeng a gapuanan ti letteg, ipakaammo ti padi a nadalus ti tao iti imatang ti linteg.

²⁴No maipapan iti tao a nasinit, eksamenen ti padi no lumabaga wenno lumabaga-a-pumuraw ti nasinit a paset. No pimmuraw dagiti dutdot iti nasinit a paset ket naun-uneg ngem ti aglawlaw a kudil, makaalis a sakit ti kudil ti timmubo iti nasinit a paset ket ipakaammo ti padi a narugit ti tao iti imatang ti linteg.

²⁵

²⁶Ngem no saan a pimmuraw dagiti dutdot ket saan a naun-uneg ti nasinit ngem ti kudil iti lawlawna ngem immolandis, maipaing ti tao iti las-ud ti pito nga aldaw.

²⁷Kitaen manen ti padi iti maikapito nga aldaw, ket no agwarwaras, nalawag a makaalis a sakit ti kudil, ket ipakaammo ti padi a narugit ti tao iti imatang ti linteg.

²⁸Ngem no awan pamalbaliwan ti nasinit ket saan a nagwaras ken immolandis, saan a makaalis ti timmubo. Ipakaammo ti padi a nadalus ti tao iti imatang ti linteg gapu ta piglat laeng ti nasinit.

²⁹No adda gaddil ti ulo wenno timid ti maysa a tao,

³⁰masapul nga agpakita iti padi. No naun-uneg ti gaddil ngem iti aglawlaw a kudil ket duyaw ken narasay dagiti buok, makaakar a sakit ti kudil daytoy, ket ipakaammo ti padi a narugit ti tao iti imatang ti linteg.

³¹Ngem no masarakan ti padi a saan a naun-uneg ti letteg ngem ti aglawlaw a kudil ket awan pay nagtubo a buok, ipaingna ti tao iti las-ud ti pito nga aldaw.

³²Iti maikapito nga aldaw, sukimatenna manen ti gaddil ket no saan a nagwaras sa awanen dagiti duyaw a buok ken saan a naun-uneg ngem ti aglawlaw a kudil,

³³kuskosan ti tao ti buok iti lawlaw ti gaddil. Ipaing manen ti padi ti tao iti pito nga aldaw.

³⁴Iti maikapito nga aldaw, kitaen manen ti padi ti gaddil. No saan a nagwaras ken saan a naun-uneg ngem ti kudil iti lawlawna, ipakaammona a nadalus ti tao iti imatang ti linteg. Labaan ti tao ti pagan-anayna ket maibilang a nadalusen.

³⁵Ngem no agwaras ti gaddil kalpasan ti pannakaipakaammo a nadalus ti tao iti imatang ti linteg,

³⁶eksamenen manen ti padi. No nagwaras ti gaddil, saan a masapul nga birokenna ti duyaw a buok, ta nalawag a saan a nadalus ti tao.

³⁷Ngem no, iti kapanunotan ti padi, saan a nagwaras ti gaddil ket agtubtubo ti nasalun-at a dutdot, kaipapananna a naimbagen ti gaddil ket ipakaammo ti padi a nadalus ti tao iti imatang ti linteg.

³⁸No aglabanglabang ti kudil ti maysa a tao, lalaki man wenno babai,

³⁹kitaen ti padi dayta a tao. No nalitem a puraw dagiti gaddil, mansa la ti kudil ti timmubo; nadalus ti tao iti imatang ti linteg.

⁴⁰No agparut ti buok iti sango wenno likud ti ulo, saan a dayta ti mamagbalin iti tao a narugit iti imatang ti linteg.

⁴¹

⁴²Ngem no agparang ti lumabaga-a-puraw a gaddil iti nakaparutan dagiti buok, makaalis a sakit ti kudil ti timmubo.

⁴³Eksamenen ti padi ket no adda lumabaga-a-puraw a gaddil,

⁴⁴ipakaammona a narugit ti tao iti imatang ti linteg ta adda makaakar a sakit ti kudil iti ulona.

⁴⁵No addaan ti maysa a tao iti kukutel, masapul nga agkawes iti pigispigis, bay-anna a wakray ti buokna, abbonganna ti akimbaba a paset ti rupana sana ipukkaw, “Narugitak, narugitak!”

⁴⁶Maibilang a narugit no saan nga umimbag ti sakit ti kudil, ket agyan iti ruar ti kampo, iti adayo kadagiti tattao.

⁴⁷No adda ratik iti pagan-anay, de lana man wenno linen,

⁴⁸wenno iti lupot a linen wenno de lana, wenno iti lalat wenno aniaman a naaramid iti lalat,

⁴⁹no bumerde wenno lumabaga, agwaras daytoy a ratik, ket masapul a maipakita iti padi.

⁵⁰Kitaenna a naimbag daytoy sana ipakni iti las-ud ti pito nga aldaw.

⁵¹Iti maikapito nga aldaw, no makitana a nagwaras ti ratik, maibilang a narugit ti nagratik.

⁵²Puoran daytoy ti padi agsipud ta agwaras daytoy a ratik a masapul a madadael iti apuy.

⁵³Ngem no masarakan ti padi a saan a nagwaras ti ratik,

⁵⁴ibilinna a malabaan ket ipaknina daytoy iti pito pay nga aldaw.

⁵⁵Kalpasanna, sukimatenna manen, ket no saan a nagbalbaliw ti kolorna, uray no saan a nagwaras, maibilang latta a narugit. Masapul a puoran ti nagratik, adda man ti marunrunot a paset iti pammarang wenno iti ballikidna.

⁵⁶Ngem no kitaen manen ti padi ket nagusaw ti ratik, ray-abenna ti lupot wenno lalat.

⁵⁷Ngem no agparang manen ti ratik, masapul a mapuoranen ti pagan-anay ta agwarwarasen ti ratik.

⁵⁸No malabaan ti nagratik ket maikkat ti ratik, masapul a malabaan manen tapno maibilang a nadalus iti imatang ti linteg.

⁵⁹Daytoy ngarud ti linteg nga annuroten iti ratik iti pagan-anay a de lana man wenno linen, wenno aniaman a linen wenno de lana a lupot, wenno aniaman a naaramid iti lalat tapno maammoan dagitoy no narugit wenno saan.