Read Iloko Leviticus 16 Bible Online

Leviticus 16 - Iloko bible

Leviticus 16

¹Kinasao ni Yahweh ni Moises kalpasan ti ipapatay dagiti dua nga annak ni Aaron idi indatagda ti saan a nasantoan nga apuy ken ni Yahweh.

²Kinunana, “Ibagam ken ni Aaron a mapanto laeng iti Kasasantoan a Lugar iti likudan ti kurtina iti naituding a tiempo agsipud ta sadiay ti pagparangak iti ulep iti ngatoen ti kalub ti Lakasa ti Tulag. Mapapatay ti kabsatmo no agsukir.

³Mabalinna ti sumrek iti Kasasantoan a Lugar kalpasan laeng iti panangidatagna iti bumaro a baka a daton gapu iti basol ken iti kalakian a karnero a daton a mapuoran.”

⁴Kalpasanna, inted ni Yahweh dagitoy nga alagaden. Sakbay a mapan ni Aaron iti Kasasantoan a Lugar, masapul nga agdigos ket agkawesda a kas padi: ti linen a kagay, ken linen a kalsonsilio, ti barikes ken ti turban.

⁵Ikkan dagiti umili ti Israel ni Aaron iti dua a kalakian a kalding a maidaton gapu iti basol ken maysa a kalakian a karnero a daton a mapuoran.

⁶Mangidatag ni Aaron iti toro a baka a daton a pangikkat iti basolna ken iti basol ti familiana.

⁷Kalpasanna, ipanna dagiti dua a kalding iti ruangan ti Tolda ti Dios.

⁸Sadiay, pilien ni Aaron babaen iti panagbinnunot no ania kadagiti dua a bato ti “agpaay iti Apo” ken ti “agpaay ken ni Azazel.”

⁹Idatag ni Aaron ti kalding a nabunot nga agpaay iti Apo a daton gapu iti basol.

¹⁰Ngem ti kalding nga agpaay ken ni Azazel, sibibiag a maidatag iti Apo santo maibulos iti let-ang para ken ni Azazel tapno maikkat dagiti basol dagiti tattao.

¹¹Patayen ni Aaron ti toro a baka ket idatagna a daton gapu iti basolna ken iti familiana.

¹²Mangala iti insensario sana kargaan iti beggang nga adda iti altar. Mangala met iti dua a rakem iti nafino nga insenso. Ipanna dagitoy iti Kasantoan a Lugar.

¹³Sadiay, iti imatang ti Apo, ikabilna ti insenso iti apuy. Gapu iti asuk daytoy, mailinged ti kalub ti Lakasa ti Tulag tapno saanna a makita ket iti kasta saan a matay.

¹⁴Mangala iti dara ti baka ket, babaen iti tammudona, warisanna ti sangoanan ti kalub ket mamimpito met a warisanna ti sangoanan ti Lakasa ti Tulag.

¹⁵Kalpasanna, patayenna ti kalding a maidaton gapu iti basol dagiti tattao ket ipanna ti dara iti Kasasantoan a Lugar. Kas iti inaramidna iti dara ti baka, iwarisna met ti dara iti kalub ken iti sangoanan ti Lakasa ti Tulag.

¹⁶Kastoy ti panangannongna ti seremonia ti pannakadalus ti Kasasantoan a Lugar gapu iti kinarugit dagiti Israelita ken gapu iti amin a basolda. Masapul nga aramidenna daytoy iti Tolda a Paguummongan agsipud ta adda daytoy a tolda iti tengnga ti kampo a maibilang a narugit.

¹⁷Awan ti sumrek iti Tolda ti Dios no sumrek ni Aaron iti Kasasantoan a Lugar a mangannong iti seremonia ti pannakadalus agingga iti rummuar. Inton malpas ti seremonia ti pannakadalusna, ti familiana ken ti entero a gimong,

¹⁸mapan iti altar a pagpuoran kadagiti daton ket annongenna ti seremonia ti pannakadalus: Mangala iti dara ti baka ken dara ti kalding ket pulagidanna dagiti sinan-sara ti altar.

¹⁹Isawsawna ti tammudona iti dara sa mamimpito a warisanna ti altar tapno madalusan ti altar kadagiti basol dagiti Israelita ket agbalin a nasantoan.

²⁰Apaman a malpas ni Aaron ti panangannongna iti seremonia ti pannakadalus ti Kasasantoan a Lugar, ti dadduma a paset ti Tolda a Paguummongan ken ti altar, idatonna iti Apo ti sibibiag a kalding a napili nga agpaay ken ni Azazel.

²¹Ipatayna ti dua nga imana iti ulo ti animal ket ipakaammona dagiti amin a kinadakes, basol ken kinasukir dagiti Israelita tapno mayakarda iti ulo ti kalding. Kalpasanna, itedna ti kalding iti a natudingan a mangibulos iti let-ang.

²²Awiten ti kalding ti amin a basolda ket ipanna iti awan matagtagitao a lugar.

²³Mapan ni Aaron iti Tolda ti Dios, ket ikkatenna ti kawesna a kas padi nga inyarruatna sakbay a simrek iti Kasasantoan a Lugar sana ibati sadiay.

²⁴Masapul nga agdigos iti lugar a nasantoan ket yarruatna dagiti bukodna a kawes. Rummuar ket idatagna ti daton a mapuoran tapno maikkat ti basolna ken ti basol dagiti tattao.

²⁵Puoranna iti altar ti taba ti animal a maidaton gapu iti basol.

²⁶Masapul a labaan ti tao a nangibulos iti kalding ti pagan-anayna sa agdigos sakbay nga agsubli iti kampo.

²⁷Maipan iti ruar ti kampo ti baka ken ti kalding a naidaton gapu iti basol ken naipan ti darada iti Kasasantoan a Lugar a pangikkat iti basol, ket mapuoranda agraman lalat, lasag ken dagiti bagis.

²⁸Masapul a labaan ti tao a nangpuor kadagitoy ti pagan-anayna ket agdigos sakbay nga agsubli iti kampo.

²⁹Annurotenyo iti agnanayon dagiti sumaganad nga alagaden. Iti maikasangapulo nga aldaw ti maikapito a bulan, masapul nga agayunar dagiti Israelita ken dagiti ganggannaet a makipagnaed kadakuada. Saanda nga agtrabaho.

³⁰Iti dayta nga aldaw, maaramid ti seremonia ti pannakadalusda iti amin a basolda tapno maibilangda a nadalus.

³¹Nasantoan unay dayta nga aldaw ket masapul nga agayunarda ken naan-anay nga aginanada. Maannurot dagitoy nga alagaden iti amin a tiempo.

³²Ti Kangatoan a Padi a naordenan ken nakonsagrar a sumukat iti amana ti mangannong iti seremonia ti pannakadalus. Agaruat iti sagrado a pagan-anay,

³³ket annongenna ti seremonia ti pannakadalus ti Kasasantoan a Lugar, ti dadduma a paset ti Tolda a Paguummongan, ti altar, dagiti papadi ken amin a tattao iti gimong.

³⁴Masapul a maannurot dagitoy nga alagaden iti amin a tiempo. Tinawen a maannurot daytoy a seremonia tapno madalusan dagiti Israelita iti amin a basolda. Natungpal ngarud amin dagitoy kas imbilin ni Yahweh ken ni Moises.